2 Petrus 3 - Taaz Weru Witu u Nunuwu'en Tombulu

Si Yesus é méyé sumaup

¹ Katuari-katuari ikararaatéku, um pinantikku kenu ém pinantik kazua u méiwéhé wia ni kamu. Im witu un zua pinantik kenu, ni aku é nimahtututu' i mapagenang wia ni kamu wo ang genang niou ém weresi.

² Kapaazku ni kamu gumenang a méikua né nabi lenas im puuna wo am perénta ni Mahpiara wo si nimilot ni kita im witu un ukuman wana a singkéla', wia sé aatu-Na, an ikua néra wia ni kamu.

³ Un ipahpuu-puuna ing kata'uan nioula én téntii: Im wana an endo kaakazan ung kaayahan, mahondolé sé tou tampenéro' karia a séséro' néra, sé menou-nou mahkiit uman a lelo léwo' un awak.

⁴ Ni séra éng kumua in téntii, “Si Kristus én timaaza i mawurimé sumaup, taan in tarékan, amo Siamo? Pahpaan rengané im wia sé nimaopota i nimatéma makaz in tarékan, zéi'kan siapa a nimamuali, péléngpé' tanu im puuna rengan ung kaayahan im winangun.”

⁵ Ni séra é mahkua in téntu pahpaan ni séra é mahwangu-wangun zéi'kan mata'u sa im puuna si Opo Empung én akaz uman i nimuwu'ma, u langit é rengan i nimamualima. Téntu kangkasii, si Opo Empung, akaz uman i nimuwu'ma, un zano é nimamualima kaayahan am patampasen-Nama ung katanaan wo un zano,

⁶ wo im puuna, karia un zano péléng am wia ung kaayahan é linéwo'-Nama karia un ampuhan.

⁷ Taan karia u Nuwu'-Na, u langit wo ung kaayahan in tarékan én zéi'kan linéwo' karia un api. Im witumokan un endo ni Sia in tumotoz am pahwangunen né tou in ulit kaapa zéi'kan, ni Sia é luméwo' sé tou zéi'kan pandung ni Sia wo kasii luma'ung u langit wo ung kaayahan.

⁸ Katuari-katuari ikararaatéku, wéwéhan un totoz ing gena-genangen niou. Im wia si Mahpiara u sana endo é masuat uman wo u sana riwu ta'un, wo u sana riwu ta'un é masuat uman wo u sana endo.

⁹ Si Mahpiara én zéi'kan mahuré-uré i mangun a méitaaz-Na, zozo' im wéwéhan sé tou mahkua ni Sia én tahlous uré. Taan ni Sia én ezen im wia ni kamu, pahpaan kasoo-Na zozo' in esa wéwéhan sé tou maikaléwo'. Kapaaz-Na péléng sé tou én tumula'ula a singkéla' wo mawuri sumaup i mahlé'os ang kapaaz-Na.

¹⁰ Taan un endo si Mahpiara i mawurimé sumaup én tanu si maremu' i mérumemu'. Im witu un endo itii, u langit é mazéi' karia un zanina un erut totoz makaindé'en. Péléng am witi langit é nimala'ung makaz i maapu wo ung kaayahan wo péléng am witu é maapu.

¹¹ Sa péléng niana é maapu tanu niitu, kura ung katou-touan niou? Tantumo, ni kamu i menou-nou é léwo'zéi' i lenas wo mahkiit uman ung kapaaz ni Opo Empung.

¹² Ni kamu éng karegas i ma'ento' wo mengalé-ngaléi un endo ni Opo Empung itii é reweké. In toro niitu, un api é luma'ung wo kumemu u langit, wo um pasu'na mangun péléng am witi langit é meno.

¹³ Taan ni kita sé ma'éman é ma'ento' u langit weru wo ung kaayahan weru u méitaaz ni Opo Empung, u mapahwéha-wéhan né tou niéndo ulit ni Opo Empung.

¹⁴ Niitumo katuari-katuari ikararaatéku, karegas ni kamu i ma'ento' niana péléng i mamuali, ni kamu é léwo'zéi' mahtututu' i menou-nou totoz weresi wo zéi'kan siapa pahséro'an witu u sinaru ni Opo Empung, wo mahlé'o-lé'osan karia-Na.

¹⁵ Genangenola ung kaezenan ni Mahpiarata én témpo niou in ipilot im witu un ukuman wana a singkéla'. Ang kenu é masuat wo u méipantik ni Paulus an iwéhé wia ni kamu pahpaan ang katulapanna a méitambéré ni Opo Empung wia ni sia. Ni sia éng katuarita esa pa'émanen wo ikararaatéta.

¹⁶ Si Paulus kangkasii é mahtuzu' niana wana péléng am pinantikna. Im wana am pinantikna itii ém wéwéhan an tawi zéi'kan katulapan né tou. Ung kalakoan am pinantik an tawi zéi'kan katulapan itiimo un ipahséa' né zéi'kan mata'u apa wo né zéi'kan totoz enté' um pa'émanen. Zéi'kan uman niitu, a Nuwu' ni Opo Empung walina kangkasii én ipahséa' néra. Pahpaan am pahwangunen néra itii, ni séra é maléwo'en ni Opo Empung.

¹⁷ Taan ni kamu, katuari-katuari ikararaatéku é mata'umo niana. Niitumo mile-ilek én taa kamu ikakiit umanla sé méster towo sé méikalulu pahpaan an tutuzu' towo itii, makaz ni kamu zéi'mo ma'éman im wana an tutuzu' kaulitan.

¹⁸ Taan, ni kamu é mahtututu'la wo kalousna i mé'an ung kamang tatambér ni Yesus Kristus Mahpiara wo si nimilot ni kita im witu un ukuman wana a singkéla'. Mahtututu'la wo ni kamu totoz mata'u ni Sia. U looz wo sigi' ém wia uman ni Sia, in tarékan makaz ing kauré-uré. Amin.