Galatia 3 - Taaz Weru Witu u Nunuwu'en Tombulu

Makailek si Roh ni Opo Empung pahpaan ma'éman si Yesus Kristus

¹ É kamu tou ma'éman witi Galatia sé lemou! Séi si rimiarala ni kamu taka-takazan ni kamu én timamburimola wia si Yesus Kristus? Zéi'kankuaa méipapata'ukumola lumé'o-lé'os wia ni kamu tumoro si Yesus Kristus si nimaté witu u salip itii?

² Amoké ikua nioué wia ni aku: Apa ni kamu é makailek si Roh ni Opo Empung pahpaan mahkiit un ukum Torat kaapa pahpaan ma'éman u Nuwu' Lé'os tumoro si Yesus méipahwoka'ku?

³ Kaa kamu lemou téntu? Rengan kamu ma'éman si Yesus Kristus, ung katou-touan niou éng kinawasamo ni Roh ni Opo Empung, kaa in tarékan ni kamu é mahaayo un zéi'kan siapa pahséro'an karia ung ketez niou in esa?

⁴ Totoz kasiapa torona wé péléng am pinendan nioué itii? Amo kahuman niitu zéi'kan siapa torona!

⁵ Si Opo Empung é niméhémo si Roh-Na wia ni kamu wo nimanguno a makakompo'en wia ni kamu. Apa ni kamu é makailek si Roh ni Opo Empung pahpaan mahkiit un ukum Torat kaapa pahpaan ma'éman u Nuwu' Lé'os tumoro si Yesus méipahwoka'ku?

Si Abraham niéndo ulit pahpaan um pa'émanenna

⁶ Téntu kangkasii si Abraham, tumoro um pa'émanenna witu um Pinantik Lenas é méipantik, “Si Abraham é ma'éman wia si Opo Empung, pahpaano niitu ni sia niéndo ulit ni Opo Empung witu u sinaru-Na.”

⁷ Niitumo, ileken nioula, péléng sé tou ma'éman si Opo Empung, ni séramo sé oki' ni Abraham.

⁸ Rengan im puuna toro kata'uanta witu um Pinantik Lenas i si Opo Empung éng gimenang i mangun sé tou zéi'kan Yahudi in éndon-Na ulit pahpaan um pa'émanen néra wia ni Sia. Si Opo Empung é nimapata'umo u Nuwu' Lé'os tumoro si Yesus Kristus wia si Abraham, kuan-Na, “Mengiité ni ko, péléng sé tou wia ung kaayahan éng kamangen.”

⁹ Niitumo, séi uman sé ma'éman si Opo Empung, ni séra kangkasii éng kamangen karia ni Abraham si ma'éman itii.

¹⁰ Pahpaan péléng sé tou sé mahtututu' in éndon ulit witu u sinaru ni Opo Empung karia i mahkiit un ukum Torat, ni séra é makailek un epa' ni Opo Empung. Pahpaan witu um Pinantik Lenas é méipantik téntii, “Péléng sé tou zéi'kan uli-ulit mahwangun péléng un ukum Torat, ni séra é makailek un epa' ni Opo Empung.”

¹¹ Niitumo, méikatuzu'momé in zéi'kan siapa tou niéndo ulit ni Opo Empung pahpaan i mahkiit un ukum Torat. Pahpaan witu um Pinantik Lenas é méipantik téntii, “Si tou niéndo ulit ni Opo Empung, ni sia é menou-nou pahpaan um pa'émanenna.”

¹² U nimaéndo to'tolan wana an ukum Torat én zéi'kan um pa'émanen, taan séi uman si mahwangun un ukum Torat é mamenou-nou pahpaan mahkiit niitu.

¹³ Pahpaan ni kita én zéi'kan makawawa i mahkiit péléng un ukum Torat, niitumo ni kita é makailek un epa' ni Opo Empung. Taan si Kristus timubuso ni kita im witu un epa' itii, karia i nimayo un tou-Na sinalip i sumawel ni kita. Pahpaan witu um Pinantik Lenas méipantik téntii, “Si tou niukum sinalip é makailek un epa' ni Opo Empung!”

¹⁴ Si Yesus Kristus nimanguno niitu, wo sé tou zéi'kan Yahudi é makailek ung kamang mémoitaaz ni Opo Empung wia si Abraham pahpaan ni séra nimaesa karia ni Kristus. Karia in téntu mengiité um pa'émanen wia si Kristus ni kita makailek si Roh ni Opo Empung si mémoitaaz-Na itii.

Un ukum Torat kaapa un taaz ni Opo Empung

¹⁵ Katuari-katuari, ni aku é méhéma un toro maéndo kékéréan u mahmuali i mendo-endo. Sa wéwéhan um pinataazan wo um pinataazan itii én tinékénano ni nimangun niitu zozo' ni sia in tou uman, zéi'kan siapa zozo' in esa si tou toro zuméi' kaapa mawes witu um pinataazan itii.

¹⁶ Péléng an taaz itii é méikuamo wia si Abraham wo wia si suzuna. Si Opo Empung ing kimua un taaz itii én zéi'kan kimua “wia sé suzuna”, pahpaan sa méikua “wia sé suzuna” ung kalakoana é lakez sé makailek un taaz itii, taan si Opo Empung éng kimua “wia si suzumu”, ung kalakoana én esa uman si makailek un taaz itii, ni siamo si Kristus.

¹⁷ Ung kalakoan u méikuakuma itii én téntii: Un pinataazan méikua wia si Abraham im puuna u niénéano ni Opo Empung, zéi'kan mata'u zéi'en karia un ukum Torat, um winangunokan in epatna atus wo teluna pulu' ta'un tumondongé, taka-takazan um pinataazan itii én zéi'mo enté'.

¹⁸ Niitumo, sa um wéwéténgan u sangkum méiwéhé ni Opo Empung é mengiit un ukum Torat, niitu én zéi'mo pahkuan wéwéténgan u méiwéhé mengiit un taaz, taan si Opo Empung timambéro ung kamang wia si Abraham mengiit u mémoitaaz-Na.

Un ukum Torat é méiwéhé wo sé tou mata'u a singkéla'

¹⁹ Sa téntu, apa wé un torona un ukum Torat i méiwéhémé? Un ukum Torat é méiawes i mapata'u wia sé tou a singkéla' pahmualin néra. Un ukum Torat itii ém pahpakén akaz uman i méyé si suzu ni Abraham si méikua witu un taaz ni Opo Empung wia si Abraham. Un ukum Torat itii é méikua né malaekat mengiité si Musa wia sé tou Israel.

²⁰ Sa wéwéhan tou mangun um pinataazan é léwo'zéi' im wéwéhan si tou sumawang, wo sé zua tou mangun um pinataazan toro masungkul. Taan si Opo Empung zéi'kan memandung si tou i sumawang ni Sia i masungkul karia ni Abraham i mangun um pinataazan pahpaan si Opo Empung in esa si nimangun um pinataazan itii.

²¹ Sa téntu, apa un ukum Torat u méiwéhé ni Opo Empung é nimatamburian karia an taaz-Na? Zéi'kan téntu. Pahpaan sa un ukum Torat é méiwéhé ni Opo Empung i méhé ung katou-touan makaz ing kauré-uré, tantumo sé tou niéndo ulit im witu u sinaru ni Opo Empung pahpaan mahkiit un ukum Torat.

²² Taan witu um Pinantik Lenas méipantik, “Péléng sé tou éng kinawasamo a singkéla'.” Niitumo, un taaz ni Opo Empung un iwéhé mengiité um pa'émanen wia si Yesus Kristus én iwéhé wia ni séra sé ma'éman wia ni Sia.

²³ In zéi'kampé' ma'éman si Yesus Kristus, ni kita é mahkii-kiitpé' un ukum Torat. Ni kita i mahkii-kiitpé' un ukum Torat én tanu méiuntep bui akaz si Yesus Kristus méyé a ni kita ma'éman ni Sia.

²⁴ Niitumo, un ukum Torat én tanu si tou mahtéiz ni kita makaz si Kristus méyé, wo ni kita sé ma'éman wia ni Sia én éndon ulit ni Opo Empung.

²⁵ In tarékan ni kita é ma'émano wia si Yesus Kristus. Niitumo ni kita én zéi'mo totoz téizen ni menénéiz.

²⁶ Pahpaan ni kamu péléng én oki'mo ni Opo Empung mengiité um pa'émanen niou wia si Yesus Kristus.

²⁷ Ni kamu péléng sé sinaranimo karia u ngaran ni Kristus, ung katou-touan niou én tanumo ung katou-touan ni Kristus.

²⁸ Niitumo, im wia ni kamu én zéi'kan siapa sé pahkuan tou Yahudi kaapa zéi'kan tou Yahudi, zéi'kan siapa sé pahata-atan wo sé zéi'mo pahata-atan, zéi'kan siapa tuama kaapa wéwéné, ni kamu péléng é nimaesamo pahpaan ma'éman wia si Kristus Yesus.

²⁹ Sa ni kamu én anu ni Kristus, ni kamu kangkasii é méikarékéno suzu ni Abraham wo ni kamu é makailek a méitaaz ni Opo Empung wia si Abraham.