2 Korintus 13 - Taaz Weru Witu u Nunuwu'en Tombulu

A sésésa wia sé tou ma'éman

¹ Ang kenu éng katelu ni aku i méyé wia ni kamu. Witu um Pinantik Lenas méipantik in téntii, “Sa wéwéhano zua kaapa telu tou sé mahkua tumoro a niilek néra, taré um pahéndo-éndoan toro isampet.”

² Pahpaan ing kazua ni aku i niméyéma wia ni kamu, niitu é mémoipapagenangkuma wia sé tou memua-muali a singkéla' wo wia péléng sé tou walina. In tarékan ni aku in zou'mé im wia ni kamu, ipapagenangkuma sumaup wia sé tou memua-muali a singkéla' wo wia péléng sé tou walina. Téntii un ikuakuma, i ni aku méyé sumaup ni séra én totoz ukumengku.

³ Pahpaan ni kamu mahaléi wia ni aku i mapailek un toro tumuzu'mé, sa um pahnuwu'engku ém wia si Kristus a méyé. Sa si Kristus mahpaayang wia ni kamu, ni Sia mahpaayang karia ung ketez wo ni Sia mapatuzu' ung kawasa-Na witu ung katou-touan niou.

⁴ Si Kristus én zéi'kan enté' i sinalip. Taan in tarékan ni Sia menou-nou pahpaan ung kawasa ni Opo Empung. Téntu kangkasii ni kai zéi'kan enté' tanu si Kristus im puuna, taan ni kamu é milek ni kai i menou-nou karia-Na pahpaan ung kawasa ni Opo Empung witu ung kawangunan niou.

⁵ Amoké wa'wa'en nioula un tou niou, wo kata'uan nioula sa ni kamu én uli-ulit ma'éman wia si Kristus kaapa zéi'kan. Pahtata'ula un até niou, ni kamu én uli-ulit mata'u i si Kristus Yesus ém witu un até niou kaapa zéi'kan! Pahpaan sa kamu zéi'kan uli-ulit mahkiit si Kristus, um pa'émanen niou én zéi'kan malekep im pema'wa'en.

⁶ Taan ni aku é mahéré'la sa ni kai pinahtata'u niouola, ni kamu é lamata'u sa ni kai én uli-ulit aatu ni Kristus.

⁷ Ni kai mengaléi wia si Opo Empung, wo ni kamu tia' mahwangun a léwo'an. Zéi'kan mapailek i ni kai én uli-ulit aatu ni Kristus, taan wo ni kamu mahwangun ang kapaaz ni Opo Empung, zozo' ni kai ém pahkuan né tou in zéi'kan uli-ulit aatu ni Kristus.

⁸ Pahpaan ni kai én zéi'kan mata'u mahwangun u mahsaru an ulit taan ni kai é mahwangun uman an ulit.

⁹ Ni kai é mahpaa-paaz sa ni kamu enté' wo ni kai zéi'kan enté'. Ni kai mengaléi wia si Opo Empung wo um pa'émanen niou malekep.

¹⁰ Niitumo, ni aku i nimantik um pinantik kenu i nimazou'an karia niou, wo sa ni aku méyé in tumondong, ni aku én zéi'mo suméro' ni kamu karia ung kawasa méiwéhé ni Opo Empung wia ni aku. Ung kawasa itii méiwéhé i mahwawangun ni kamu, zéi'kan i luméwo' um pa'émanen niou.

Ung kamurian witu um pinantik ni Paulus

¹¹ Ung kamurian, katuari-katuari, ni kamu mahpaa-paazla, mahtututu'la wo péléng am pemangu-mangunen niou malekep. Pahwéhanla genang péléng a méisésaku wia ni kamu. Ni kamu én esa genang wo péléng mahlé'o-lé'osan. Si Opo Empung si mahtambéré ung kamang wo ung kaluasan witu un até é menaté-natér ni kamu.

¹² Péléng sé katuari esa pa'émanen wia'i é méhéma u sigi' néra wia ni kamu. Mahsigi-sigi'ala wo mahayoala lengen i mapailek i ni kamu én esa pa'émanen.

¹³ Mengalé-ngaléi uman ung kamang tatambér ni Yesus Kristus Mahpiara, wo u raraatéan ni Opo Empung wo um pinaesaan karia ni Roh Lenas é menaté-natér ni kamu péléng.