1 Yohanes 4 - Taaz Weru Witu u Nunuwu'en Tombulu

Si roh ni Opo Empung wo si roh kakoro' ni Kristus

¹ Katuari-katuari ikararaatéku, péléng sé roh én tia' pa'émanen niou, taan pahtata'ula lumé'o-lé'os sé roh itii, sa sé roh itii ém wia si Opo Empung a méyé kaapa zéi'kan. Pahpaan lakez sé nabi towo sé nimapaileko un tou néra wo mahliklik ung kaayahan.

² Téntii wo kita toro mata'u si Roh ni Opo Empung: Péléng sé roh sé makaulit i si Yesus Kristus é niméyémoma wia ung kaayahan in tou uman, ni séra ém wia si Opo Empung a méyé.

³ Taan péléng sé roh, sé zéi'kan makaulit si Yesus tanu niitu, ni séra én zéi'kan wia si Opo Empung a méyé. Si roh itii é roh ni kakoro' ni Kristus. Wo un tumoro ni sia én tinalinga niouo, i ni sia é méyé wo in tarékan ni sia ém wiamo ung kaayahan.

⁴ É oki'ku! Ni kamu ém wia si Opo Empung a méyé wo ni kamu éng kimalamola sé nabi towo itii. Pahpaan si Roh si wiamo ni kamupé' si wangko', taan sé roh wia ung kaayahan.

⁵ Ni séra ém wia ung kaayahan a méyé, niitumo ni séra é menuwu-nuwu' tumoro am wia ung kaayahan wo sé tou wia ung kaayahan é mahtalinga ni séra.

⁶ Ni kita ém wia si Opo Empung a méyé: Séi si mata'u si Opo Empung, ni sia é mahtalinga ni kita. Séi si zéi'kan wia si Opo Empung a méyé, ni sia én zéi'kan mahtalinga ni kita. Niitu un tumuzu'mé wisa si Roh kaulitan wo wisa si roh mahlululu uman si tou.

Si Opo Empung é rumaraaté

⁷ Katuari-katuari ikararaatéku, méyémo kita mahraa-raatéan. Pahpaan u raraaté ém wia si Opo Empung a méyé. Si tou rumaraaté én oki' ni Opo Empung wo mata'u si Opo Empung.

⁸ Séi si zéi'kan rumaraaté, ni sia én zéi'kan mata'u si Opo Empung, pahpaan si Opo Empung é rumaraaté.

⁹ U raraatéan ni Opo Empung é méipapaileké wia ni kita witu ung kenu: Si Opo Empung nimatumé si Oki'-Na si esa uman i méyé wia ung kaayahan wo kita toro makailek ung katou-touan makaz ing kauré-uré mengiité si Oki'-Na itii.

¹⁰ Ung kenumo u raraaté itii: Zéi'kan ni kita sé rimaraatémo si Opo Empung, taan si Opo Empung si rimaraatémo ni kita wo nimatu si Oki'-Na in zuméi' a singkéla' pahlé'osenta.

¹¹ Katuari-katuari ikararaatéku, sa si Opo Empung én téntu u raraatéan-Na im wia ni kita, ni kita kangkasii é léwo'zéi' i mahraa-raatéala.

¹² Zéi'kampé' siapa zozo' in esa si tou nimileko si Opo Empung. Sa kita mahraa-raatéan, Si Opo Empung é nimaesa kariata wo u raraatéan-Na é lekep im wia ni kita.

¹³ Pahpaan si Opo Empung é niméhémomé wia ni kita si Roh-Na, niitumo kata'uanta i ni kita é nimaesa karia ni Opo Empung wo ni Sia é nimaesa kariata.

¹⁴ Ni kai é nimileko wo ni kai éng kumuama a niilek nai i si Ama' é nimatumomé si Oki'-Na i milot sé tou wia ung kaayahan im witu un ukuman wana a singkéla'.

¹⁵ Séi si makaulitla i si Yesus én Oki' ni Opo Empung, si Opo Empung é nimaesa kariana wo ni sia é nimaesa karia ni Opo Empung.

¹⁶ Ni kita é mata'umo wo ma'émano u raraatéan ni Opo Empung wia ni kita. Si Opo Empung é rumaraaté, wo séi si rumaraaté, ni sia é nimaesa karia ni Opo Empung wo si Opo Empung é nimaesa kariana.

¹⁷ Im wana ang kenumo u raraatéan ni Opo Empung nimalekep witu ung katou-touanta, sa kita wuaya i ma'éman im witu un endo si Opo Empung in tumotoz ulit kaapa zéi'kan am pahwangunen né tou. Pahpaan tanu si Yesus Kristus, ni kita kangkasii ém wia ung kaayahan kenu.

¹⁸ Im witu u raraaté én zéi'kan siapa an ikaindé'. Pahpaan u raraaté nimalekep é moho an ikaindé'. Witu u maindé' ém wéwéhan un ukuman, wo séi si wéwéhan un ikaindé', u raraatéanna én zéi'kan lekep.

¹⁹ Ni kita é rumaraaté, pahpaan si Opo Empung si puuna rimaraatémo ni kita.

²⁰ Sa si tou mahkua, “Ni aku é rumaraaté si Opo Empung,” taan ni sia é mazi'zis si katuarina esa pa'émanen, ni sia én tantowo. Pahpaan séi si mazi'zis si katuarina si pahilekennala, zéi'kan mamuali sia i rumaraaté si Opo Empung, si zéi'kan pahilekennala.

²¹ Ung kenumo um perénta méiwéhé-Na wia ni kita: Séi si rumaraaté si Opo Empung, ni sia kangkasii é léwo'zéi' i rumaraatéla si katuarina esa pa'émanen.