2 Korintus 4 - Taaz Weru Witu u Nunuwu'en Tombulu

U sangkum wia si Opo Empung a méyé

¹ Pahpaan u raraatéan ni Opo Empung, ni kai én toro maéndo tou i maayang a méiatu-Na. Niitumo, makaz in tarékan ni kai én zéi'kan mazéi' i mahéré'.

² Taan ni kai i mahpaayang én zéi'kan mahwuni-wuni ang kaizangnokané. Ni kai kasii én zéi'kan mahtowo wia sé tou wo zéi'kan mahtuzu' an zéi'kan ulit tumoro u Nuwu' ni Opo Empung. Taan, ni kai mahtuzu' an ulit ing kumiit am paaz ni Opo Empung. Karia in téntu, péléng sé toumokan sé mahtata'ula mengiit ung genang lé'os niou witu u sinaru ni Opo Empung, sa an ipahtuzu' nai ulit kaapa zéi'kan.

³ Sa u Nuwu' Lé'os tumoro si Yesus un ipahwoka' nai soo pahtutulapen né tou maléwo'en, niitu é masuat wo ung genang néra én tanu niapé'ampé'.

⁴ Sé tou itii zéi'kan ma'éman pahpaan ung genang néra éng kinawasapé' ni tonaas né sétang si kimawasa wia ung kaayahan kenu. Niitumo, zéi'kan kailekan néra u sena' u Nuwu' Lé'os tumoro ung kawangko'an ni Kristus si totoz masuat wo si Opo Empung.

⁵ An ipahwoka' nai én zéi'kan tumoro ni kai, taan tumoro si Yesus Kristus Mahpiara. Ni kai nimaéndo ata niou, pahpaan ni kai é mahpaayang ang kapaaz ni Yesus.

⁶ Im puuna si Opo Empung éng kimua in téntii, “Im witu u rimbengbeng a mondolé un ayah!” In tarékan ni Sia kangkasii si nimangun un ayah-Na mahsena' witu un atéta wo toro kata'uantala ung kawangko'an-Na. Ung kawangko'an ni Opo Empung én toro ilekenta witu ung gio ni Yesus Kristus.

⁷ Ni kai é nimakaileko u sangkum um wia si Opo Empung a méyé. Taan ni kai én tanu uman un tampayang u liné'osan u sangkum totoz mahal u mengataraz umanla. Karia in téntu ikatuzu'mé sa ung kawasa zéi'kan kakuaan ém wia si Opo Empung a méyé, zéi'kan wia ni kai a méyé.

⁸ Ni kai ém pahkekemun im wana am péléng, taan ni kai én zéi'kan nimakemu. Zéi'mo kata'uan nai um wangunen, taan ni kai én zéi'kan mazéi' i mahéré'.

⁹ Ni kai ém pahzézéhan, taan ni kai én zéi'kan méiwaya ni Opo Empung. Ni kai ém pahwélwélen makaz im pahkakolo' taan ni kai én zéi'kan nimaté.

¹⁰ Ni kai sekezé é mahpendan witu un tou nai ung kinawalian si Yesus i nimaté. Karia in téntu, sé tou walina én toro milek ung katou-touan ni Yesus witu ung katou-touan nai.

¹¹ Ni kai i menou-noupé' kenu, sekezé ém wéwéhan sé tou mahwuwunu' ni kai pahpaan si Yesus. Karia in téntu, ung katou-touan ni Yesus én ikatuzu'mé witu un tou nai u maté.

¹² Niitumo, ni kai sekezé é mahsaru un toro mahwali ni kai witu um patéan, taan ni kamu sekezé é nimasaruan karia an toro mahwali ni kamu witu ung katou-touan.

¹³ Taan pahpaan um pa'émanenta é masuat, tanu u méipantik witu um Pinantik Lenas in téntii, “Ni aku é ma'éman, pahpaano niitu ni aku é mahnuwu'”, niitumo, pahpaan ni kai kangkasii é ma'éman, ni kai é mahnuwu'ma.

¹⁴ Pahpaan kata'uan nai, si Opo Empung si timoumé sumaup si Yesus Mahpiara, ni Sia kangkasii si tumou sumaup ni kai karia ni Yesus. Ni kai karia niou é réwoken mahwali-wali witu u sinaru ni Opo Empung.

¹⁵ Péléng niitu é mamuali pahpaan ung kawangunan niou. Niitu mamuali wo lakez sé tou mamé'an ung kamang tatambér-Na. Karia in téntu, kalakezna sé tou mahkua u makasé wia si Opo Empung. Ang kenu é mangun ing kalakezna sé tou mahsigi' si Opo Empung.

Zéi'kan mazéi' mahéré' i mahsaru an zézéha

¹⁶ Niitumo, ni kai én zéi'kan mazéi' i mahéré'. Zozo' ung kaenté'an un awak nai kauréna ém pahkainaan, taan si roh nai sekez in endo ém pahwerun.

¹⁷ Pahpaan an zézéha rorak uman am pahpendanen nai in tarékan én zéi'kan mauréma wo niitu u nimangun ni kai in totoz pahloozen wo pahsigi'en makaz ing kauré-uré, niitu é lumouspé'mé an zézéha pinendan naimé.

¹⁸ Pahpaano niitu, ni kai én zéi'kan mahwéhé genang wana am pahileken wia ung kaayahan kenu, pahpaan am wia ung kaayahan én zéi'kan makaz ing kauré-uré. Taan am pahwéhan nai genang an zéi'kan kailekan, am witi kasendukan a méyé u makaz ing kauré-uré.