Filipi 1 - Taaz Weru Witu u Nunuwu'en Tombulu

U sigi'

¹ Um pinantik kenu ém wia ni aku Paulus wo si Timotius a mangé. Ni kai én ata ni Kristus Yesus. Um pinantik kenu én iwéhé wia sé tou linenas ni Opo Empung pahpaan nimaesa karia ni Kristus Yesus sé witi Filipi wo wia sé tonaas né jamaat wo wia sé diaken.

² Mengalé-ngaléi uman ung kamang tatambér wo ung kaluasan witu un até, um wia si Opo Empung, si Ama'ta wo wia si Yesus Kristus Mahpiara é menaté-natér ni kamu.

Um pengaléien ni Paulus

³ Sekez aku ikagenanga ni kamu, ni aku éng kumua u makasé wia si Opo Empungku.

⁴ Wo sekez ni aku i mengaléi tumoro ni kamu péléng, ni aku én totoz mahpaa-paaz.

⁵ Ni aku éng kumua u makasé wia si Opo Empung pahpaan ni kamu simawango ni aku i mahwoka' u Nuwu' Lé'os tumoro si Yesus, rengané in endo ni kamu in taré ma'émanla si Mahpiara makaz in tarékan.

⁶ Totoz kata'uangku, si Opo Empung si timo'tol um paayangen wangun kenu witu un até niou é masumampet um paayangen itii makaz witu un endo si Kristus Yesus i mawurimé sumaup.

⁷ Ni aku é mapaayo u makasé wia si Opo Empung pahpaan ni kamu ém witu un atéku. Ni aku é nimakailek ung kamang méitambér ni Opo Empung zozo' in tarékan ni aku ém binuipé'. Ni aku kangkasii é nimakailek ung kamang méitambér ni Opo Empung i mahtuzu' sa u Nuwu' Lé'os tumoro si Yesus én ulit, wia sé tou sé mahkua niitu in zéi'kan ulit, wo kasii i mangun ni séra in uli-ulit ma'éman. Ni kamu kangkasii é nimakailek ung kamang méitambér ni Opo Empung tanu ung kinailekangkumé.

⁸ Pahpaan si Opo Empung si totoz mata'u, i ni aku é lumelo ni kamu péléng. Ni aku é rumaraaté ni kamu péléng tanu u raraatéan ni Kristus Yesus wia ni kamu.

⁹ Ung kenumo um pengaléiengku wia si Opo Empung tumoro ni kamu, mengalé-ngaléi uman u raraatéan niou wia sé tou walina éng kalakezna wo ung kata'uan karia ung katulapan niou é malake-lakez im wana am péléng.

¹⁰ Karia in téntu ni kamu én toro méléng wisa am wangun, wo ung katou-touan niou ém weresi wo zéi'kan siapa sinala' im witu un endo si Kristus i mawurimé sumaup.

¹¹ Ni aku kasii é mengaléi wo kamu toro memangu-mangun an ulit. Si Yesus Kristus uman si toro mangun ni kamu mangun niitu i mahsigi' wo mahlooz si Opo Empung.

Menou-nou wia si Kristus

¹² Katuari-katuari, kapaazku ing kata'uan nioula u nimamuali wia ni aku é nimangun sé tou lakez timalingama u Nuwu' Lé'os tumoro si Yesus wo nimangun ni séra ma'éman niitu.

¹³ Niitumo, péléng sé suraro mahtéiz witi istana ni Kaisar wo sé tou walina é nimata'umoma, i ni aku ém binui pahpaan mahkiit si Yesus Kristus.

¹⁴ Wo pahpaan ni aku im binui, nimangun lakez sé katuari esa pa'émanen éng kaenté'namo um pa'émanen néra wo kawuayana wo zéi'mo maindé' i mahwoka' u Nuwu' ni Opo Empung.

¹⁵ Wéwéhan sé mahwoka' tumoro si Kristus pahpaan ni séra é mahtéutéu wo mahéndo-éndoan kariaku. Taan wéwéhan sé mahwoka' tumoro si Kristus ém wangun ung kalakoana.

¹⁶ Ni séra é mahwoka' tumoro si Kristus pahpaan u raraatéan néra. Pahpaan kata'uan néra i ni aku ém binui pahpaan i mahtuzu' u Nuwu' Lé'os tumoro si Kristus wia sé mahkua u Nuwu' Lé'os tumoro si Kristus itii in zéi'kan ulit, wo séra uli-ulit ma'éman.

¹⁷ Taan sé mahtéutéu wo mahéndo-éndoan kariaku é mahwoka' tumoro si Kristus pahpaan i ma'éndo uman ung kauntungan néra in esa wo ung kalakoan an tutuzu' néra én zéi'kan wangun. Pahgenangen nérala, karia séra i mahwoka'ma tumoro si Kristus pahpaan uman i menéro ung kauntungan néra in esa, nimangun ni aku kalousna in zézéha wia um bui wo un atéku kalousna i masusa.

¹⁸ Taan iwayamola téntu, pahpaan zozo' ung kalakoana im wangun kaapa zéi'kan, si Kristus é méiwoka'moma. Tumoro niitu, ni aku é mahpaa-paaz wo zéi'kan kumana' i mahpaa-paaz.

¹⁹ Totoz ing kata'uangku, ing kamurian ni aku én iondol im wia um bui pahpaan am pengaléien niou wo karia un tutulung ni Roh ni Yesus Kristus.

²⁰ Un totoz pelelo-lelongku wo um pahéré'engkula i ni aku én zéi'kan ipapaiza-izang im wana péléng am pahwangunengku i menou-nou. Ni aku én totoz ma'éman wo wuaya i mahnuwu' tanu im puuna, téntu kangkasii in tarékan, im wana péléng am pahwangunengku, zozo' ni aku i menou-noupé' kaapa i nimatémo, si Yesus Kristus ém pahloozen wo pahsigi'en.

²¹ Pahpaan sa ni aku, ung katou-touan ém wia uman si Kristus wo sa aku matéma niitu éng kauntungan.

²² Taan sa aku léwo'zéi' i menou-nou wia ung kaayahan kenu, ni aku én toro maayang am paayangen wéwéhan torona. Niitumo, zéi'kan kata'uangku wisa um péléngengku.

²³ Ni aku ém wutez i méléng, taan tawimo ni aku matéma wo mamento' mahwali-wali karia ni Kristus.

²⁴ Taan pahgenangengkula, sa ni aku urépé' i menou-nou wia ung kaayahan kenu, niitupé' um wéwéhan torona i sumawang tumuzu' ni kamu.

²⁵ Tumoro ung kenu én totoz ing kata'uangku: I ni aku é memia-mia wo mamemali-mali karia niou péléng i sumawang ni kamu, wo kamu kaenté'na wo mahpaa-paaz witu um pa'émanen niou.

²⁶ Wo sa ni aku mawurimé sumaup wia ni kamu, kalousna ni kamu i mahlooz si Kristus Yesus pahpaan ni kamu nimileko um winangun-Na wia ni aku.

U sésésa i mahesa-esaan

²⁷ Un totoz ipahpuu-puuna in tarékan, pahpaan ni kamu é ma'émano wia si Kristus, ung katou-touan niou é léwo'zéi' i masuat karia an tutuzu' ni Kristus mengiit u Nuwu' Lé'os tumoro ni Sia. Karia in téntu sa aku mangémé, ni aku én toro mileké, kaapa sa aku zéi'kan mangémé wia ni kamu, ni aku én tumalinga i ni kamu én esa genang, nimaesaan i mahtututu' mahwoka' u Nuwu' Lé'os tumoro si Kristus, enté' um pa'émanen, wo ni kamu mahwali-wali i mahtututu' mahwoka' u Nuwu' Lé'os tumoro si Yesus Kristus wia sé tou wo séra toro ma'éman.

²⁸ Niitumo, ni kamu én tia' maindé' wia sé kakoro' niou. Karia séra i nimilekla ni kamu in zéi'kan maindé', niitu tumuzumé i ni séra é maléwo'en ni Opo Empung, wo im wia ni kamu, niitu én tumuzu'mé i ni kamu én ipilot ni Opo Empung im witu un ukuman wana a singkéla'.

²⁹ Pahpaan, ni kamu én tinambéran ung kamang zéi'kan uman i ma'éman si Kristus, taan ni kamu kasii én tinambéran ung kamang i mazéha pahpaan ma'éman ni Sia.

³⁰ Ni kamu é nimileko ni aku i nimazézéha rengan im puuna wo makaz in tarékan ni kamu é mahtalingapé'ma i ni aku é nimazézéhapé'. Ni aku é nimazézéha pahpaan i mahtututu' mahwoka' u Nuwu' Lé'os tumoro si Kristus. Téntu kangkasii, ni kamu é mahtututu' i mahwoka' u Nuwu' Lé'os tumoro si Kristus, niitumo ni kamu kangkasii é nimazézéha tanu an zézéha pahpendanengku.