2 Timutius 2 - Taaz Weru Witu u Nunuwu'en Tombulu

Ezen zozo' in zézéha

¹ Timotius oki'ku, enté'ela um pa'émanennu karia ung kamang méitambér pahpaan nimaesa karia ni Kristus Yesus.

² An tinalingamumo wia ni aku witu u saru-sarun né tou lakez, itarawésala wia sé tou toro tarawésaan niitu, sé siga' kangkasii i mahtuzu' sé tou walina.

³ Ni ko é léwo'zéi' i mazézéha tanu si suraro ni Kristus Yesus si mahtali-talinga wia ni Sia.

⁴ Si suraro karegas i mahpaayang én zéi'kan megena-genang am pemandungenna walina. Karia in téntu ni sia éng kapaaz ni tonaasna.

⁵ Si tou kumiit um pahlolowaan én zéi'kan muntung sa sia zéi'kan mahkiit an tinotoz im witu um pahlolowaan.

⁶ Si mememendu si nima'ulitola nimaayang, ni sia si kataré mé'an am wua'na am pinaayangnamé.

⁷ Wéhanla genang a méikuaku kenu, si Mahpiara é mangun ni ko makawawa i makatulap péléng am péléng.

⁸ Gena-genangen ang kenu: si Yesus Kristus, si méitoumé sumaup ni Opo Empung im wia sé nimaté, si suzu ni Daud, tumoro ni Siamo u Nuwu' Lé'os ipahwoka'ku.

⁹ Pahpaan i mahwoka' u Nuwu' Lé'os kenumo, ni aku nimazézéha an apusen tanu sé tou léwo'. Taan u Nuwu' ni Opo Empung itii én zéi'kan mata'u apusen.

¹⁰ Niitumo, ni aku én ezen i nimasaan an zézéha pahpaan sé tou pinéléng ni Opo Empung, wo séra toro ipilot im witu un ukuman wana a singkéla' mengiité si Kristus Yesus, karia u sigi' wo looz makaz ing kauré-uré.

¹¹ Totoz ulit a méikua kenu, “Sa kita maté karia-Na, ni kita kangkasii é menou-nou karia-Na.

¹² Sa kita ezen im wana an zézéha, ni kita é mamerénta karia-Na. Taan sa kita mahkélong ni Sia, ni Sia kangkasii éng kumélong ni kita.

¹³ Sa kita nimaliuz wana a méitaazta, ni Sia én zéi'kan kawisa nimaliuz wana a méitaaz-Na, pahpaan zéi'kan mamuali ni Sia ing kumélong un tou-Na.”

Ung katou-touan kapaaz ni Opo Empung

¹⁴ Péléng a méikuakuma kenu én ipapagenangla wo totoz isésala wia ni séra witu u saru-sarun ni Opo Empung. Tia' séra mahzéi-zéi'an tumoro a nunuwu'en pahpaan niitu én zéi'kan siapa torona, taantaré makumayo' uman sé tou sé mahtalinga niitu.

¹⁵ Mahtututu'la, wo ko wangun witu u sinaru ni Opo Empung in tou si zéi'kan maizang i mahpaayang wia ni Sia, si zéi'kan mahwuni-wuni i mahwoka' u nuwu' tumoro ung kaulitan itii.

¹⁶ Taan ma'katla im wana a nuwu' zéi'kan siapa torona wo mahséro' wia si Opo Empung, u mahwangun uman sé tou in zéi'kan pandung wia si Opo Empung.

¹⁷ A nunuwu'en néra é mahlangkou tanu ung kangker. Si Himeneus wo si Filetus é méikauntep wia ni séra.

¹⁸ An tutuzu' kaulitan ém pahséa' néramo. Ni séra é mahtuzu' i sé tou nimatémo é méitoumomé sumaup ni Opo Empung. Karia in téntu, an tutuzu' néra itii é mahkayo' um pa'émanen né tou walina.

¹⁹ Taan un to'tolan winangun ni Opo Empung én totoz enté', witu um wawona ém pinantikan téntii, “Si Mahpiara én totoz mata'u sé tou anu-Na” wo “Péléng sé tou mahkua i ni sia én anu ni Mahpiara é léwo'zéi' in tumula'ula a léwo'an.”

²⁰ Witu um walé tua'na én zéi'kan uman wéwéhan am pakakas a mas wo am péra' am wangunen, taan wéwéhan kangkasii ang kai kaapa tana' am wangunen. A mas wo am péra' am wangunen ém pemamakén witu un endo wangko' wo ang kai wo tana' am wangunen ém pemamakén wana an endo kanaramen.

²¹ Sa si tou uli-ulit meresi un touna im wana a léwo', ni sia é maéndo tanu um pakakas mas am wangunen u mapaileké ung kawa'ilanan. Ni sia é linenaso, wangun im pahpakén ni tuangna wo pahpakén uman wana am paayangen wangun.

²² Pahpaano niitu, ma'katla im wana a lelo léwo' un awak né weru tou. Mahtututu'la i mahkiit um paaz ni Opo Empung, ma'éman an tutuzu'-Na, rumaraaté si kasuat tou wo mahlé'o-lé'osan karia néra sé mengaléi wia si Opo Empung i mekitulung karia un até weresi.

²³ Tia' mahkii-kiit i mahzéi-zéi'an karia né tou lemou pahpaan ni séra én zéi'kan siapa kata'uan. Pahpaan kata'uannumo sa nianamo a mangun am pahkoro'an.

²⁴ Si ata ni Mahpiara én zéi'kan toro mahkoro', taan ni sia é léwo'zéi' i lé'os im wia péléng sé tou, tulap i mahtuzu' wo ezen.

²⁵ Ni sia én totoz eluz uman i mahsésa wia sé tou tampezéi', pahpaan si Mahpiara ém woo méhé un oras wia ni séra, wo séra tumula'u a singkéla' néra wo mangun ni séra mata'u ung kaulitan.

²⁶ Karia in téntu, ni séra én toro mata'ula i ni séra é simingkéla'mola, pahpaan ni séra é mémoikapiloté im witu um wetes ni tonaas né sétang si nimapus ni séra karia um paazna.