Galatia 5 - Taaz Weru Witu u Nunuwu'en Tombulu

Ni kita én zéi'mo ata pahpaan si Yesus Kristus

¹ Pahpaan si Kristus si nimanguno ni kita in zéi'mo ata, ni kita én uli-ulit zéi'mo ata. Niitumo, enté-enté'en um pa'émanenta wia ni Sia, wo tia' iwaya niou un tou niou im pahata-atan sumaup un ukum Torat.

² Ni aku Paulus, uli-ulit ikuakuma wia ni kamu: Sa iwéhé niou un tou niou i sunaten, si Yesus Kristus én zéi'kan siapa torona im wia ni kamu.

³ Ikuakupé'ma sumaup wia séi uman si niméhé un touna i sunaten, ni sia é léwo'zéi' i mahwangun péléng un ukum Torat.

⁴ Sa kamu mahtututu' in éndon ulit witu u sinaru ni Opo Empung pahpaan i mahkiit un ukum Torat, ung katou-touan niou én zéi'mo méikauntep witu ung kamang tatambér ni Opo Empung.

⁵ Pahpaan um pa'émanenta wia si Yesus Kristus, niitumo si Roh Lenas é mahpaayang wia ni kita. Karia in téntu, ni kita é niméré' uman in éndon ulit witu u sinaru ni Opo Empung tanu um pengento-ngento'enta karia in ezen.

⁶ Pahpaan sinunat kaapa zéi'kan sinunat é masuat uman im wia sé tou sé nimaesamo karia ni Kristus Yesus. Un totoz ipahpuu-puuna é ma'éman si Kristus Yesus un toro pa'ileken karia i rumaraaté sé tou walina.

⁷ Im puuna, im witu um pahlolowaan, ni kamu é nimahlolowaanola karia im wangun. Niitu én tanu ni kamu wanguno i mahkiit si Yesus. Séi wé si mahapé-apé' wia ni kamu akaz ni kamu zéi'mo mahkiit ung kaulitan?

⁸ Un eenou itii én zéi'kan wia si Opo Empung si timawah ni kamu a méyé.

⁹ U nimamuali kenu én tanu ung kukuan kenu, “U ragi toyo' uman nimangun péléng um pinahsembor im wangunen roti sumegahmé.”

¹⁰ Pahpaan ni kita nimaesamo karia ni Mahpiara, totoz kata'uangku i ni kamu én zéi'kan ikakiit an tutuzu' zéi'kan siapa kaulitan itii. Taan si tou, séi uman ni sia si nimangun ni kamu nimakayo' én ukumen ni Opo Empung.

¹¹ Wo ni aku, katuari-katuari, sa ni aku mahtuzu' wia sé tou tumoro u sunaten, kaa ni aku pahzézéhampé' né tou Yahudi? Pahpaan sa ni aku mahtuzu' wia sé tou tumoro u sunaten, si Yesus Kristus i nimaté sinalip én zéi'mo maéndo watu pahkasangkilan wia ni séra.

¹² Sé tou mahkayo' ni kamu karia an tutuzu' im pahsunaten, tawimo pakaketoren néramola in esa u makaizangen néra!

¹³ Katuari-katuari, ni kamu én ulit tinawahmo i maéndo tou zéi'mo pahata-atan. Taan tia' un zéi'mo pahata-atan itii én éndon niou oras i menou-nou mahwangun a singkéla'. Taan tawimo pahsawangala sé tou walina karia u raraatéan.

¹⁴ Pahpaan péléng un ukum Torat ém pinakasamo witu u Nuwu' ni Opo Empung kenu, “Iraraatéla si kasuat tou tanu ko rumaraaté un toumu in esa.”

¹⁵ Taan sa kamu mahkoro' wo mahsususaan un tanumokan i mahkikikian wo mahnenepnepan, mile-ilek én taa kamu mahwuwunu'ala!

Mahkiit u lelo un awak kaapa mahkiit um paaz ni Roh Lenas

¹⁶ Um pahkukuakuma wia ni kamu én téntii: Ung katou-touan niou é mahkiitla um paaz ni Roh Lenas, karia in téntu ni kamu én zéi'kan kumiit u lelo un awak i mahwangun a léwo'.

¹⁷ Pahpaan u lelo un awak i mahwangun a léwo' é nimatamburian karia um paaz ni Roh Lenas wo um paaz ni Roh Lenas é nimatamburian karia u lelo un awak i mahwangun a léwo'. Un zua kenu é nimatamburian taka-takazan ni kamu sekezé én zéi'kan mahwangun ang kapaaz niou.

¹⁸ Taan sa si Roh Lenas si mahahkit ung katou-touan niou, ni kamu én zéi'mo mahkiit un ukum Torat.

¹⁹ Um pahwangunen né tou mahkiit u lelo un awak i mahwangun a léwo' é ang kenu: wayaan ung kasamekan, saparuni, mahwangun kiit u lelo wana ang kaizangnokané,

²⁰ mahongkot wo mahsigi' wia sé opo-opo, mahriara, lakez kakoro', tangkoro'en, téutéu, uupi'en, memandung uman un tou in esa, mangun sé tou makahkoro', mahwangun sé tou makayo',

²¹ soo milek sé tou walina mahpaa-paaz, matetewelen, memésta-mésta uman wo am walina. Tumoro niitu péléng, ni aku é mapagenanga wia ni kamu in tarékan tanu u méipapagenangku im puuna: séi uman sé mahwangun an téntu én zéi'kan makailek wéwéténgan witi Kakolanoan ni Opo Empung.

²² Taan sé tou mahkiit um paaz ni Roh Lenas é mahwangun ang kenu: rumaraaté, mahpaa-paaz, mahlé'o-lé'osan, ezen, lé'os uman, paaz mahsawang si kasuat tou, enté' witu um pa'émanen,

²³ eluz wo makawawa ing kumawasa witu un tou in esa. Zéi'kan siapa un ukum toro mapahsasala' niana.

²⁴ Séi uman sé toumo ni Kristus Yesus, ni sia én zéi'mo mahkiit u lelo un awak i mahwangun a léwo' wo ung genang i mangun a léwo'an. Ni sia é simalipo péléng a lelo un awak i mahwangun a léwo' wo um paaz i mangun a léwo'an.

²⁵ Sa ung katou-touanta é mahkiito um paaz ni Roh Lenas, iwéhéla ung katou-touanta im pahtu'tul ni Roh Lenas.

²⁶ Tia' kita maloozan, wo tia' kita mahpapasu'an wo mahtétéutéuan.