1 Yohanes 5 - Taaz Weru Witu u Nunuwu'en Tombulu

Um pa'émanen kumala a léwo'an wia ung kaayahan

¹ Si tou ma'éman i si Yesus éng Kristus, si tou itii én oki' ni Opo Empung. Si tou rumaraaté si ama', ni sia kangkasii é rumaraaté si oki' ni ama'.

² Karia ung kenu ni kita toro mata'u i ni kita rumaraaté sé oki' ni Opo Empung: Ni kita rumaraaté si Opo Empung wo mahwangun a méiperénta-Na.

³ Pahpaan ung kenumo u rumaraaté wia si Opo Empung: Ni kita é mahkiit am perénta-Na. Am perénta-Na itii én zéi'kan wutez,

⁴ pahpaan péléng sé oki' ni Opo Empung éng kumala a léwo' wia ung kaayahan kenu. Ung kenumo ung kimala a léwo'an wia ung kaayahan kenu: Um pa'émanenta wia si Yesus.

⁵ Séi si kumala a léwo' wia ung kaayahan kenu, sa zéi'kan ni sia si ma'éman i si Yesus én Oki' ni Opo Empung?

Um pina'ilek tumoro si Oki' ni Opo Empung

⁶ Si Yesus Kristus é niméyé karia un zano wo un zaha', zéi'kan uman karia un zano taan karia un zano wo karia un zaha'. Si Roh ni Opo Empung si mahkua ang kata'uan-Na, pahpaan si Roh ni Opo Empung éng kaulitan.

⁷ Pahpaan telu sé mahkua ang kata'uan néra [im witi kasendukan: Si Ama', u Nuwu' ni Opo Empung wo si Roh Lenas wo sé telu itii én esa.

⁸ Wo im wia ung kaayahan én telu un tumuzu'mé niitu]: Si Roh ni Opo Empung, un zano wo un zaha' wo sé telu itii én esa.

⁹ Ni kita én timalinga an ipahkua ni tou tumoro a niilekna, taan an ipahkuapé' ni Opo Empung tumoro ang kata'uan-Na un enté'. Pahpaan ung kenumo un ipahkua ni Opo Empung tumoro ung kata'uan-Na, i ni Sia mahkua ung kata'uan-Na tumoro si Oki'-Na.

¹⁰ Séi si ma'éman wia si Oki' ni Opo Empung, witu un aténa ém wéwéhano un ipahkua ni Opo Empung tumoro si Oki'-Na itii. Séi si zéi'kan ma'éman wia si Opo Empung, winangunna si Opo Empung in tantowo, pahpaan zéi'kan pa'émanenna un ipahkua ni Opo Empung tumoro si Oki'-Na.

¹¹ Ung kenumo un ipahkua ni Opo Empung tumoro si Oki'-Na: Ni Sia é niméhémomé wia ni kita ung katou-touan makaz ing kauré-uré. Ung katou-touan itii ém wia si Oki'-Na.

¹² Séi si simungkul si Oki' ni Opo Empung, ni sia é makailek ung katou-touan makaz ing kauré-uré. Séi si zéi'kan simungkul si Oki' ni Opo Empung, ni sia én zéi'kan makailek ung katou-touan itii.

Ung katou-touan makaz ing kauré-uré

¹³ Péléng niana én ipantikkuma an iwéhéma wia ni kamu, wo kamu sé ma'éman witu u ngaran ni Oki' ni Opo Empung é mata'ula i ni kamu é makailek ung katou-touan makaz ing kauré-uré.

¹⁴ Wo ni kita zéi'kan maindé' i mengaléi wia si Opo Empung, pahpaan sa wéwéhan um pahaléienta mengiit ung kapaaz-Na, totoz ing kata'uanta i ni Sia én tumalinga wo méhé am pahaléienta itii.

¹⁵ Sa kita mata'u i ni Sia én tumalinga wo méhé apa uman am pahaléienta, kata'uanta kasii i ni kita é nimakailekola apa uman am pinahaléita wia ni Sia.

¹⁶ Sa wéwéhan si tou milekla si katuarina esa pa'émanen mangunla a singkéla' an zéi'kan mangun ni sia i makailek um patéan, ni sia é léwo'zéi' in ipengaléi nioula wia si Opo Empung. Si Opo Empung é méhé ung katou-touan wia si tou si nimangunla a singkéla' itii. Niia kangkasii én tumoro sé tou nimangunla a singkéla' an zéi'kan nimangun ni séra i nimakailek um patéan. Taan wéwéhan u singkéla' u nimangun si tou i nimakailek um patéan. Tumoro niitu, ni aku én zéi'kan kumuama i ni sia é léwo'zéi' in ipengaléi nioula.

¹⁷ Péléng a léwo'an é singkéla', taan wéwéhan a singkéla' an zéi'kan mangun si tou i makailek um patéan.

¹⁸ Kata'uanta im péléng sé tou sé nimaéndomo oki' ni Opo Empung én zéi'mo mahwangun a singkéla'. Pahpaan si Oki' ni Opo Empung én timéiz ni sia wo si tonaas né sétang én zéi'kan mata'u kumura im wia ni sia.

¹⁹ Kata'uanta i ni kita ém wia si Opo Empung a méyé wo ung kaayahan kenu éng kinawasa ni tonaas né sétang.

²⁰ Kata'uanta kasii i si Oki' ni Opo Empung é niméyémo wo niméhémo ung katulapan wia ni kita. Karia in téntu, ni kita mata'u Si Ulit wo maesa karia Si Ulit pahpaan nimaesa karia si Oki'-Na, si Yesus Kristus. Ni Siamo si Opo Empung, si ulit wo si mahwéhémé ung katou-touan makaz ing kauré-uré.

²¹ É kamu in oki'ku, zumou'la im wia péléng sé opo-opo.