2 Korintus 5 - Taaz Weru Witu u Nunuwu'en Tombulu

Si tou ma'éman é makailek un awak weru

¹ Ung kata'uan nai, un awakta im wia ung kaayahan é masuat uman wo un ténda pahento'anta u maléwo'. Si Opo Empung é méhé wia ni kita um walé witi kasendukan. Um walé itii ém winangun ni Opo Empung, zéi'kan maléwo' makaz ing kauré-uré, zéi'kan winangun ni tou.

² Ni kita i menou-nou witu un ténda wia ung kaayahan kenu é mahpa'os pahpaan i lumelo um walé ma'ento'anta witi kasendukan. Um walé itiimo un awakta weru.

³ Niitumo, kapaazta sa matéma é makailek un awak weru wo si rohta zéi'kan kailekan in zéi'kan siapa awak.

⁴ I ni kita mahwitu-witupé' un awakta u masuat wo un ténda wia ung kaayahan kenu, ni kita é mahpa'os pahpaan am pengalinta ém wutez. Ni kita én zéi'kan mahgenangla i maté wo toro matampasan karia un awakta in tarékan, taan kapaazta ni kita ém werun wo wéhan ni Opo Empung un awak weru u menou-nou makaz ing kauré-uré.

⁵ Niimeko ni Opo Empung wo kita toro makailek un awak weru. Ni kita ém winéhan-Na si Roh Lenas si nimaéndo aapus wia ni kita in uli-ulit makailek un awak weru.

⁶ Pahpaan kata'uan naimo, ni kai é makailek un awak weru, niitumo un até nai é nienté-enté'. Kata'uan nai kasii i ni kai memia-miapé' un awak nai kenu, ni kai én zou'pé' im witu um walé u mapahwéha-wéhan nai karia ni Mahpiara.

⁷ Pahpaan ni kai i menou-nou wia ung kaayahan kenu, ung katou-touan nai é mahkiit um pa'émanen nai wia si Kristus, zéi'kan mahkiit am pahileken nai.

⁸ Taan un até nai én enté', wo ung kapaaz nai én tumula'uma un awak wia ung kaayahan kenu wo lamahwali-wali karia ni Mahpiara witi kasendukan.

⁹ Niitumo, ni kai im wiapé' un awak nai wia ung kaayahan kenu kaapa im witumo un awak weru witi kasendukan, ni kai é mahtututu' i sekezé é mahwangun si Mahpiara i mahpaa-paaz.

¹⁰ Pahpaan ni kita péléng é léwo'zéi' i maisaru witu u rurumezan ni Kristus ing Kolano i matotozen ulit kaapa zéi'kan, wo sé tou si esa wo si esa é makailek um wawaér mengiit am winangunna, niitu im wangun kaapa léwo'.

Si Kristus si mangun sé tou mawurian sumaup karia ni Opo Empung

¹¹ Kata'uan nai ung kalakoan u maindé' si Mahpiara. Niitumo, ni kai é mahtututu' makaz sé tou zéi'kampé' ma'éman é ma'éman wia si Mahpiara. Totoz kata'uan ni Opo Empung um witu un até nai, niitumo ni kai mengalé-ngaléi maan ni kamu é mata'u am witu un até nai mengiit ung genang lé'os niou.

¹² Tia' kamu mahgenangla ni kai makasapé' ing kumua niitu i mahlooz un tou nai. Taan ni kai é mahkua uman u lé'os um winangun nai wo ni kai toro pahloozen niou. Karia in téntu, ni kamu ém wéwéhan un iwingkot wia sé tou sé mahloo-looz am winangun néra an toro pahileken né tou, zéi'kan am witu ung genang lé'os néra.

¹³ Sa ni kai pahkuan né tou im pahléla'en, niitu ém pahpaan mahpaayang wia si Opo Empung. Wo sa ni kai pahkuan in zéi'kan pahléla'en, niitu ém pahpaan ung kawangunan niou.

¹⁴ Niana péléng ém pahwangunen nai, pahpaan u raraatéan ni Kristus ung kimawasa ni kai. Pahpaan ung kalakoana éng kata'uan naimo, im puuna ni Sia i nimaté é simawel péléng sé tou. Niitumo, péléng sé tou én tanu nimatémo.

¹⁵ Si Kristus nimatémo pahpaan péléng sé tou, wo ni séra sé menou-noupé' wia ung kaayahan kenu, ung katou-touan néra én zéi'mo anu néra taan anumo ni Kristus, si nimatémo wo méitoumomé sumaup ni Opo Empung pahpaan ung kawangunan néra.

¹⁶ Niitumo, ni kai én zéi'kan mahukur si tou tanu um pakahukur in tou uman, sé lumelo uman am wia ung kaayahan, zozo' im puuna ni kai i mahukur si Kristus én tanu um pakahukur in tou.

¹⁷ Niitumo, séi uman si mahkiit si Kristus, ni sia ém winerumo. Ung katou-touanna én zéi'mo tanu im puuna in zéi'kampé' mahkiit si Kristus. Taan ung katou-touanna ém werumo, un uré é nimazéi'moma wo um weru ém wiamo.

¹⁸ Péléng ang kenu ém winangun ni Opo Empung. Winangun-Na kita toro mawurian sumaup karia-Na witu um pinaayang ni Kristus. Ni kai kasii ém winéhan-Na um paayangen i mahwoka' u Nuwu' Lé'os tumoro si Yesus wia sé tou makaz séra ma'éman wo mawurian sumaup karia-Na.

¹⁹ Ang kenu an ipahwoka' nai: Winangun ni Opo Empung sé tou wia ung kaayahan i mawurian sumaup karia-Na, mengiité si Kristus. Niana im winangun ni Opo Empung, zéi'mo kagenangan-Nala ang kasumalaan pinahwanguné né tou. Ni Sia kasii é niméhé wia ni kai um paayangen mahwoka' u Nuwu' Lé'os i sé tou én toro mawurian sumaup karia-Na.

²⁰ Niitumo, ni kaimo sé méiatu ni Kristus i mahtuzu' un tumoro ni Sia. Mengiité ni kai si Opo Empung mahsésa wia ni kamu. Karia u ngaran ni Kristus, ni kai mahaléi wia ni kamu: Iwéhéla un tou niou i mawurian sumaup karia ni Opo Empung.

²¹ Si Kristus én zéi'kan nimahwangu-wangunla a singkéla', taan winangun ni Opo Empung, si Kristus masaan a singkéla' winangunta. Téntu um winangun ni Opo Empung wia si Kristus, wo séi uman si ma'éman wia si Kristus, si tou itii én éndon ulit ni Opo Empung witu u sinaru-Na.