2 Tesalonika 1 - Taaz Weru Witu u Nunuwu'en Tombulu

U sigi'

¹ Um pinantik kenu ém wia ni aku Paulus wo wia sé kakariaku si Silas wo si Timotius a mangé. Um pinantik kenu én iwéhé wia ni kamu sé jamaat witi Tesalonika. Ni kamu é ma'éman wia si Opo Empung Ama'ta wo wia si Yesus Kristus Mahpiara.

² Mengalé-ngaléi uman ung kamang tatambér wo ung kaluasan witu un até, um wia si Opo Empung, Ama'ta wo um wia si Yesus Kristus Mahpiara é menaté-natér ni kamu.

Si Paulus kimua u makasé wia si Opo Empung

³ Katuari-katuari, pahpaan ni kamu ni kai sekezé é léwo'zéi' ing kumua u makasé wia si Opo Empung. Ni kai é léwo'zéi' i mahwangun un téntu pahpaan ni kamu éng kalousnamo i ma'éman wia si Yesus wo ni kamu si esa wo sé walina éng kalousnamo i mahraa-raatéan,

⁴ taka-takazan, ni kamu ém pahloo-looz nai i mahsirita wia sé jamaat ni Opo Empung. Ni kamu ém pahloo-looz nai pahpaan ni kamu én zéi'kan mazéi' i ma'éman wia si Yesus zozo' ni kamu mahpendan an zézéha wo ang kasusaan.

⁵ Niitu un tumuzu'mé i si Opo Empung én zéi'kan mahsanaweka i mahtotoz ulit kaapa zéi'kan am pahwangunen né tou. Ni kamu in tarékan én zézéha pahpaan mahtali-talinga wia si Opo Empung, niitumo ni Sia kimua i ni kamu ém wangun i muntep witi Kakolanoan-Na.

⁶ Si Opo Empung én zéi'kan mahsanaweka, niitumo ni Sia méhé an zézéha wia sé tou mahzézéha ni kamu.

⁷ Wo ni Sia é méhé ung kaenaan wia ni kamu sé mahpendan an zézéha wo kasii wia ni kai. Niitu é mamuali i si Yesus Mahpiara tumumpamé im witi kasendukan i mapailek un tou-Na karia né malaekat-Na sé mawuta-wuta ang kawasa wo karia un api melaya-layas.

⁸ Ni Sia kasii in timumpamé é mémukum sé tou soo mata'u si Opo Empung wo soo mahkiit u Nuwu' Lé'os tumoro si Yesus, si Mahpiarata.

⁹ Ni séra én ukumen karia i maléwo' makaz ing kauré-uré. Ni séra én iwoho ni Opo Empung im witu u sinaru-Na wo ni séra én zéi'mo kasii milek ung kaenté'an-Na um wangko'.

¹⁰ Péléng niitu é mamuali witu un endo i ni Sia méyé sumaup. Ni Sia é loozen wo sigi'en né tou lenas wo sigi'en péléng né tou ma'éman. Ni kamu kangkasii é méikauntep wia sé tou lenas itii, pahpaan ni kamu é nima'émanola an tutuzu' méipahtuzu' nai wia ni kamu.

¹¹ Pahpaano niitu, ni kamu én zéi'kan mazéi' in ipahpengaléi nai, wo si Opo Empung gumenang ni kamu wangun menou-nou in tou sé tinawahmo ing kumiit ni Sia. Ni kai kasii mengaléi wia si Opo Empung karia ung kawasa-Na in tumulung ni kamu sumampet péléng am wangun ang ginenang niou im wangunen wo i sumampet péléng am paayangen niou pahpaan ma'éman wia ni Sia.

¹² Karia in téntu, si Yesus Mahpiarata ém pahloozen wo pahsigi'en niou wo ni kamu kangkasii ém pahloozen wo pahsigi'en ni Yesus Mahpiarata mengiit ung kamang tatambér ni Opo Empungta wo ni Yesus Kristus Mahpiara.