2 Korintus 11 - Taaz Weru Witu u Nunuwu'en Tombulu

Si Paulus wo sé aatu towo

¹ Pahaléiengku wia ni kamu i mezenla im wia ni aku, pahpaan ni aku é mantik um woo pahgenangen nioula i ni aku én tanu tou lemou pahpaan mahlooz un touku. Taan kata'uangku ni kamu én ezen im wana am pinantikku.

² Um pa'émanen niou wia si Kristus én totoz pahtéizangku wo ikaupi'ku sa wéwéhan sé mahlululu um pa'émanen niou, tanu si Opo Empung én timéiz ni kamu. Pahpaan ni aku si totoz puuna nimapata'u wia ni kamu tumoro si Yesus Kristus makaz ni kamu ma'éman wia ni Sia. Niitu é masuat wo si ama' mahkakawéng si rarahana karia ni tuama maéndo mahayona. Ni kamumo sé tanu si raraha itii wo si tuama itii é si Kristus.

³ Taan ikaindé'ku én taa ung genang niou é méilulu makaz kamu zéi'mo uli-ulit mahkiit si Kristus, tanu si Hawa im puuna i méilulula ni ulé' karia ung kasigaanna i mahtowo.

⁴ Pahpaan ni kamu é mahéné uman i sumungkul séi uman sé mahwoka' tumoro si Yesus si zéi'kan masuat wo si méipahwoka' nai, kaapa si roh si zéi'kan masuat wo si Roh Lenas si sinungkul niou. Ni kamu kasii é mahéné uman i sumungkul u Nuwu' Lé'os tumoro si Yesus un zéi'kan masuat wo u méipahwoka' nai.

⁵ Taan sa pakagena-genangengkula, sé pahkuan niou aatu totoz wangko' taan ndéén towo itii, ni séra én zéi'kan lumousé ni aku.

⁶ Zozo' ni aku én zéi'kan tahlous tulap i mahnuwu', taan tumoro ung kata'uan, ni aku én zéi'kan tou zéi'kan siapa kata'uan. Pahpaan niana péléng é mémoipapailek nai wia ni kamu im wana péléng an oras wo im wana am péléng.

⁷ Simala' ni aku wé, sa iroroskula un touku i mahlooz ni kamu, pahpaan zéi'kan mekiwaér i mahwoka' u Nuwu' Lé'os ni Opo Empung wia ni kamu?

⁸ I ni aku mahpaayang mahwoka' u Nuwu' Lé'os ni Opo Empung wia ni kamu, am pemandungengku i mendo-endo én ipahwéhémé né woopira jamaat wana am wanua walina. Sa téntu, ni aku én tanu ang kimahat umané wia ni séra a mémaayang wia ni kamu.

⁹ Sa am pemandungengku én zéi'kan wutul i mahwali-wali karia niou, zéi'kan kawisa aku sumusa si esa im wia ni kamu. Pahpaan, péléng am pemandungengku én ipahwéhémé né katuari esa pa'émanen sé witi Makedonia a méyé. Ni aku én totoz tégam im wana am péléng, én taa ni aku maéndo pengalin im wia ni kamu. Téntu u mawangunengku.

¹⁰ Im wia Akhaya kenu zéi'kan siapa si toro zuméi' un ipahloo-loozku i ni aku én zéi'kan kawisa i maéndo pengalin wia ni kamu. Pahpaan an tutuzu' ni Kristus an totoz ulit ém wiamo ni aku.

¹¹ Ni aku i mahloo-looz tanu niitu, zéi'kan pahpaan ni aku zéi'kan rumaraaté ni kamu. Si Opo Empung si mata'u i ni aku é rumaraaté ni kamu.

¹² Am pahwangunengku in tarékan én zéi'kan ikana'ku. Wo zéi'kan siapa un toro ipahwera-wera' né pahkuan niou in aatu itii, i mahlooz un tou néra wo mahkua am pinaayang néra én tanu am pinaayang nai.

¹³ Pahpaan sé tou itiimo sé aatu towo. Ni séra i mahpaayang é mahtowo wia sé tou wo mahasa-asar sé aatu ni Kristus.

¹⁴ An téntu én tia' ikakompo' niou, pahpaan si tonaas né sétang kangkasii é mahasa-asar sé malaekat nimahalimé un ayah.

¹⁵ Niitumo, tia' ikakompo' niou sa sé tou ni tonaas né sétang é mahasa-asar sé tou mahpaayang a méiatu ni Opo Empung im paayangen. Ing kamurian ni séra é makailek am wawaér mengiit an towo am pinaayang néramé.

Si Paulus nimapailek i ni sia én uli-ulit aatu

¹⁶ Ikuakuma sumaup, kasooku sa wéwéhan si tou im wia ni kamu si mahgenangla i ni aku én tou lemou. Taan sa kamu mahgenangla i ni aku én téntu, sungkulené ni aku, tanu ni kamu sumungkul si tou lemou, makaz ni aku toro lumoozla oki' un touku.

¹⁷ In tarékan ni aku é mahlooz un touku, taan zéi'kan méiatu ni Mahpiara ni aku i mahkua un téntu. I ni aku mahlooz un touku tanu niitu, ni aku é mahasa-asar sé tou lemou.

¹⁸ Pahpaan lakez sé tou mahlooz un tou néra tanu am pahwangunen né tou wia ung kaayahan kenu, maan ni aku kangkasii ém paaz i mahlooz un touku.

¹⁹ Ni kamu mahgenangla in tulap pahpaan ni kamu én ezen im wia sé tou lemou.

²⁰ Ni kamu én totoz ezen sa kamu: pahata-atan néra, kaapa pahkahatan an anu niou, kaapa pahkawasaan néra, kaapa pahloo-loozan néra un tou néra wo mahsepal ni kamu.

²¹ Pahgenangen niou sa ni aku én totoz maizang pahpaan zéi'kan wuaya i mahwangun an téntu? Zéi'kan! Taan sa sé tou walina ém wuaya i mahlooz un tou néra, ni aku kangkasii ém wuaya i mahlooz tanu ni séra. (Ang kenu é nuwu'ku tanu sé tou lemou).

²² Ni séra é mahkua in tou Ibrani? Ni aku kangkasii én tou Ibrani! Ni séra é mahkua in tou Israel? Ni aku kangkasii én tou Israel! Ni séra é mahkua i suzu ni Abraham? Ni aku kangkasii é suzu ni Abraham!

²³ Ni séra é mahkua i ni séra én aatu ni Kristus? Ni aku é lumouspé'mé ni séra! (Ni aku i mahkua téntu én tanumo si tou pahléla'en). Ni aku i mahpaayang é lumouspé'mé um pakahpaayang néra. Ni akupé' si makalakez méiuntep bui taan ni séra. Ni akupé' si makalakez sinaluk taan ni séra. Ni aku makalakez én tawimo maté.

²⁴ Ni aku é makalimamo ukumen sinaluk né tou Yahudi. Sekez in ukumen ni aku é sinaluk makateluna pulu' wo siou.

²⁵ Makatelu ni aku zinézéha pahwélwélen né tou Romawi, makasa pahweriten karia am watu im pahwuwunu'en néra, makatelu u londéi tua'na sinakéangku ém woanokan méikatenem wo sana endo sana wengi i melembo-lembo witi unez un tasik.

²⁶ Im wana am pahlampangangku ni aku é makalakez masungkul un toro mangun ni aku ikaléwo' wana a lewuh, ikaléwo' pahpaan sé mahkahat an anu né tou, ikaléwo' pahpaan sé tou Yahudi wo sé tou zéi'kan Yahudi, ikaléwo' wana am wanua tua'na, ikaléwo' wana ang kapelasan, ikaléwo' witi unez un tasik, wo kasii ikaléwo' pahpaan sé tou sé mahkua ing katuari esa pa'émanen wia si Opo Empung taan ndéén zéi'kan.

²⁷ Ni aku én totoz ma'ulit wo mahtututu' i mahpaayang, makalakez in zéi'kan timekel, maharem wo maré'o, makalakez ing kinaapuan kanen, wo kasii mahpendan un zaté wo zéi'kan siapa karai sawelen.

²⁸ Wo am walina én zéi'mo ikuakuma. Um pegena-genangengku ém pengalin péléng né jamaat.

²⁹ Sa wéwéhan si tou mahpendanla in zéi'kan enté', ni aku kangkasii é mahpendan in zéi'kan enté'. Sa wéwéhan si tou nimangunla sé tou walina mahwangun a singkéla', un atéku én totoz rumara.

³⁰ Sa ni aku mahlooz un touku, niitu un tumuzu'mé ni aku é mahlooz an zéi'kan enté' im wia ni aku.

³¹ Si Opo Empung, si Ama' ni Yesus, si Mahpiarata, kata'uan-Na ni aku én zéi'kan mahtowo. Pahloozela Sia makaz ing kauré-uré.

³² Ni aku im witi Damsyik, si niéndo gubernur ni kolano Aretas, nimatu sé suraro in tuméiz u loloangan um wanua tua'na Damsyik in tumion ni aku.

³³ Taan sé kakariaku é simawang ni aku, méitahu' nérala ni aku witu ung karaya a ni aku ikiité un tétémboan witu u ri'riz mésel u makaliklik um wanua tua'na itii. Itonton néramé, a ni aku mondolé, makaz ni aku in zéi'kan kinationan né suraro ni gubernur itii.