1 Timutius 6 - Taaz Weru Witu u Nunuwu'en Tombulu

U sésésa wia sé ata ma'éman si Yesus

¹ Péléng sé ata ma'éman si Kristus é léwo'zéi' i mahgenangla sa si tuangna ém wangun im pahsigi-sigi'en. Karia in téntu u ngaran ni Opo Empung wo an tutuzu' ulit am pahkiitenta én zéi'kan séro'an né tou zéi'kan ma'éman.

² Sa si tuang néra én tou ma'éman wia si Yesus, tia' wo sia zéi'kan tahlous pahsigi'en, pahpaan ni séra é mahtuari i ma'éman. Taantaré, sé ata é léwo'zéi' kalousna i mahpaayang wia si tuang néra, pahpaan si tuang pahpaayangan néra itii éng katuari i ma'éman wo ikararaaté néra. Péléng ang kenu én uli-ulit ituzu'la wo isésala wia sé jamaat.

An tutuzu' zéi'kan ulit wo u megena-genang uman an zoit

³ Séi si mahtuzu' an tutuzu' an zéi'kan masuat wo soo kumiit an tutuzu' ni Yesus Kristus Mahpiarata wo kasii nimawalinaan karia an tutuzu' kaulitan tanu am pahkiitenta i mahragés wia si Opo Empung,

⁴ si tou itii é loozan, mahwangu-wangun i mata'u taan un ulitna ni sia én zéi'kan siapa kata'uan. U sakina ém paaz uman i mahzéi-zéi'an wo mahéndo-éndoan karia né tou walina, mahwangun sé tou in tuméutéu, mahwangun sé tou makahkoro', mahtawuruk, tahlous megenang léwo' tumoro sé tou walina,

⁵ mahsingku-singkutan zéi'kan siapa zéi'na, ung genang ni tou itii é nimakazo wo zéi'mo ulit. Ni sia mahgenangla i mawa'ilan pahpaan mahragés wia si Opo Empung.

⁶ Un ulitna, sa si tou mahragés wia si Opo Empung karia i mahgenangla im péléng am wia ni sia én aweso, ung kinailekan ni tou itii én totoz lakez.

⁷ Pahpaan kita i nimatoumé wia ung kaayahan kenu én zéi'kan nimahalimé apa. Téntu kangkasii sa kita matéma, ni kita én zéi'kan mahalima apa.

⁸ Niitumo, sa kita wéwéhano ung kanen wo karaien, niitu én toromo.

⁹ Taan sé tou paaz mawa'ilan, ni séra é méikauntepola witu um pema'waan, niéndo um wetes wo megena-genang uman a lelo léwo' un awak an zéi'kan siapa torona u maluméwo' ni sia. Am pelelo-lelo néra é mangun ni séra makemu wo ikaléwo'.

¹⁰ Pahpaan u megena-genang uman an zoit, niitu u nimangun sé tou mahwangun péléng a léwo'an. Wo pahpaan i megena-genang uman an zoit, sé woopira tou én zéi'mo ma'éman wia si Yesus wo un até néra é rumara pahpaan in zézéha.

Sésésa kamurian

¹¹ Taan ni ko in tou ni Opo Empung, zumou-zou' im wana péléng niitu, mahtututu'la in zéi'kan mahsanaweka, mahragésla wia si Opo Empung, tia' mazéi' ma'éman wia ni Sia, rumaraaté sé kasuat tou, ezen wana an zézéha wo eluz uman wia si kasuat tou.

¹² Mahtututu'la i menou-nou in tou ma'éman wia si Yesus wo makailek ung katou-touan makaz ing kauré-uré, tanumokan si tou mahlolowaan i makailek ung kukulu. Pahpaano niitu ni ko tinawah ni Opo Empung wo ko nimakaulitola witu u saru-sarun né tou lakez i ni ko é ma'éman si Yesus.

¹³ In tarékan witu u saru-sarun ni Opo Empung si mahwéhémé ung katou-touan wia péléng sé menou-nou wo witu u saru-sarun ni Kristus Yesus, si nimakaulitola ang kata'uan-Na tumoro ang kaulitan witu u sinaru ni Pontius Pilatus, pahaléiengku wia ni ko:

¹⁴ pahkiitennula lumé'o-lé'os um perénta kenu karia in zéi'kan siapa sinala' wo zéi'kan siapa pahséro'an, makaz witu un oras si Yesus Kristus Mahpiarata i méyé sumaup,

¹⁵ witu un endo totozen ni Opo Empung. Ni Sia uman si Mahkawasa wo mawuta-wuta ung kamang, Kolano péléng né kolano wo Tuang péléng né tuang.

¹⁶ Ni Sia uman si zéi'kan kinala um patéan, menou-nou witu un ayah un zéi'kan mata'u kalelezan. Zéi'kan siapa tou si nimileko ni Sia wo un ulitna én zéi'kan siapa si tou toro milek ni Sia. Péléng a sisigi'an wo ang kawasa ém wia ni Sia uman makaz ing kauré-uré. Amin.

¹⁷ Ipapagenangla wia sé tou wa'ilan wia ung kaayahan kenu in tia' loozan wo tia' mahéré' wana an zéi'kan mata'u éré'an tanu ung kawa'ilanan. Taan ni séra é mahéré'mola wia si Opo Empung wana ang kawa'ilanan-Na, si mahwéhémé péléng am péléng in toro kaipian.

¹⁸ Ipapagenangla wia ni séra wo séra mahwangunla am wangun, mawa'ilan wana am wangun, paaz mahsawang wo paaz mahtambér.

¹⁹ Karia in téntu, ni séra é riméwokola a sangkum i maéndo to'tolan enté' wia ni séra witu un endo mahmurimé i makailek un uli-ulit katou-touan.

²⁰ Timotius, pahilekela lé'os péléng a mémoitarawésa wia ni ko. Tia' mahkii-kiit i mahsirita an zéi'kan siapa torona wo an zéi'kan mahsigi' si Opo Empung wo a mahzéi-zéi'an tumoro ang kata'uan,

²¹ pahpaan wéwéhan sé woopira tou sé mahkua i ni séra ém wéwéhan ang kata'uan. Ni séra ém wa'kato im witu um pa'émanen wia si Yesus. Mengalé-ngaléi uman ung kamang tatambér wo ung kaluasan un até é menaté-natér ni kamu.