Filipi 4 - Taaz Weru Witu u Nunuwu'en Tombulu

¹ Pahpaano niitu, katuari-katuari sé ikararaatéku wo pelelo-leloku, sé mahwangun ni aku i mahpaa-paaz wo sé pahloo-loozengku pahpaan ma'émano wia si Kristus, menté-enté' i ma'éman wia si Mahpiara.

A sésésa kamurian

² Ni aku é sumésama wia si Euodia wo si Sintikhe. Pahaléiengku wo ni kamu zua én esa genang wo malé'osala sumaup in tou ma'éman.

³ Pahaléiengku kasii wia si Sunsugos, si kakariaku totoz mahtali-talinga: Pahsawangampé'la si Euodia wo si Sintikhe, wo sé wéwéné zua itii malé'osala. Pahpaan ni séra é simawango ni aku karia ni Klemens wo sé kapaayangku walina i mahwoka' u Nuwu' Lé'os. Pahpaan ni séra péléng é ma'émano wia si Yesus wo nimakaileko ung katou-touan makaz ing kauré-uré, niitumo a ngaran néra é méikapantiko witu ung kitap katou-touan.

⁴ Mengalé-ngaléi uman ni kamu péléng sekezé é mahpaa-paaz pahpaan nimaesa karia ni Yesus Mahpiara! Isaupkupé'ma: Mahpaa-paazola!

⁵ Mahtututu'la wo ung kalé'osan un até niou éng kata'uana péléng né tou. Pahpaan un endo si Yesus Mahpiara i mawurimé sumaup éng kaleleznamo.

⁶ Tia'mo tahlous maindé' tumoro am péléng. Taan im wana péléng am péléng, mengaléila wo ipapaayola péléng am pemandungen niou wo am pahaléien niou wia si Opo Empung karia i mahkua u makasé.

⁷ Sa kamu mengaléi tanu niitu, si Opo Empung é méhé ung kaluasan witu un até niou, ung kumelung un até wo ung genang niou, pahpaan nimaesa karia ni Kristus Yesus. Ung kaluasan witu un até u méiwéhémé ni Opo Empung itii, zéi'kan katulapan karia ung katulapan niou in tou uman, pahpaan niitu ém wia si Opo Empung in esa a méyé.

⁸ Ung kamurian katuari-katuari, péléng an ulit, péléng am wangun im pahloozen, péléng an zéi'kan mahsanaweka, péléng am weresi, péléng an tombal, péléng an tariis im pahtalingan, péléng am wéwéhan torona wo an toro pahloozen, niana péléng é léwo'zéi' ing genangen nioula.

⁹ Péléng am pinahtata'u niouo wo péléng ang kinailekan niouo, wo péléng an tinalinga niouo wo péléng a niilek niouo wia ni aku, pahwangunela niitu. Karia in téntu, si Opo Empung si mahwéhémé ung kaluasan witu un até é lamahwali-wali karia niou.

Si Paulus kimua makasé

¹⁰ Si Mahpiara si nimangun ni aku totoz mahpaa-paaz pahpaan ni kamu é mahgenang ni aku. Kata'uangku ni kamu sekezé é mahgenangé ni aku taan pahpaan ni kamu én zou'ma im wia ni aku, niitumo ni kamu én zéi'kan mata'u mésumawang ni aku.

¹¹ Ni aku kimuama i mahpaa-paaz pahpaan ni kamu mahgenangé ni aku, niitu én zéi'kan pahpaan ni aku mahgenangla im wéwéhan ung kailekangkumé. Zéi'kan téntu, pahpaan zozo' am pemandungengku zéi'kampé' awes taan zéi'kan apa-apa, pahpaan ni aku é nimanaramo karia un apa uman um wiamo ni aku én aweso.

¹² Kata'uangku kura i menou-nou karia in zéi'kampé' wutul am pemandungen wo kata'uangku kura i menou-nou karia im wutul am pemandungen wo malake-lakez. Apa uman u mahmuali wia ni aku, ni aku im wesuh kaapa i maharem, im wa'ilan kaapa in zéi'kan siapa apa, totoz ing kata'uangkumo kura i mangun un touku i mahpaa-paaz.

¹³ Péléng am péléng én toro pengalingku pahpaan si Yesus Kristus si mahwéhémé ung ketez wia ni aku.

¹⁴ Zozo' in téntu, um pahwangunen niou én totoz lé'os, ni kamu mahsawango ni aku im wana ang kasusaangku.

¹⁵ É kamu tou Filipi, kata'uan niouo, i ni aku timula'umé u Makedonia wo taré mahwoka' u Nuwu' Lé'os tumoro si Yesus, ni kamu uman sé jamaat nimahtulungé ni aku wana péléng am pemandungengku, karia i mahwéhémé zoit wia ni aku. Zéi'kan siapa jamaat walina sé nimahwanguné an téntu wia ni aku.

¹⁶ Pahpaan i ni aku witi Tesalonika, ni kamu ém woo makapira i nimahwéhémé a sasawang wia ni aku.

¹⁷ Zéi'kan a méiwéhémé itii am penérongku, taan ung kapaazku si Mahpiara éng kalakezna i mahwéhémé péléng am péléng wia ni kamu pahpaan simawangomé ni aku.

¹⁸ In tarékan si Epafroditus é nimahalimomé a raragés méiwéhé nioué wia ni aku, niitumo ni aku nimakailekomé péléng am pemandungengku um wia ni kamu a méyé. Lumouspé'tarémé niitu é malake-lakezo a méiwéhé nioué. A méiwéhé nioué én totoz wangun wo niitu én tanu u raragés mahwou tariis ung kapaaz ni Opo Empung.

¹⁹ Si Opo Empungku é meméhé-méhémé péléng am pemandungen niou mengiité si Kristus Yesus. Pahpaan ni Sia ém wa'ilan, niitumo ni Sia é méhé péléng am pemandungen niou mengiit ung kawa'ilanan wo ung kawangko'an-Na, taka-takazan am pahwéhé-Namé é lumousé am pemandungen niou.

²⁰ Mengalé-ngaléi uman si Opo Empung, si Ama'ta ém pahloozen wo pahsigi'en rengan in tarékan makaz ing kauré-uré! Amin.

Sigi' kamurian

²¹ Ipapaayopé'la u sigi'ku wia péléng sé tou linenas pahpaan ma'éman si Kristus Yesus. Sé katuari esa pa'émanen sé mahwali-wali kariaku kasii é mapaayoma u sigi' néra wia ni kamu.

²² Péléng sé tou linenas pahpaan ma'émano wia si Yesus wia'i é mapaayoma u sigi' néra wia ni kamu. Wuntul sé mahwia-wia u istana ni Kaisar é mahpuu-puuna i mapaayoma u sigi' néra wia ni kamu.

²³ Mengalé-ngaléi uman ung kamang tatambér ni Yesus Kristus Mahpiara é menaté-natér ni kamu péléng.