2 Korintus 1 - Taaz Weru Witu u Nunuwu'en Tombulu

U sigi'

¹ Um pinantik kenu ém wia ni aku Paulus wo si Timotius si katuarita esa pa'émanen a mangé. Witu um paaz ni Opo Empung ni aku én tinawah i nimaéndo aatu ni Kristus Yesus. Um pinantik kenu én iwéhé wia sé jamaat ni Opo Empung witi Korintus wo péléng sé tou linenas ni Opo Empung witi Akhaya.

² Mengalé-ngaléi uman ung kamang tatambér wo ung kaluasan witu un até, um wia si Opo Empung, si Ama'ta wo um wia si Yesus Kristus Mahpiara é menaté-natér ni kamu.

Si Opo Empung é menté' ni kai im wana an zézéha

³ Loozela si Opo Empung, si Ama' ni Yesus Kristus, si Mahpiarata. Si Ama' totoz rumaraaté ni kai wo sekezé é mahenté' un atéta péléng.

⁴ Si Opo Empung si nimenté' un até nai im wana péléng an zézéha pengalin nai, wo karia ung kaenté'an un até méiwéhé-Namé, akaz ni kai makawawa mahenté' un até né tou walina im wana an zézéha pengalin néra.

⁵ Ni kai é nimahpendanomé lakez a zézéha tanu am pinahpendané ni Kristus, taan ni kai kangkasii é nimakailekomé wia si Kristus ang kaenté'an un até i ni kai mahsaru an zézéha.

⁶ Sa kai mahsaru an zézéha, an zézéha nai itii é niéndo ni Opo Empung i mahenté' un até niou wo in tumulung ni kamu. Sa si Opo Empung menté' un até nai, niitu éng karia i mahenté' un até niou. Karia in téntu, ni kamu é makailek ung kaenté'an wo ezen zozo' in zézéha tanu an zézéha pinahpendan naimé.

⁷ Ni kamu én totoz pa'émanen nai wo kata'uan nai pahpaan ni kamu é nimazézéha tanu am pinahpendan naimé. Niitumo, kata'uan nai si Opo Empung é nimenté' un até niou tanu um winangun-Na wia ni kai.

⁸ Katuari-katuari, kapaaz nai ing kata'uan nioula tumoro an zézéha nai im witi Asia. An zézéha pinendan naimé itii én totoz wutez, makaz ni kai mahgenangla in tawimo maté.

⁹ Witu ung genang nai, ni kai én tanu tinotozo im wunu'en. Taan niitu nimamuali téntu, wo ni kai zéi'kan mahéré' uman witu un tou nai, taan mahéré' uman wia si Opo Empung si tumou sumaup sé tou nimatémo.

¹⁰ Ni Sia si nimilotomé wo mamilot ni kai im witu um patéan makaindé'en. Ni kai sekezé é mahéré' wia ni Sia i miloté ni kai kasii im witu u makaindé'en tanu niitu in tumondong.

¹¹ Ni kamu kangkasii simawangomé i mahpengaléi ni kai. Niitumo, si Opo Empung niméhé un tatambér wia ni kai i ni Sia timalinga am pengaléien tumoro ni kai, wo lakez sé tou kumua u makasé wia ni Sia.

Si Paulus soopé' mangé witi Korintus

¹² Ni kai én totoz mahlooz ung katou-touan nai pahpaan um pahwangunen nai wia sé tou wia ung kaayahan é lé'os wo ulit. Niitu un totoz méisanapa' witu um pahile-ilekan nai karia niou. Witu ung genang lé'os nai, ni kai én totoz mata'u sa niitu é lé'os wo ulit wia si Opo Empung a méyé, niitu kangkasii én tumuzu'ma wia sé tou sa am pahwangunen nai én ulit. Wo péléng am pahwangunen nai itii én zéi'kan karia ung katulapan nai in tou, taan karia ung kamang tatambér ni Opo Empung.

¹³ Ni kai é nimantik umana un toro bacan wo toro katulapan niou. Mengalé-ngaléi, niana péléng én uli-ulit toro katulapan niou.

¹⁴ Zozo' in taré am walina an toro katulapan niou tumoro ni kai, mengalé-ngaléi uman witu un endo si Yesus Mahpiara méyé in tumondong, ni kamu é malumooz ni kai wo ni kai kangkasii é malumooz ni kamu.

¹⁵ Pahpaan totoz kata'uangku, ni kai é nimaéndo pahloo-looz niou, niitumo ni aku gimenang i mangé wia ni kamu wo ni kamu makailek makazuamé ung kamang méitambér ni Opo Empung.

¹⁶ Pahgenangengkula sa aku mangé witi Makedonia, ni aku én tumulipé'ma wia ni kamu wo taré meméhé-méhé mangé witi Makedonia. Mawurimé im witi Makedonia, ni aku é matumuli kasii wia ni kamu wo toro wéhan nioué am pemandungengku i lumampang mangé witi Yudea.

¹⁷ Taan zozo' ni aku én zéi'kampé' nimangémé, ni aku én zéi'kan mahzua-zua genang i mangun ang ginenangku. Ang ginenang im wangunengku én zéi'kan mahkiit uman ang kapaazku i mahkua ‘éné’ wo witu ung genang é mahkua ‘zéi'kan’.

¹⁸ Si Opo Empung én zéi'kan nimaliuz wana a méitaaz-Na, téntu kangkasii ni kai én zéi'kan nimaliuz wana a méitaaz nai. Niitumo, ni kai én zéi'kan mahkua ‘éné’ wo witu ung genang én ‘zéi'kan’.

¹⁹ Pahpaan, si Yesus Kristus, si Oki' ni Opo Empung si méipahwoka'ku karia ni Silwanus wo ni Timotius wia ni kamu én zéi'kan mahkua ‘éné’ wo witu ung ginenang én ‘zéi'kan’. Taan im wia ni Sia én akaz uman mahkua ‘éné’.

²⁰ Si Kristus ni Siamo si ‘Éné’ im wana péléng a méitaaz ni Opo Empung. Ni kai mahkua ‘Amin’ pahpaan si Kristus i mahsigi' wo mahlooz si Opo Empung.

²¹ Si Opo Empung si nimenté' ni kai, wo ni kamu uli-ulit mahkiit si Yesus Kristus. Ni Sia kasii si niméléng ni kai i maayang wia ni Sia.

²² Si Opo Empung si niméhé si Roh Lenas witu un atéta un tumuzu'mé i ni kai én toro makailek péléng a méitaaz-Na wia ni kai. Si Roh Lenas én tanu u meterai un tumuzu'mé i ni kita én tou-Na.

²³ Si Opo Empung si mata'u ang ginenangku, kata'uan-Na i ni aku én zéi'kan nimangé wia ni kamu witi Korintus, pahpaan kasooku ni aku i mangé é mangun un até niou rumara.

²⁴ Ni kai é mahkua an téntu wia ni kamu, zéi'kan i merénta ni kamu tumoro u léwo'zéi' im pa'émanen niou, pahpaan um pa'émanen niou wia si Kristus én enté'mo. Taan kapaaz nai, ni kita én toro maayang mahwali-wali, wo ni kamu toro mahpaa-paaz.