Galatia 4 - Taaz Weru Witu u Nunuwu'en Tombulu

Zéi'mo siapa si pahata-atan

¹ Ung kalakoan u méikuakuma én téntii: Sa si oki' si makailek um wéwéténgan né tu'ana éng koki'pé', ni sia masuatpé' karia ni ata zozo' ni sia si makaanu péléng a sangkum né tu'ana.

² Taan karengan sia ing koki'pé', wéwéhan sé mahpiara ni sia wo mahtéiz a sangkumna akaz witu un oras tinotozo ni ama'na i makailek u sangkum ni ama'na.

³ Téntu kangkasii ni kita: Sa ung katou-touanta é mahasa-asarpé' sé koki', ni kita ém pahata-atampé' an tinotoz wia ung kaayahan kenu.

⁴ Taan sa méikaayomola witu un orasna, si Opo Empung matumé si Oki'-Na si méitoumé ni raraha wo si Koki' itii é menou-nou mahkiit un ukum Torat.

⁵ Ni Sia é méiatumé ni Opo Empung in tumubus sé tou mahkiit un ukum Torat, wo kita sungkulen i maéndo oki' ni Opo Empung.

⁶ Pahpaan ni kamu én oki' ni Opo Empung, niitumo si Opo Empung nimatumé si Roh ni Oki'-Na witu un atéta, si tumawah, “O Abba, o Ama'ku!”

⁷ Niitumo, ni kamu én zéi'mo pahata-atan taan ni kamu é nimaéndomo oki'-Na. Sa ni kamu nimaéndomola oki'-Na, ni kamu kasii sé makailek um wéténg im wana a niimeko in méiwéhé ni Opo Empung wia sé oki'-Na.

⁸ Im puuna i ni kamu zéi'kampé' mata'u si Opo Empung, ni kamu ém pahata-atan né opo-opo sé zéi'kan wangun im pahsigi'en, taan sé opo-opo itii én zéi'kan Opo Empung.

⁹ In tarékan ni kamu é mata'umo si Opo Empung, lumouspé'mé niitu si Opo Empung é mata'umo ni kamu. Kaa kamu mawuri uman taré wana an tinotoz an zéi'kan enté' wo zéi'kan siapa apa in iwéhé wo nimayo kasii un tou niou im pahata-atan an tinotoz itii?

¹⁰ Wéwéhan an endo wangko', a loloho'en, an oras wo an ta'un an tinotoz niouo im pahlé'osen mengiit un ukum Torat.

¹¹ Ikaindé'ku én taa am pinaayangku wia ni kamu én zéi'kan siapa torona.

Um pahaléien ni Paulus wia sé jamaat witi Galatia

¹² Katuari-katuari, pahaléiengku wia ni kamu i maéndo tanu ni aku, pahpaan ni aku én tou Yahudi taan ni aku én tanumo ni kamu sé zéi'kan tou Yahudi sé zéi'kan mahkiit un ukum Torat. I ni aku mahwali-wali karia niou, ni kamu én zéi'kan nimahwangu-wanguné an zéi'kan wangun wia ni aku.

¹³ Kagenangan nioupé'la ing katé-taré ni aku i nimangémé wia ni kamu a mahwoka' u Nuwu' Lé'os tumoro si Yesus. In toro niitu ni aku é saki.

¹⁴ Zozo' un awakku nimaéndomola pengalin wia ni kamu taan ni aku én zéi'kan ikati'tir niou kaapa pahséro'an niou. Ni aku é sinungkul nioué tanumokan simungkulé si malaekat ni Opo Empung. Lumousé niitu, ni aku é sinungkul niou tanumokan simungkula si Kristus Yesus.

¹⁵ In toro niitu ni kamu én totoz mahpaa-paaz. Tarékan, amoitumo u mahpaa-paaz niou itii? Ni aku éng kumua a niilekku tumoro ni kamu im puuna. In toro niitu, sa toro, um weren niou é suiten niou wo iwéhé wia ni aku.

¹⁶ Apa pahpaan kimuama an ulit wia ni kamu, ni aku nimaéndomola kakoro' niou?

¹⁷ Sé tou walina itii é mahtututu' i mahakat ni kamu wo ni kamu ikakiit ung kalakoan ung ginenang néra un zéi'kan wangun. Pahpaan kapaaz néra ni kamu én tumampasa im wia ni kai, wo ni kamu kalousna i mahwéhé genang ing kumiit ni séra.

¹⁸ Niitu én ulit sa si tou mahtututu' i mahwéhé genang wana am wangun sekez in endo, zéi'kan uman i ni aku mahwali-wali karia niou taan kasii i ni aku zéi'kan mahwali-wali karia niou.

¹⁹ É ni kamu sé oki'ku ikararaatéku. Pahpaan ni kamu, ni aku mahpendan kasii u rumara tanumokan si wéwéné in tumou si oki'na. Ni aku kasii én zéi'kampé' kumana' i mendan u rumara makaz ung katou-touan ni Kristus toro kaile-ilekan witu ung katou-touan niou.

²⁰ Ni aku én totoz melelo-lelo i mahwali-wali karia niou in tarékan, wo ni aku toro sumirita karia i maheluz umana, pahpaan ni aku é lingangamo i mahsaru ni kamu.

Si Hagar wo si Sara

²¹ É kamu sé paaz mahkiit a méipantik witu un ukum Torat. Ikuamé wia ni aku, zéi'kampé' pinahtalinga-talinga nioula wé u méipantik witu un ukum Torat?

²² Wéwéhan u méipantik i si Abraham makaoki' sé zua. Si esa ém wia si wéwéné atana wo si esa ém wia si wéwéné si zéi'kan atana.

²³ Si koki' méitoumé ni wéwéné atana é méitoumé pahpaan um paaz in tou uman, taan si koki' méitoumé ni wéwéné si zéi'kan atana itii é méitoumé pahpaan un taaz ni Opo Empung wia si Abraham.

²⁴ Sé wéwéné zua itii én tanu u aandéan. Pahpaan sé wéwéné zua itii én tanumokan un zua pinataazan ni Opo Empung. Si Hagar, si wéwéné ata ni Abraham én toro pasuaten karia um pinataazan ni Opo Empung karia né tou Israel im witi kentur Sinai. Si Hagar itii én tanu ina' né tou sé ata un ukum Torat.

²⁵ Niitumo si Hagar én toro pasuaten karia ung kentur Sinai um witi tana' Arab, wo kasii toro pasuaten karia u Yerusalem in tarékan. Pahpaan sé tou witi Yerusalem é maéndomo ata un ukum Torat, ni séra é maéndomo ata kasuat ni Hagar.

²⁶ Taan un taaz walina éng kasuat ni mahayo ni Abraham, si Sara. Si Sara én toro pasuaten karia u Yerusalem weru um witi kasendukan. Ni sia én ina'ta, sé zéi'kan ata un ukum Torat.

²⁷ Pahpaan witu um Pinantik Lenas é méipantik téntii, “Mahpaa-paazola é ko si wéwéné pesel, si zéi'kan nimahtou-toumé si koki'! Mahkérétla karia i mahpaa-paaz é ni ko si wéwéné zéi'kan nimendané u rumara in timoumé si koki'! Pahpaan si wéwéné méitula'umoma ni mahayona, ni sia é makailek koki' lumousé sé wéwéné wéwéhan mahayo.”

²⁸ Niitumo katuari-katuari, ni kamu é méitoumé pahpaan un taaz ni Opo Empung wia si Abraham, kasuat ni Ishak.

²⁹ Taan tanu im puuna, si koki' méitoumé pahpaan um paaz ni tou é mahzézéha si koki' méitoumé pahpaan un paaz ni Roh ni Opo Empung. Téntu kangkasii u mahmuali in tarékan.

³⁰ Taan im witu um Pinantik Lenas é méipantik téntii, “Iondoloma si wéwéné ata itii karia ni oki'na. Pahpaan si koki' itii én zéi'kan makailek um wéwéténgan wana a sangkum ni ama'na mahwali-wali karia ni koki' méitoumé ni wéwéné zéi'kan ata itii.”

³¹ Pahpaano niitu, katuari-katuari, ni kita én zéi'kan oki' ni wéwéné si ata pahpaan mahkiit un ukum Torat, taan ni kita én oki' ni wéwéné si zéi'kan ata itii.