Ibrani 1 - Taaz Weru Witu u Nunuwu'en Tombulu

Si Opo Empung mahnuwu' mengiité si Oki'-Na

¹ Im puuna si Opo Empung é makalakezo kimua wo pahsasawelnokala um pakahnuwu'-Na wia sé nimaopota mengiité sé nabi-Na.

² Taan in tarékan, im wana an endo kaakazan ung kaayahan kenu, ni Sia é nimuwu' wia ni kita mengiité si Oki'-Na, si tinotozo i maéndo makaanu péléng am péléng. Mengiité si Oki'-Na, si Opo Empung nimangun péléng am péléng.

³ Ni Siamo si mahsena'mé u sena' ni Opo Empung wo mengiité ni Sia kita toro milek si Opo Empung. Karia u Nuwu'-Na un totoz mahkawasa, si Yesus mahtéiz péléng am wia ung kaayahan. Kumawusa Sia i miloté sé tou im witu un ukuman wana a singkéla', ni Sia rimumez witu ung kakan ni Opo Empung si totoz wangko' witi tampa totoz rakék.

Si Oki' Ni Opo Empung lumouspé'mé sé malaekat

⁴ Niitumo, si Opo Empung é niméhémo wia si Oki'-Na ung kawasa u lumousé ung kawangko'an ung kawasa né malaekat, wo u méingaran ni Opo Empung wia ni Sia é lumouspé'mé ung kawangko' u méingaran wia sé malaekat.

⁵ Pahpaan wia si séi im wia sé malaekat kinuaano ni Opo Empung un téntii, “Ni Komo si Oki'-Ku! In endo kenu ni Aku kumua i ni Ko én Oki'-Ku?” Wo, “Ni Aku é maéndo Ama'-Na, wo ni Sia é maéndo Oki'-Ku?”

⁶ Wo kasii, i si Opo Empung nimatumé si Oki'-Na si wiamo puunala péléng am péléng im winangun, ni Sia éng kimua, “Péléng sé malaekat ni Opo Empung é léwo'zéi' i mongkot wo sumigi' wia ni Sia.”

⁷ Tumoro sé malaekat-Na, si Opo Empung éng kimua, “Si Opo Empung nimangun sé malaekat maéndo reges repet, wo sé menanawang-Na maéndo layasna un api.”

⁸ Taan tumoro si Oki'-Na, si Opo Empung éng kimua, “U rurumezan-Nu ing Kolano, o Opo Empung, makaz ing kauré-uré. Ni Ko i mahperénta é mahperénta karia ung kaulitan.

⁹ Ni Ko én totoz paaz un zéi'kan mahsanaweka wo totoz mazi'zis u mahsanaweka; niitumo si Opo Empung, si Opo Empung-Mu é niméléng ni Ko wo niméhé wia ni Ko u sisigi'an u mahalimé a makapaazen, lumousé sé kakaria-Mu.”

¹⁰ Si Opo Empung kangkasii éng kimua tumoro si Oki'-Na, “Puunala péléng am péléng im winangun, ni Ko Mahpiara, ni Ko é zimeta'moma un to'tolan ung kaayahan, wo u langit ém winangun u lengen-Mu.

¹¹ U langit wo ung kaayahan é mazéi' wo péléng niitu é matewu tanu ung karai, taan ni Ko é memia-mia makaz ing kauré-uré;

¹² ni Ko é mangun ni séra malepet tanu ang karai tonton, wo tanu ang karai, ni séra é masawelan, taan ni Ko in esa én téntukan wo an ta'un ni Ko i menou-nou én zéi'kan maapu.”

¹³ Wia si séi im wia sé malaekat si kinuaan-Namé, “Rumumezomé witu ung kakan-Ku, makaz sé kakoro'-Mu iwéhé-Ku witu u léléék-Mu?”

¹⁴ Sa téntu, séi ndéén sé malaekat kenu wé? Ni séra é roh sé mahsawang si Opo Empung. Ni séra méiatu ni Opo Empung i mésumawang sé tou ma'éman sé méipilot im witu un ukuman wana a singkéla'.