1 Yohanes 3 - Taaz Weru Witu u Nunuwu'en Tombulu

Ung katou-touan né oki' ni Opo Empung

¹ Ilekela, ung kawangko' u raraatéan méitambéré ni Ama' wia ni kita, taka-takazan ni kita pahkuan in oki' ni Opo Empung. Wo niitu én ulit i ni kita én oki' ni Opo Empung. Niitumo, sé tou mahkiit u lelo léwo' ung kaayahan én zéi'kan mata'u ni kita, pahpaan sé tou itii én zéi'kan mata'u ni Sia.

² Katuari-katuari ikararaatéku, in tarékan ni kita én oki' ni Opo Empung, taan zéi'kampé' kata'uanta u mamuali wia ni kita. Taan kata'uanta sa si Kristus mapailekomé un tou-Na, ni kita é maéndo tanu ni Sia. Pahpaan ni kita é mamilek un ulitna ung katou-touan-Na.

³ Si tou niméré' un téntu wia ni Sia é limenas un touna tanu si Kristus i lenas.

⁴ Si tou mahwangun a singkéla', ni sia kangkasii é mahsaru an tinotoz ni Opo Empung, pahpaan u singkéla' é mahsaru an tinotoz ni Opo Empung.

⁵ Kata'uan niou, si Kristus i nimapailek un tou-Na i mézuméi' péléng a singkéla', wo im wia ni Sia én zéi'kan siapa a singkéla'.

⁶ Niitumo, péléng sé tou menou-nou nimaesa karia ni Kristus, zéi'mo memua-muali a singkéla'. Sé tou memua-muali a singkéla' én zéi'kan mahilek-ilekla wo zéi'kan mahta'u-ta'ula ni Sia.

⁷ É kamu in oki'ku, tia' ipahwaya niou séi uman si mahlululu ni kamu. Séi si mahlé'os ang kaulitan, ni sia én tou ulit, tanu si Kristus in ulit.

⁸ Séi si memua-mualipé' a singkéla', ni sia ém wia si tonaas né sétang a méyé, pahpaan rengané im puuna si tonaas né sétang én zéi'kan kumana' i memua-muali a singkéla'. Pahpaano niia, si Kristus, si Oki' ni Opo Empung é mapailek un tou-Na, wo am pinaayang ni tonaas né sétang ém pakaléwo'en-Na.

⁹ Sé tou nimaéndomo oki' ni Opo Empung én zéi'mo memua-muali a singkéla'. Pahpaan si Opo Empung é menou-nou witu un touna un tanumokan ni Sia én timanemé um watuna tatanemen witu un até ni tou an tumoumé. Ni sia én zéi'mo mata'u memua-muali a singkéla', pahpaan ni sia é nimaéndomo oki' ni Opo Empung.

¹⁰ Ang kenumo an tumuzu'mé sé oki' ni Opo Empung wo sé oki' ni tonaas né sétang: Péléng sé tou sé zéi'kan mahwangun ung kaulitan wo kangkasii sé zéi'kan rumaraaté sé katuari néra esa pa'émanen, ni séra én zéi'kan oki' ni Opo Empung.

Sé tou ma'éman én totoz i mahraa-raatéan

¹¹ Ang kenumo a nuwu' tinalinga niouo rengané im puuna: Ni kita é léwo'zéi' i mahraa-raatéan.

¹² Zéi'kan tanu si Kain si wia si léwo' a méyé a munu'la si tuarina. Kaa sia winunu'na? Pahpaan péléng am pahmualinna é léwo' wo am pahmualin ni tuarina én ulit.

¹³ Katuari-katuari, tia' ikakompo' niou sa sé tou mahkiit a lelo wia ung kaayahan é mazi'zis ni kamu.

¹⁴ Kata'uanta, i ni kita é niméramomé im witu um patéan a mangé witu ung katou-touan, pahpaan ni kita é rumaraaté sé katuarita esa pa'émanen. Séi si zéi'kan rumaraaté, ni sia éng kinawasapé' um patéan.

¹⁵ Séi si mazi'zis si katuarina esa pa'émanen, ni sia é memumunu' tou. Kata'uan niou in zéi'kan siapa si memumunu' tou é makailek ung katou-touan makaz ing kauré-uré.

¹⁶ Karia ang kenumo ni kita mata'u u raraatéan ni Kristus, i si Kristus é nimayomo un tou-Na wia ni kita. Niitumo ni kita kangkasii é léwo'zéi' i mayola un touta wia sé katuarita esa pa'émanen.

¹⁷ Sa wéwéhan si tou wa'ilan wo milekla sé katuarina esa pa'émanen zéi'kan siapa apa taan ni sia é soo sumawang sé katuarina itii, kura kahuman ni sia mahkua i rumaraaté si Opo Empung?

¹⁸ É kamu in oki'ku, méyémo kita mahraa-raatéan zéi'kan uman witu u sumah kaapa witu u lila', taan wana am pahlé'osen wo witu ung kaulitan.

¹⁹ Sa kita mahraa-raatéan tanu niitu, kata'uanta i ni kita ém witu ung kaulitan a méyé wo un atéta én zéi'kan siapa ikaarét im witu u sinaru ni Opo Empung,

²⁰ sa un atéta mapahsasala' ni kita. Pahpaan si Opo Empungpé' si wangko' taan ang kata'uan un atéta wo ni Sia é mata'u péléng am péléng.

²¹ Katuari-katuari ikararaatéku, sa un atéta zéi'kan mapahsasala' ni kita, niitu é mangun ni kita zéi'kan maindé' i rumété wia si Opo Empung

²² wo apa uman am pahaléienta wia ni Sia éng kailekanta, pahpaan ni kita é mahkiit péléng am perénta-Na wo mahlé'os péléng ang kapaaz-Na.

²³ Kenumo am perénta-Na: Ni kita é léwo'zéi' i ma'éman u ngaran ni Yesus Kristus, si Oki'-Na, wo ni kita léwo'zéi' i mahraa-raatéan mengiit um perénta méiwéhé ni Kristus wia ni kita.

²⁴ Séi si mahkiit peléng a méiperénta-Na, ni sia é nimaesa karia ni Opo Empung wo si Opo Empung é nimaesa kariana. Karia in téntu, ni kita én toro mata'ula i si Opo Empung é nimaesa kariata, pahpaan ni Sia én timambéromé si Roh-Na wia ni kita.