3 Yohanes 1 - Taaz Weru Witu u Nunuwu'en Tombulu

Menou-nou mahkiit an tutuzu' kaulitan

¹ Um pinantik kenu ém wia ni aku, si penatua, iwéhé wia si Gayus si uli-ulit ikararaatéku witu ung kaulitan.

² Katuariku si ikararaatéku, ni aku é mengaléi, mengalé-ngaléi ni ko é lé'o-lé'os uman im wana am péléng, tanu si rohmu i lé'o-lé'os uman.

³ Ni aku én totoz mahpaa-paaz im wéwéhan sé katuari niméyé a mahkua tumoro ung katou-touannu i mahkiit ung kaulitan. Pahpaan totoz ulit, ung katou-touannu é mahkiit an tutuzu' kaulitan ni Opo Empung.

⁴ Zéi'kan siapa u mahpaa-paaz lumousé u mahpaa-paazku, in timalingala i sé oki'ku é menou-nou mahkiit an tutuzu' kaulitan.

Si Gayus ém pahloozen pahpaan am pinaayangna

⁵ Katuari ikararaatéku, im wana péléng am pahwangunennu wia sé katuari esa pa'émanen, ni ko é nimahwangunola tanu am pahwangunen né tou ma'éman, zozo' ni séra én tou limepuh umané.

⁶ Ni séra é nimahkuamola a niilek néramé tumoro u raraatéannu witu u saru-sarun né jamaat wia'i. Totoz wangun am pahwangunennu sa ko sumawangla ni séra im wana am pemandungen néra i lumampang. Karia in téntu, ni ko é nimangunola si Opo Empung mahpaa-paaz.

⁷ Pahpaan u ngaran-Na ni séra nimangé i mahtuzu' an tutuzu' tumoro si Yesus Kristus, zozo' in zéi'kan siapa am pahkailekané im wia sé tou zéi'kampé' mata'u si Opo Empung.

⁸ Ni kita é léwo'zéi' i mahsungkul sé tou téntu, wo kita toro maéndo kapaayang néra i mahwoka' ung kaulitan.

Diotrefes si mahwangun a rikoka'

⁹ Wéwéhano u méipantikkuma wo méiwéhéma wia sé jamaat, taan si Diotrefes si paaz maéndo tonaas néra é soo mahtalinga ni aku.

¹⁰ Pahpaan niitumo, sa aku mangé wana, pahaléiengku, péléng am pinahwangunnama ém pahwéhanla genang. Pahpaan an ipahkuana én zéi'kan ulit wo wayaan uman ung kanuwu'an tumoro ni kai. Ni sia én zéi'kan uman soo mahsungkul sé katuari esa pa'émanen sé mahéyé, taan pahséro'enna kasii sé jamaat mahsungkul ni séra, wo sa wéwéhan sé jamaat mahsungkul sé katuari esa pa'émanen sé mahéyé, sé simungkula itii én ipahondolnamé im wia sé jamaat.

Si Demetrius mahwangun a makapaazen

¹¹ Katuari ikararaatéku. Tia' mahkéré a léwo', taan mahkéréla a lé'os. Séi si mahwangun a lé'os, ni sia ém wia si Opo Empung a méyé. Taan séi si mahwangun a léwo', ni sia én zéi'kampé' mata'u si Opo Empung.

¹² Péléng sé tou é nimilek wo mahkua am wangun tumoro si Demetrius, um pahwangunenna é mahkiit ung kaulitan. Ni kai kangkasii é nimilek am wangun tumoro ni sia wo kata'uannu an ipahkua nai én ulit.

Ung kamurian

¹³ Lakezpé' a léwo'zéi' in ikuakuma wia ni ko, taan ni aku é soo sa niitu ipantik umana.

¹⁴ Ni aku é mahéré'la i rewek mahilekan kariamu wo sumirita nimasaruan.

¹⁵ Ung kaluasan witu un até é menaté-natér ni ko! Sé kakariamu é mapaayoma u sigi' néra wia ni ko. Ipapaayopé'la u sigi'ku wia si esa wo si esa sé kakariaku.