2 Petrus 1 - Taaz Weru Witu u Nunuwu'en Tombulu

U sigi'

¹ Um pinantik kenu ém pinantikku, Simon Petrus, ata wo aatu ni Yesus Kristus, iwéhé wia sé mahwali-wali karia nai sé ma'émano. Ni kita nima'éman wia si Yesus Kristus pahpaan ni Sia é si Opo Empung wo si nimilot ni kita im witu un ukuman wana a singkéla' wo si zéi'kan mahsanaweka.

² Mengalé-ngaléi uman si Opo Empung én tumambéré ang kamang wo ung kaluasan un até un zéi'kan si akazna wia ni kamu, pahpaan ni kamu é mata'umo si Opo Empung wo si Yesus Kristus Mahpiarata.

Sé tou tinawah wo pinéléng ni Opo Empung

³ Pahpaan karia ung kawasa-Na, si Opo Empung én timambér wia ni kita péléng am pemandungen, wo kita toro menou-nou mahkiit am paaz-Na. Péléng niitu é méiwéhé-Na wia ni kita pahpaan ni kita é mata'umo ni Sia si timawah ni kita karia ung kawasa-Na un totoz wangko' wo ung kalé'osan-Na.

⁴ Karia in téntu, ni Sia én timambéro wia ni kita an taaz zéi'kan kakuaan wo totoz wangko' u mangun ung katou-touan niou ikapiloté witu ung genang u mahkiit uman a lelo léwo' un awak niou u mahléwo' ung kaayahan kenu, wo am pahwangunen niou én tanu am pahwangunen ni Opo Empung.

⁵ Pahpaano niitu, uli-ulit pahtututu'en nioula im pahawesala um pa'émanen niou karia ung katou-touan wangun, wo ung katou-touan wangun ém pahawesala karia ung katulapan tumoro si Opo Empung,

⁶ wo witu ung katulapan tumoro si Opo Empung ém pahawesala karia u mata'u mahime-imek un tou. Wo u mata'u mahime-imek un tou ém pahawesala karia un ezen im wana an zézéha, wo un ezen im wana an zézéha ém pahawesala karia u mahkiit ang kapaaz ni Opo Empung.

⁷ Wo witu u mahkiit ang kapaaz ni Opo Empung ém pahawesala karia u rumaraaté sé katuari esa pa'émanen, wo u rumaraaté sé katuari esa pa'émanen ém pahawesala karia u rumaraaté péléng sé tou.

⁸ Pahpaan sa kamu zéi'kan mazéi' mahwangun niana péléng, nianamo u sumawang ni kamu i makawawa mahtata'u wo lamata'u si Yesus Kristus Mahpiarata.

⁹ Taan séi si zéi'kan mahwangun niana péléng, ni sia é nimaletok wo zéi'kan totoz tulap. Pahpaan kinaliuzannamola sa a singkéla'na im puuna é zinéi'mola ni Opo Empung.

¹⁰ Niitumo, katuari-katuariku, totoz mahtututu'la i mapailek sa kamu én uli-ulit pinéléng ni Opo Empung wo tinawah-Na ing kumiit ni Sia. Pahpaan sa kamu mahwangun niana péléng, zéi'kan itula'u niou um pa'émanen niou masuat wo ni kamu én zéi'kan ikasangkil karegas i mahlampang.

¹¹ Karia in téntu, zéi'kan siapa si mahapé-apé' wia ni kamu i muntep witu ung Kakolanoan ni Opo Empung, um pahwéha-wéhan makaz ing kauré-uré ni Yesus Kristus, Mahpiara, si nimilot ni kita im witu un ukuman wana a singkéla'.

¹² Pahpaano niitu, niana péléng sekezé én ipapagenangkuma wia ni kamu, zozo' niana péléng éng kata'uan niouo wo an tutuzu' ulit itii én totoz im pa'émanen niouo.

¹³ Karegas ni aku i menou-noupé', ni aku é léwo'zéi' mapagenanga niana péléng wia ni kamu.

¹⁴ Pahpaan kata'uangkumo i ni aku én zéi'mo mauréma tumula'umo ung kaayahan kenu, tanu u méipapata'uma ni Yesus Kristus, si Mahpiarata.

¹⁵ Niitumo ni aku én totoz mahtututu' wo niana péléng pegena-genang niou, zozo' ni aku zéi'mo wia ung kaayahan kenu.

Sé nimilek wo timalinga ung kawangko'an ni Yesus

¹⁶ Pahpaan ni kai i mahtuzu' wia ni kamu tumoro si Yesus Kristus Mahpiarata i mawurimé sumaup tanu si Kolano karia ung kawasa-Na, zéi'kan mahkiit a sirita towo am winangun uman né tou, taan ni kai sé nimilek wo sé timalinga ung kawangko'an-Na.

¹⁷ Ni kai ém wana i si Yesus nimakailek u sigi' wo u looz um wia si Opo Empung a méyé. Niitu nimamuali i si Opo Empung Si Totoz pahsigi'en wo pahloozen ing kimua wia ni Sia, “Si Kenumo si Oki'-Ku, si ikararaaté-Ku. Ni Sia si mahwangun un até-Ku i mahpaa-paaz.”

¹⁸ U nuwu' tinalinga nai itii ém witi kasendukan a méyé, i ni kai kimaria ni Sia witu um wawo ung kentur lenas.

¹⁹ Niitumo u nimangun ni kai totoz enté' i ma'éman witu u nuwu' méipahwoka'ma né nabi im puuna. A méipahtuzu'ma né nabi itii é léwo'zéi' im pahwéhan nioula genang tanu ni kamu i mahilek u solo mahsena' witu u rimbengbeng makaz si endo i sumerité wo si kaendoan i sumena' witu un até niou.

²⁰ An totoz ipahpuu-puuna ing kata'uan nioula é: A méipahkuamé ni Opo Empung wia sé nabi, u méipantik witu um Pinantik Lenas én zéi'kan toro pahtata'un mengiit uman ung ginenang in esa.

²¹ Pahpaan zéi'kan kawisa a méikuamé ni Opo Empung wia sé nabi é nimamuali witu ung ginenang né tou, taan niitu é nimamuali pahpaan si Roh Lenas si kimawasa wia sé tou sé mahnuwu' u Nuwu' ni Opo Empung.