Efesus 6 - Taaz Weru Witu u Nunuwu'en Tombulu

Sésésa wia sé koki' wo sé tu'a

¹ É koki', ni kamu sé nimaesamo karia ni Mahpiara én totoz mahtali-talingala wia sé tu'a niou, pahpaan niitu én ulit wo niitu u léwo'zéi' im wangunen niou.

² “Sigi'ela si ama'mu wo si ina'mu.” Im wana am perénta ni Opo Empung, ung kenu um perénta kataré-taré ung kinariaan un taaz,

³ un taaz itii é, “Wo ni kamu ikalé'os wo pakatu'an im wia ung kaayahan.”

⁴ Im wia ni kamu sé ama', tia'mo kamu mangun un até né oki' niou maupi', taan tuzu'ela séra karia an tutuzu' wo a sésésa ni Mahpiara.

Sésésa wia si ata wo si tuang

⁵ É ata, ni kamu é mahtali-talingala wia sé tuang niou sé wia ung kaayahan. Ni kamu in ata én uli-ulit i maindé', mahtali-talinga wo mahsigi' sé tuang niou tanu ni kamu in uli-ulit mahtali-talinga wo mahsigi' si Kristus.

⁶ Tia' kamu mahtali-talinga wo mahsigi' sé tuang im witu u sinaru néra i mangun uman sé tou mahpaa-paaz, taan ni kamu in ata ni Kristus én uli-ulit mahwangunla ang kapaaz ni Opo Empung.

⁷ Um pahpaayangen niou in ata ém paayangela karia i mahpaa-paaz tanumokan i mahwangun a méipekipaayang ni Mahpiara wo zéi'kan méipekipaayang ni tou.

⁸ Kata'uan niouo im péléng sé tou, sia in ata kaapa zéi'kan ata sa sia nimangun a lé'os é makailek um wawaér um wia si Mahpiara a méyé.

⁹ Wo wia ni kamu sé tuang, mahwangunla kangkasii a lé'os tanu niitu wia sé ata wo tia' mahiindé' ni séra karia an ukuman. Gena-genangen, si Mahpiara né tuang wo si Mahpiara né ata, si witi kasendukan, ni Sia én zéi'kan mahsanaweka.

Um pahpakén i makumoro' u méiwéhémé ni Opo Empung

¹⁰ Ing kamurian, enté'ela un até niou karia ung kaenté'an ung kawasa méiwéhémé ni Mahpiara pahpaan nimaesa karia-Na.

¹¹ Tanu sé suraro nimaké am pemamakén ing kumoro' i sumaru sé kakoro' néra, téntu kangkasii ni kamu é léwo'zéi' i maké péléng ang kakaraien ing kumoro' a méiwéhémé ni Opo Empung wo kamu makawawa i mahsaru ang genang léwo' ni tonaas né sétang.

¹² Pahpaan ni kita i mahkoro' én zéi'kan mahsaru sé tou, taan mahsaru sé pa'opoen léwo' mahperénta wia ung kaayahan wo péléng ang kawasa a mahperénta sé roh léwo' itii. Ni kita kasii é mahkoro' mahsaru ang kawasa wana ang karimbengbengan im wia ung kaayahan kenu wo sé roh léwo' witi langit.

¹³ Niitumo, pakapakéla ang karai pemamakén i makumoro' a méiwéhémé ni Opo Empung, wo kamu makawawa i mahsaru sé kakoro' in endo a léwo'an i mamuali, wo i simampetoma um pahkoro'an itii, ni kamu én enté'pé'.

¹⁴ Niitumo, rumendaila menté-enté'. Pakéla ung kaulitan ni Opo Empung maéndo tanu un embetmu u nimangun ni ko nimimeko i makumoro'. Wo pakéla un zéi'kan mahsanaweka maéndo tanu ung karai uaséi u méikelung im pahsaruné né kakoro'.

¹⁵ Wo pakéla um paazmu i mahwoka' u Nuwu' Lé'os tanu ni ko i simapatumo. Niitu é Nuwu' Lé'os i mahlé'o-lé'osan karia ni Opo Empung u méiwéhémé karia ung kawasa-Na.

¹⁶ Pakéla um pa'émanennu sekez in endo tanu ung kelung, pahpaan karia ung kelung itii ni ko én toro maté un api witu um pana mahapi u méiwéhémé ni tonaas né sétang.

¹⁷ Si Opo Empung nimiloto ni kamu im witu un ukuman wana a singkéla', niitu én tanu ni kamu niméndo um porong uaséi méiwéhémé ni Opo Empung ing kumelung un ulu niou. Wo pakéla u Nuwu' ni Opo Empung tanu um pisou méiwéhémé ni Roh ni Opo Empung u nimangun ni kamu nimimeko i sumaru sé kakoro'.

¹⁸ Wangunenola niana péléng karia i mengaléi wia si Opo Empung i sumawang ni kamu. Mengaléila karia ung kawasa ni Roh Lenas sekez in endo, tuméga-tégam wo tia' mahkana' i mengaléi. Tuméga-tégam i mengaléi wo tia'mo mazéi' i mahpengaléi sé tou linenas ni Opo Empung.

¹⁹ Ipengaléipé' kasiimé ni aku wo ni aku i mahnuwu' wia sé tou, si Opo Empung é mahwéhémé u nunuwu'en ulit wia ni aku, wo zéi'kan maindé' i mahwoka' u Nuwu' Lé'os tumoro si Yesus a méikawunipé' im wia ni séra.

²⁰ Pahpaan ni aku nimaéndo aatu ni Opo Empung i mahwoka' u Nuwu' Lé'os tumoro si Yesus, niitumo in tarékan ni aku é méiuntep bui. Ipengaléipé'mé wo ni aku zéi'kan maindé' i mahwoka' u Nuwu' Lé'os, un uli-ulit masuat karia u léwo'zéi' in iwoka'ku.

U sigi' kamurian ni Paulus

²¹ Si Tikhikus, katuarita esa pa'émanen si ikararaaté nai wo si ma'ulit i mahpaayang wia si Opo Empung é makumua péléng niitu wia ni kamu wo ni kamu toro mata'u kura ni aku in tarékan wo apa um pahwangunengku in tarékan.

²² Si Tikhikus méiatukuma mangé wia ni kamu péléng i makumua tumoro a mahmuali wia ni kai wo sia toro menté' un até niou.

²³ Mengalé-ngaléi uman si Opo Empung si Ama' wo si Yesus Kristus Mahpiara é menaté-natéré ni kamu péléng wo ni kamu mahlé'o-lé'osan wo mahraa-raatéan wo zéi'kan mazéi' i ma'éman wia si Kristus.

²⁴ Ung kamang tatambér ni Opo Empung é menaté-natér ni kamu péléng sé zéi'kan mazéi' i rumaraaté si Yesus Kristus Mahpiarata.