Ibrani 12 - Taaz Weru Witu u Nunuwu'en TombuluUli-ulit ma'éman zozo' lakez an zézéha 1 Katuari-katuari, péléng sé tou ma'éman sé menou-nou im puuna itii é limiklik ni kita tanu u ninahak. Karia ung katou-touan néra i ma'éman wia si Opo Empung u méipapailek néra wia ni kita, toro maéndo kékéréan wia ni kita i menté' um pa'émanenta. Niitumo, itula'umola péléng am mahwutez wo a singkéla' u mengapé-ngapé' ni kita, tanu i mahtututu' im wana am pahlolowaan u léwo'zéi' ing kiitenta. 2 Mahweren umana wia si Yesus si mahtu'tul um pa'émanenta wo nimangun um pa'émanenta nimalekep. Ni Sia ezen i nimazézéha witu u salip wo zéi'kan pandungen-Na zozo' niitu makaizangen, ni Sia mahgenang umana u mahpaa-paaz u mapendanen-Na in tumondong. In tarékan ni Sia é rimumezo witu ung kakan u rurumezan ni Opo Empung ing Kolano. 3 Amoké genangen nioula ung kaezenan ni Yesus im pahzézéhan né tou mahsingkéla' sé mahsaru ni Sia. Karia i mahgenanga si Yesus, um pa'émanen niou nimaenté' wo zéi'kan mazéi' i mengalé-ngaléi. 4 Pahpaan ni kamu i mahtututu' mahsaru a singkéla', ni kamu én zéi'kampé' méikaayoma witu u nimazézéha akaz nimaté simaroi un zaha'. 5 Kinaliuzan niouo wé a sésésa ni Opo Empung i menté' un até niou in oki'-Na? Kuan-Na, “É oki'-Ku, pahwéhanla genang lumé'o-lé'os sa si Opo Empung mapagenang ang kasumalaan niou, wo tia' un até niou rumara sa kamu pahkakoro'an-Na. 6 Pahpaan sé tou ikararaaté ni Opo Empung ém pahkaupi'an-Na, wo sé tou niéndo-Na in oki'-Na ém pahkakoro'an-Na.” 7 Sa kamu totoz zézéha pahpaan pahkakoro'an ni Opo Empung, niitu tumuzu'mé i si Opo Empung é mahilek ni kamu tanu in oki'-Na. Pahpaan, wéwéhan wé sé koki' sé zéi'kan pahkakoro'an ni ama'na? 8 Taan sa kamu zéi'kan pahkakoro'an tanu sé tou walina, niitu én tumuzu'mé i ni kamu én oki' zéi'kan méikarékén wo zéi'kan uli-ulit oki'. 9 Si ama'ta im wia ung kaayahan é mahkakoro' wia ni kita, niitumo ni sia pahsigi'enta. Apapé' kasii si Ama'ta si witi kasendukan si mahenté' um pa'émanenta, tantumo ni kita é lumouspé'mé i mahtali-talinga wia ni Sia wo kita toro makailek ung katou-touan. 10 Sé tu'ata sé wia ung kaayahan é mukum ni kita zéi'kan mauréma mengiit um wangun ung ginenang néra. Taan si Opo Empung i mukum ni kita wo kita makailek am wangun wo kita zéi'kan siapa pahséro'an tanu ni Sia in zéi'kan siapa pahséro'an. 11 Kata'uanta, péléng an ukuman ang karegas pahpendanen én zéi'kan makapaazen taan merara un até. Taan in tumondong, i limangkoioma an ukuman itii, ni kita é nimaéndomo tou mahwangun an ulit witu u sinaru ni Opo Empung wo nimangun sé niukum itii maena'. 12 Pahpaan péléng an ukuman ang karegas pahpendanen én zéi'kan makapaazen, niitumo enté-enté'en a lengen wo ang kuruz mahgerger. 13 Wo mahlampangla witu u lalan terén, wo tia' un a'é u mahkénto' én ikalésok, taan nimalé'os, un tanu sé tou menou-nou zéi'kampé' uli-ulit mahkiit an ikapaaz ni Opo Empung én zéi'kan ikalulu taan menou-nou uli-ulit mahkiit an ikapaaz-Na. 14 Mahtututu'la i menou-nou mahlé'o-lé'osan karia péléng sé tou wo mahtututu'la i menou-nou karia un até zéi'kan siapa pahséro'an witu u sinaru ni Opo Empung, pahpaan sa zéi'kan menou-nou karia un até zéi'kan siapa pahséro'an, zéi'kan siapa zozo' in esa si mamilek si Opo Empung. 15 Mile-ilekla wo zéi'kan siapa zozo' in esa im wia ni kamu si kinaliongan ung kamang tatambér ni Opo Empung. Pahpaan sa wéwéhan si téntu, ni sia é maéndo tanu tinanem melangu un toro lumangu sé tou lakez wo mangun sé tou lakez maléwo'. 16 Tia' im wia ni kamu wéwéhan si samek wo zéi'kan mahrékén a méiwéhé ni Opo Empung tanu um pahwangunen ni Esau si nimangkér um wéténg anu ni oki' tu'a pahpaan uman u sana piring kakanen. 17 Kata'uan niouo u nimamuali tumondong niitu, i ni sia paazkan makailek ung kamang itii, taan si ama'na é soomo méhé niitu. Ni sia én zéi'mo winéhan témpo ni ama'na i mahwawangun ung kasumalaanna zozo' ni sia mahamé' i makailek sumaup ung kamang itii. Wangunela an toro mangun si Opo Empung mahpaa-paaz 18 Katuari-katuari, ni kamu i méyé wia si Opo Empung én zéi'kan tanu sé tou Israel im puuna. Sé tou Israel im puuna é nimasaruampé' karia ung kentur Sinai un toro tionan wo un api mahlayas, karia ung karimbengbengan, karia un munteng wo un awahat, 19 karia un zanina um pontuang wo u nuwu' ni Opo Empung. I sé tou Israel timalingamé u nuwu' itii, ni séra mahaléi wo u mahnuwu'mé itii éng kumana'mola i mahnuwu' wia ni séra. 20 Pahpaan sé tou Israel in toro niitu én zéi'kan makaezen i mahtalinga um perénta ni Opo Empung kenu, “Péléng sé kumotkoté ung kentur, ni sia in tou kaapa binatang, ni sia é léwo'zéi' im weriten karia am watu makaz i maté.” 21 Péléng a niilek néra itii én uli-ulit totoz makaindé'en, taka-takazan si Musa éng kimua, “Ni aku én totoz maindé' taka-takazan i mahgerger.” 22 Taan ni kamu é niméyémo wia ung kentur Sion, witi wanua tua'na ni Opo Empung si menou-nou, niitumo u Yerusalem witi kasendukan wo mahilekan karia né mariwu-riwu malaekat sé nimaréwok i mahpaa-paaz. 23 Ni kamu kasii é mahilekan karia né tou sé nimaéndo oki' tu'a ni Opo Empung, a ngaran néra mémoipantik witi kasendukan. Wo ni kamu é mahilekan karia ni Opo Empung, si mahtotoz am pahwangunen péléng né tou in ulit kaapa zéi'kan wo mahilekan karia né roh né tou niéndo ulit sé zéi'mo siapa um pahséro'an. 24 Ni kamu kasii mahilekan karia ni Yesus Kristus si nimahalimé un taaz weru u niénéan ni Opo Empung wo karia un zaha'-Na u nimangun sé tou nimaweresi, taka-takazan si Opo Empung niméhé ampungan wana a singkéla' né tou. Niitumo, un zaha' ni Yesus é lumouspé'mé ung kawangunan un zaha' ni Habel. Pahpaan un zaha' ni Habel é méisaroi pahpaan un téutéu. 25 Niitumo mile-ilekla, tia' kamu soo tumalinga si Opo Empung si mahnuwu'mé. Ni séra sé soo mahtalinga ni sia si mahkua u Nuwu' ni Opo Empung én zéi'kan mata'u tumingkas, apapé' kasii ni kita sé mahtalingamé si Opo Empung si mahnuwu'mé witi kasendukan. Sa kita zéi'kan mahtalinga ni Sia, tantumo ni kita én zéi'kan ikatingkas im witu un ukuman wana a singkéla'. 26 I si Opo Empung nimuwu'ma wia si Musa karia né tou Israel witi kentur Sinai, ung kaayahan é méhzo'. Taan in tarékan u méitaaz-Na én téntii, “Makasapé' ni Aku i mangun ung kaayahan i méhzo', wo zéi'kan uman ung kaayahan u méhzo' taan karia u langit.” 27 Ung kukuan “Makasapé',” ung kalakoana péléng am winangun ni Opo Empung wia ung kaayahan én iéhzo' wo kemun, taan an zéi'kan nyéhzo' én ikatula'u. 28 Niitumo, pahpaan ni kita é nimaéndomo tou ni Opo Empung witi Kakolanoan-Na un zéi'kan mamuali in iéhzo', méyémo kita mapaayo u makasé wo rumagés wia si Opo Empung u mahwangun ni Sia mahpaa-paaz. Ni kita i mahragés wia ni Sia éng karia i mahsigi' wo maindé' ni Sia. 29 Pahpaan si Opo Empungta én tanumokan un api mela'ung. |
@LAI2018
Indonesian Bible Society