Efesus 5 - Taaz Weru Witu u Nunuwu'en Tombulu

Menou-nou karia i mahraa-raatéan

¹ Niitumo, ni kamu in oki' ni Opo Empung sé totoz ikararaaté-Na, ung katou-touan niou é mahkéréla wia si Opo Empung

² wo menou-noula karia i mahraa-raatéan tanu si Kristus Yesus rimaraatémo ni kamu. Ni Sia nimayomo un tou-Na wia ni kita, nimaté witu u salip i maéndo tanu u raragés wo sé tatamun kineriz in ipahragés a mahwou tariis, u nimangun un até ni Opo Empung mahpaa-paaz.

³ Taan a samek wo a memua-muali a sinéro' im pahmualin né zéi'kampé' kimawéng, kaapa a malo'it, zozo' niitu in inuwu' uman én tia' im wia ni kamu. An téntu é sinéro' in ipahkua né tou linenas ni Opo Empung.

⁴ Téntu kangkasii ang kukuan saparuni, an zéi'kan siapa torona kaapa an uuwaken zéi'kan mata'u un adat, pahpaan an téntu én zéi'kan wangun. Taan tawimo ni kamu kumuala u makasé wia si Opo Empung.

⁵ Pahpaan, totoz im pahwéhanla genang ang kenu: Sé tou samek, sé memua-muali a sinéro' im pahmualin né zéi'kampé' kimawéng, kaapa malo'it, ni séra é masuatokan i mahongkot wia sé opo-opo, sé tou téntu én zéi'kan siapa si maéndo tou ni Kristus wo tou witi Kakolanoan ni Opo Empung.

⁶ Tia' kamu towoan né tou karia a nunuwu'en zéi'kan siapa torona, pahpaan an téntu é mangun uman si Opo Empung in totoz maupi' wia sé tou zéi'kan mahtali-talinga ni Sia.

⁷ Niitumo, tia' kamu mahkari-karia i mahwangun am pahwangunen néra.

⁸ Im puuna ni kamu én zéi'kan mahkiit um paaz ni Opo Empung, ni kamu én tanu menou-nou witu ung karimbengbengan. Taan in tarékan, ni kamu é nimaesamo karia ni Opo Empung, niitumo ni kamu é menou-noula witu un ayah.

⁹ Pahpaan si tou menou-nou witu un ayah é mahwua'mé ang kawangunan, zéi'kan mahsanaweka wo ulit.

¹⁰ Mahtututu'la i mahtata'u um paaz ni Opo Empung.

¹¹ Tia' mahwangun an zéi'kan siapa torona tanu am pahwangunen né tou menou-nou wana ang karimbengbengan, taan tawimo ikua nioula wia ni séra sa am pahwangunen néra itii é simala'.

¹² Pahpaan, zozo' in inuwu' umana am pahwangunen néra an ipahwuni-wuni itii éng kaizangnokané.

¹³ Taan sa kuantama am pahwangunen néra ipahwuni-wuni itii é simala' wo ni séra toro mata'u am pahwangunen néra é simala', un téntu én tanumokan i mahalima u solo i sumena' witu ung karimbengbengan.

¹⁴ Niitumo wéwéhan u méikua, “Tumoozomé, é ni ko si timekel, mawongkémomé im wia sé nimaté wo si Kristus maéndo sena' witu ung katou-touannu.”

¹⁵ Niitumo, gena-genangen ung katou-touan niou, tia'mo ung katou-touan niou tanu sé tou lemou sé zéi'kan siapa kata'uan tumoro um paaz ni Opo Empung, taan menou-noula tanu sé tou tulap sé mata'umo um paaz ni Opo Empung.

¹⁶ Pakéla lumé'o-lé'os un témpo niou pahpaan an endo in tarékan é lakez sé tou mahwangun a léwo'an.

¹⁷ Pahpaano niitu, tia'mo kamu mahwangun tanu am pahwangunen né tou lemou, taan pahtata'ula um paaz ni Opo Empung.

¹⁸ Tia'mo kamu matewelen pahpaan un anggor, pahpaan niitu é luméwo' uman ung katou-touan niou. Taan, tawimo ni kamu kinawasa ni Roh ni Opo Empung.

¹⁹ Mahkuala si esa im wia sé walina karia a mazmur wo ang kakantaren lolooz wo karia ang kakantaren walina wia si Opo Empung. Kumantarla karia un até mahpaa-paaz i lumooz si Opo Empung.

²⁰ Apa uman u nimamuali wia ni kamu sekezé é mapaayola u makasé wia si Opo Empung si Ama'ta witu u ngaran ni Yesus Kristus Mahpiarata.

A sésésa wia sé sana séndé'

²¹ Irorosla un toumu wia si esa wo si esa pahpaan ni kamu mahsigi' si Kristus.

²² Ni ko im wéwéné makamahayo é mahtali-talingala wia si mahayomu tanu ni ko i mahtali-talinga si Mahpiara.

²³ Pahpaan si mahayo én tonaas ni wéwéné makamahayo masuat wo si mahayo én ulu ni wéwéné makamahayo, téntu kangkasii si Kristus én tanu ulu né jamaat, sé jamaat én tanu awak-Na. Ni Siamo si nimilot sé jamaat im witu un ukuman wana a singkéla'.

²⁴ Niitumo, kuramo sé jamaat i mahtali-talinga wia si Kristus, téntumo si wéwéné makamahayo i mahtali-talinga wia si mahayona im wana am péléng.

²⁵ É tuama makamahayo, iraraatéla si mahayomu tanu si Kristus i rimaraatémola sé jamaat wo nimayomola un tou-Na wia sé jamaat itii.

²⁶ Ni Sia nimanguna un téntu, wo Sia toro lumenas sé jamaat-Na, meresi sé jamaat-Na karia un zano pahsarani wo karia u Nuwu' ni Opo Empung.

²⁷ Karia in téntu ni Sia nimangun sé jamaat-Na toro rumendai karia in totoz wangun witu u sinaru-Na, in anu-Na sé linenas ni Opo Empung wo zéi'kan siapa sinala' zozo' in esa.

²⁸ Téntu kangkasii si mahayo é léwo'zéi' i rumaraaté si wéwéné mahayona tanu ni sia i rumaraaté un awakna in esa. Si tou rumaraaté si wéwéné mahayona ni sia kangkasii é rumaraaté un touna in esa.

²⁹ Pahpaan, zéi'kan kawisa si tou mazi'zis un awakna in esa, taan tantumo ni sia é miara wo murus un awakna tanu si Kristus nimiara wo nimurus sé jamaat-Na.

³⁰ Ni Sia nimiara wo nimurus ni kita pahpaan ni kita é méikauntep awak-Na.

³¹ Witu um Pinantik Lenas é méipantik in téntii, “Niitumo si tuama én tumula'u si ama'na wo si ina'na wo maesa karia ni mahayona wo ni séra zua é maéndomokana esa awak.”

³² Un tutuzu' taré ikuakuma itii ung kalakoana én totoz susa im pahtata'un né tou, taan ung kalakoan u méikua-Kuma én tumoro um pinasungkulan ni Kristus karia né jamaat-Na.

³³ Taan ung kenu kangkasii én tumoro ni kamu sé sana séndé'mo: Iraraatéla si wéwéné mahayomu tanu ni ko i rumaraaté un toumu in esa, wo wia si wéwéné makamahayo, pahsigi'ela si mahayomu.