Filipi 3 - Taaz Weru Witu u Nunuwu'en Tombulu

Kura kita i niéndo ulit witu sinaru ni Opo Empung

¹ Ung kamurian, katuari-katuari, mahpaa-paazola pahpaan nimaesamo karia ni Mahpiara. Ni aku én zéi'kan mahgenang wutez i mantika sumaup a mémoipantika im puuna. Niitumo, niana péléng én isaupkupé'ma im wia'i, pahpaan niitu é lé'os i mangun um pa'émanen niou zéi'kan ikalulu.

² Mile-ilek im wia sé tou sé wangun im pahkuan asu. Mile-ilek im wia sé tou mahpaayang a léwo'an. Mile-ilek im wia sé tou sé mahtututu' i sumunat ni kamu mengiit un ukum Torat.

³ Ni kitamo sé tou sinunat sé mahongkot wo mahsigi' si Opo Empung mengiité si Roh-Na. Ni kita é mahpaa-paaz pahpaan totoz pa'émanenta um winanguna ni Kristus Yesus wia ni kita, i ni Sia nimaté i mangun ni kita maéndo ulit witu u sinaru ni Opo Empung, zéi'kan niméré' uman wana am winangun né tou witu un awak néra im pahsunaten.

⁴ Im wia ni aku kangkasii ém wéwéhan un toro ipahloo-looz tumoro an toro wangunengku in tou. Sa wéwéhan tou walina mahlooz tumoro um winangun ni tou witu un awakna pahpaan mahkiit un ukum Torat, ni aku kangkasii ém wéwéhan un toro pahloo-loozku lumousé ni sia.

⁵ Ni aku é sinunat in taré waluna endo i méitoumé, ni aku én tou Israel, wia sé suzu ni Benyamin a méyé. Ni aku én uli-ulit tou Ibrani. Ni aku kangkasii én esaané wia sé sana réwok tou Farisi, sé sana réwok tou Farisi itii én uli-ulit mahtali-talinga un ukum Torat.

⁶ Tumoro um wuaya im pahwangunengku, ni aku ém mahzézéha sé tou ma'éman si Yesus Kristus, wo tumoro ung kaulitan pahwangunengku, ni aku én uli-ulit mahkiit un ukum Torat, niitumo zéi'kan siapa tou si toro mapahsasala' ni aku.

⁷ Taan péléng am pahgenangengkula im puuna mahwéhémé kauntungan wia ni aku, in tarékan pahgenangengkula zéi'kan mahwéhémé ung kauntungan wia ni aku pahpaan ni aku é ma'émano si Kristus.

⁸ Zéi'kan uman niitu, pahpaan in tarékan kata'uangkumo u lumouspé'mé ung kawangunan am walina i ni aku mata'umo si Kristus Yesus, si Mahpiaraku. Pahpaan ni aku mata'umo si Kristus, niitumo péléng am puuna pahgenangengkula ém wéwéhan torona wo mahalimé ung kauntungan wia ni aku witu u sinaru ni Opo Empung é méitula'ukumola. Péléng a mahalimé ung kauntungan wia ni aku im puuna ém pahgenangengkula i rimberek wo ni aku toro makailek si Kristus.

⁹ Pahpaan ni aku ma'éman wo nimaesamo karia ni Kristus, ni aku é niéndo ulit witu u sinaru ni Opo Empung. Ni aku niéndo ulit witu u sinaru ni Opo Empung zéi'kan pahpaan i mahkiit un ukum Torat taan pahpaan ma'éman wia si Kristus. Niitumo, si Opo Empung nimangun ni aku maéndo ulit witu u sinaru-Na pahpaan ni aku ma'éman si Kristus.

¹⁰ Un totoz kapaazku é mata'u si Yesus Kristus wo kasii totoz im paaz i mata'u ung kawasa un timou sumaup ni Sia im wia sé nimaté. Ni aku kangkasii é nimimeko un touku i mazézéha, tanu ni Sia i nimazézéha, wo nimimeko un touku i maté, tanu ni Sia i nimayo un touna i nimaté.

¹¹ Sa niitu péléng toro kailekangkuma, un totoz im pengalé-ngaléiengku sa ni aku matéma, ni aku kangkasii ém wangun in itou sumaup im wia sé nimaté.

Mahkiitla an tutuzu' mémoituzu' ni Opo Empung

¹² Ni aku én zéi'kan kumuama i ni aku é nimakaileko péléng an taré ikuakuma wia ni kamu. Ni aku kasii én zéi'kan kumuama i ni aku én zéi'mo siapa um pahséro'an. Taan ni aku é mahtututu' i mahtata'u si Kristus, ung kawasa-Na wo mahkiit ni Sia karia an zézéha makaz ni Sia i nimaté. Ni aku kasii ém paaz i makailek péléng ang kapaaz ni Kristus Yesus pahpaan ni Sia é niméléngo ni aku i maéndo anu-Na.

¹³ Katuari-katuari, ni aku én zéi'kan mahgenangla i niana éng kinailekangkumo, taan um pahwangunengku éng kenu: Péléng am pinahmualikumé im puuna é liniuzkumola wo ni aku é mahtututu' i maayo a sinarukumo.

¹⁴ Ni aku én tanu mahkara' i maayo um papatoroan i makailek ung kukulu, niitu ung katou-touan witi kasendukan. Pahpaan, niitumo ung kalakoan ni kita in tinawah ni Opo Empung mengiité si Kristus Yesus.

¹⁵ Niitumo, ni kita sé lutu'mo um pa'émanen wia si Yesus é léwo'zéi' i mahgenangla un téntu. Taan sa wéwéhan sé gimenang walina, si Opo Empung é sumawang ni kamu i mata'u niana.

¹⁶ Un totoz ipahpuu-puuna, ung katou-touanta é mahkiitla an tutuzu' ulit mémoituzu' ni Opo Empung makaz in tarékan.

¹⁷ Katuari-katuari, kéréala am pahwangunengku wo pahwéhanla genang sé menou-nou tanu ni kai sé tou toro maéndo kékéréan niou.

¹⁸ Pahpaan, tanu u méipengua-nguakumo wia ni kamu wo ikuaku kasiima in tarékan karia i mahamé', i lakez sé tou sé mengua-ngua i ni séra é mahkii-kiit si Yesus Kristus, taan ung katou-touan néra un zéi'kan ulit é nimatamburian karia um winanguna ni Kristus i ni Sia sinalip.

¹⁹ Ing kamurian sé tou téntu é maléwo'en pahpaan zéi'kan memandung si Opo Empung taan memandung uman um poot néra in esa. Ni séra mahlooz am pahwangunen néra zozo' am pahwangunen néra itii é makaizangen wo am pegena-genangen néra ém wia uman ung kaayahan kenu.

²⁰ Ni kita é méikarékéno in tou ni Opo Empung si witi kasendukan. Karia in téntu, in tarékan ni kita é ma'ento' si Yesus Kristus i mawurimé sumaup im witi kasendukan, ni Sia si nimiloto ni kita im witu un ukuman wana a singkéla'.

²¹ Un awakta un toro maléwo' kenu é mawerun ni Kristus wo lamasuat karia un awak-Na um pahloozen wo pahsigi'en. Ni Sia é mangun niitu mengiité ung kawasa-Na un toro kumala péléng am péléng.