1 Timutius 5 - Taaz Weru Witu u Nunuwu'en Tombulu

Kura i mahnuwu' wia sé tou

¹ Timotius! Tia' mahrekak wia sé tuama tu'amo. Taan maheluz umanla i mahnuwu' wia ni séra tanu i mahnuwu' wia si ama'mu. Wo pahnuwu'ala sé tarétumou tanumokan ko i mahnuwu' wia sé tuarimu.

² Téntu kangkasii im wia sé wéwéné tu'amo. Maheluz umanla i mahnuwu' wia ni séra tanu i mahnuwu' wia si ina'mu. Wo pahnuwu'an kasiila sé raraha tanu ko i mahnuwu' wia sé tuarimu. Wangunela niitu karia un até weresimu.

Tumoro sé wéwéné mahesa-esamokan

³ Pahsigi'ela sé wéwéné mahesa-esamokan sé uli-ulit menou-nou mengesa-ngesamokan.

⁴ Taan sa si wéwéné mahesa-esamokan itii ém wéwéhan koki' kaapa puyun, ni séra itiimo sé kataré-taré mahwéhé genang wia sé kaawu néra in tou ma'éman. Ni séra én totoz mahtata'ula kura i maér u raraatéan né tu'a wo ni néné néra. Karia in téntu, ni séra éng kapaaz ni Opo Empung.

⁵ Si wéwéné mahesa-esamokan, si uli-ulit menou-nou mengesa-ngesamokan wo zéi'kan siapa koki' kaapa puyun, ni sia é niméré' uman wia si Opo Empung. Endo wo wengi ni sia é mengaléi wo mekisawang wia si Opo Empung.

⁶ Taan si wéwéné mahesa-esamokan si menou-nou mengiit uman um paazna in esa, zozo' sia i menou-noupé' taan ni sia é masuatokan i nimatémo.

⁷ Totoz ipapagenangla ang kenu wia sé wéwéné mahesa-esamokan itii, wo séra menou-nou zéi'kan penuwu-nuwu'en né tou.

⁸ Taan sa wéwéhan tou soo miara sé katuarina, lumouspé' kasiimé sé sana awuna in esa, si tou itii én timamburimola wia si Opo Empung wo ung kaléwo'an ni tou itii é lumouspé'mé sé tou zéi'kan ma'éman.

⁹ Sé wéwéné mahesa-esamokan sé méikarékén wangun i makailek a sasawang né jamaat é: sé zéi'kan mawa'mé witu un enemna pulu' ta'un, makasa uman kimawéng.

¹⁰ Wo kasii kata'uan né tou i ni sia é mahwangun a lé'os wia sé tou tanu ang kenu: sé oki'na ém piniaranamé lé'os, paaz mahsungkul si tou mento' witi waléna, mahwo'as un a'é né katuari esa pa'émanen, mahsawang sé tou witu ung kasusaan wo uli-ulit zéi'kan mazéi' i mahwangun péléng am wangun.

¹¹ Taan sé wéwéné mahesa-esamokan zéi'kampé' tahlous tu'a, tia'pé' ipahrékén i makailek a sasawang. Pahpaan sa mawiamé u lelo néra wia sé tuama, ni séra én tumula'u si Kristus wo paazo kawéngen sumaup.

¹² Ni séra én ukumen ni Opo Empung pahpaan ni séra én zéi'mo mahkiit un taaz néra i maayang uman wia si Kristus.

¹³ Wo kasii pahpaan séra i menero-neroi uman wana am walé né tou, ni séra nimangun un tou néra i soo kumura. Zéi'kan uman i soo kumura, taan ni séra kasii é mahtawuruk a ngaran né tou walina, menembo-nembor am pahpaayangen né tou walina wo kasii mahnuwu' an zéi'kan wangun i nuwu'en.

¹⁴ Niitumo sé wéwéné mahesa-esamokan sé zéi'kampé' tahlous tu'a, kapaazku ni séra éng kumawéngla sumaup. Sa séra kumawéngla sumaup, ni séra én toro makaileké koki' wo mahtu'tul sé sana awuna. Karia in téntu, sé kakoro'ta én zéi'kan mata'u mahtawuruk u ngaranta.

¹⁵ Pahpaan wéwéhano sé woopira wéwéné mahesa-esamokan sé zéi'kampé' tahlous tu'a mémoikalulula wo mahkiit uman um paaz ni tonaas né sétang.

¹⁶ Sa wéwéhan si wéwéné ma'éman makakatuari sé wéwéné mahesa-esamokan, si wéwéné itii é léwo'zéi' i sumawang ni séra, wo ni séra zéi'kan maéndo pengalin wia sé jamaat. Karia in téntu sé jamaat én toro sumawang sé wéwéné mahesa-esamokan sé zéi'kan siapa koki' kaapa puyun.

Tumoro um paayangen né penatua

¹⁷ Sé penatua sé uli-ulit mahpaayang am papaayangen néra é léwo'zéi' makailek u sisigi'an u makazuamé, lumouspé' kasiimé é sé siga' i mahwoka' u Nuwu' ni Opo Empung wo i mahtuzu' sé jamaat.

¹⁸ Pahpaan im witu um Pinantik Lenas é méipantik in téntii, “Tia'mo pahsokomen u sumah ni sapi si karegas mahpisi ang gandum.” Téntu kangkasii wéhan méipantik, “Si tou mahpaayang é léwo'zéi' i makailek wawaér.”

¹⁹ Tia' pahtalinganu am pahtoké wia si penatua. Taan sa wéwéhan zua kaapa telu tou nimilek wo mahkuamé a niilek néra tumoro am pahtoké itii, taré toro talinganu u méitoké itii.

²⁰ Si tou mahwangun a singkéla' é léwo'zéi' nuwu'ala witu u saru-sarun né jamaat, wo sé tou walina kangkasii é maindé' i mangun a singkéla'.

²¹ Timotius, witu u saru-sarun ni Opo Empung wo ni Kristus Yesus karia né malaekat pinéléng-Na, uli-ulit pahaléiengkuma wia ni ko: totoz wéhanla genang an tutuzu' kaulitan a mémoituzu'ku wia ni ko karia in zéi'kan meméléng tou wo zéi'kan mahsanaweka.

²² Tia'mo tahlous rewek ko i zumeta' u lengen wia si tou i méhé wia ni sia um papaayangen i maayang wia si Opo Empung wo tia' ni ko ikarékén wana a singkéla' ni tou itii. Pahwéhanla genang un toumu, wo zéi'kan maéndo séséro'an né tou.

²³ Tia' ko mengele-ngelep uman un zano, taan mahelepla anggor zozo' in toyo' uman. Pahpaan um pootmu ém wéwéhan u rumara wo un toumu sekezé é saki.

²⁴ A singkéla' né woopira tou én totozo kaile-ilekan puunala in tinotoz ulit kaapa zéi'kan am pinahwangun néramé. Taan a singkéla' né tou walina éng kata'uanokala i ni séra tinotozola.

²⁵ Téntu kangkasii si tou mangunla a lé'os, am winangunna itii é rengan ing kailekan. Wo zozo' a lé'os am pinahwanguné zéi'kan tahlous kailekan, am winanguné itii én zéi'kan mamuali im pemuni-muni.