Filemon 1 - Taaz Weru Witu u Nunuwu'en Tombulu

U sigi'

¹ Um pinantik kenu ém wia ni aku Paulus wo si Timotius si katuarita esa pa'émanen a mangé. Ni aku ém binui pahpaan si Kristus Yesus. Um pinantik kenu én iwéhé wia si Filemon si ikararaaté nai, kapaayang nai

² wo wia si Apfia katuarita wéwéné esa pa'émanen wo wia si Arkhipus, si kakaria i mahpaayang wia si Kristus wo wia sé jamaat nimaréwok i meraragés wia si Opo Empung witi walému.

³ Mengalé-ngaléi uman ung kamang tatambér wo ung kaluasan witu un até, um wia si Opo Empung Ama'ta wo um wia si Yesus Kristus Mahpiara é menaté-natér ni kamu.

Si Paulus mapaayo u makasé

⁴ Ni aku mapaayo u makasé wia si Opo Empungku pahpaan, sekez ni aku i mengaléi, ni aku ikagenanga wia ni ko.

⁵ Tinalinga- kumo tumoro u raraatéannu wia sé tou ni Opo Empung wo um pa'émanennu wia si Yesus Mahpiara un totoz enté'.

⁶ Ni aku mengaléi, mengalé-ngaléi uman um pahtuarianta in tou ma'éman kenu é mangun ung kata'uanta tumoro péléng am wangun éng kalousna pahpaan nimaesa karia ni Kristus.

⁷ Filemon katuariku, u raraatéannu é nimangun ni aku mahpaa-paaz wo nimenté' un atéku pahpaan un até né tou ni Opo Empung ém winangunmumola mahpaa-paaz.

Um pahaléien ni Paulus wia si Filemon

⁸ Pahpaano niitu, ni aku in tou nimaesamo karia ni Kristus én toro uman i meréntama wia ni ko u léwo'zéi' im wangunennu,

⁹ taan pahpaan i mahgenanga u raraatéannu itii, ni aku é mahaléi uman im wia ni ko. Ni aku én tu'amo wo in tarékan ni aku ém wiapé' um bui pahpaan i mahwoka' tumoro si Kristus Yesus wia sé tou.

¹⁰ Ni aku, Paulus, mahaléi wia ni ko tumoro si oki'ku esa pa'émanen, si Onesimus si atamu. Pahpaan ni aku é nimaéndomola ama'na im wia um bui.

¹¹ Im puuna, si Onesimus si atamu én timingkasé im wia ni ko, ni sia én zéi'kan siapa torona im wia ni ko, taan in tarékan ni sia én totoz wéwéhano torona, zéi'kan uman wia ni ko taan kangkasii wia ni aku.

¹² In tarékan méiatukuma si oki'ku si ikararaatéku itii i mawurima wia ni ko.

¹³ Un ulitna kapaazku ni sia é mahwia-wia sumawel ni ko, i sumawang ni aku im wiapé' um bui pahpaan mahwoka' u Nuwu' Lé'os tumoro si Yesus wia sé tou.

¹⁴ Taan ni aku é soopé' mangun niitu sa zéi'kampé' niénéannumé. Ni aku é soo lumusu ni ko; kapaazku niitu ém wangunennu karia um paazmu in esa.

¹⁵ Niitu woo ung kalakoan ni sia im pinatampasé kariamu zozo' in zéi'kan uré, wo sia maéndo anumu makaz ing kauré-uré.

¹⁶ In tarékan ni sia én zéi'kan uman ata im wia ni ko, taan ni sia é lumouspé'mé in ata. Ni sia éng katuari esa pa'émanen si totoz pahraa-raaté. Im wia ni aku, ni sia én totoz lakez un torona, woopé' kasii im wia ni ko! Tantumo ni sia én totoz wéwéhan torona, ni sia in ata kaapa ing katuari esa pa'émanen wia si Mahpiara.

¹⁷ Sa ko mahgenangla ni aku ing katuarimu esa pa'émanen, sungkulela si Onesimus tanu ni ko i sumungkul ni aku.

¹⁸ Sa sia simala'mola wia ni ko kaapa nimutang wia ni ko, sa'umo ni akumokan si maér niana péléng.

¹⁹ Ni aku kenu ém Paulus, niia ém pinantik karia u lengenku in esa, “Ni akumokan si maér niana péléng.” Ni aku én zéi'mo totoz mapagenanga wia ni ko, i ni ko ém wéwéhan u niutang wia ni aku. Un utangmu én toumu in esa si tinuzu'angku u Nuwu' Lé'os tumoro si Yesus, a ni ko ma'éman.

²⁰ O katuariku, mengalé-ngaléi uman ni ko ém wéwéhan torona im wia ni aku pahpaan nimaesa karia ni Mahpiara; wangunené un atéku mahpaa-paaz im wia si Kristus.

²¹ Ni aku nimantik um pinantik kenu pahpaan totoz kata'uangku i ni ko é mangun um pahaléiengku. Totoz ing kata'uangku um wangunennu é lumouspé'mé niitu.

²² Karegas niitu, pahaléiengku, imekempé' ndootuula un tekelangku witi walému, pahpaan ni aku mahéré'la ing kiitané ni Opo Empung am pengaléien niou wo ni aku toro mawurima sumaup wia ni kamu.

U sigi' kamurian

²³ Si Epafras, si kakariaku im binui pahpaan si Kristus Yesus é mapaayoma u sigi'na wia ni ko.

²⁴ Si Markus, si Aristarkhus, si Demas wo si Lukas sé kakaria kapaayangku kasii é mapaayoma u sigi' néra wia ni ko.

²⁵ Mengalé-ngaléi uman ung kamang tatambér ni Yesus Kristus Mahpiara é menaté-natér ni kamu!