1 Timutius 3 - Taaz Weru Witu u Nunuwu'en Tombulu

An tinotoz wia sé tonaas né jamaat

¹ Totoz ulit ung kukuan kenu, “Si tou paaz maéndo tonaas né jamaat, ni sia é megena-genang um paayangen totoz wangun.”

² Niitumo, si tonaas né jamaat é léwo'zéi' in téntii: zéi'kan penuwu-nuwu'en né tou, makamahayo uman si esa, mata'u mahime-imek un touna, tulap, mahsigi' sé tou, paaz mahsungkul sé tou méyéma witi waléna, tulap i mahtuzu' sé tou,

³ zéi'kan matetewelen, zéi'kan uupi'en taan lé'os uman, paaz mahwangun sé tou malé'osan wo zéi'kan megena-genang uman an zoit.

⁴ Ni sia kasii é mata'u mahime-imek sé sana awuna karia im wangun, pahtali-talingan wo pahsigi-sigi'en né oki'na.

⁵ Pahpaan sa sia zéi'kan mata'u mahime-imek sé sana awuna karia im wangun, kura sia i mimek sé jamaat ni Opo Empung?

⁶ Zéi'kan toro si tonaas né jamaat é si tou taré ma'émanla wia si Opo Empung, én taa sia mawera' a makailek un ukuman tanu u nimamuali wia si tonaas né sétang im puuna.

⁷ U ngaranna é léwo'zéi' wangun im wia sé tou lakez. Pahpaan sa zéi'kan téntu ni sia é séro'an né tou a sia kumiitla un towo ni tonaas né sétang i mangun a singkéla'.

An tinotoz wia sé diaken

⁸ Téntu kangkasii sé diaken, ni séra é léwo'zéi' in tou lé'os sé pahsigi-sigi'en né tou, zéi'kan koliwiles, zéi'kan matetewelen, zéi'kan megena-genang uman an zoit,

⁹ uli-ulit mahkiit an tutuzu' tumoro um pa'émanen wia si Kristus u mémoipapailek ni Opo Empung wia ni kita wo mahwangun niitu karia ung genang weresi.

¹⁰ Ni séra kasii é léwo'zéi' im wa'wa'empé'la, sa ikatuzu'mé ung katou-touan néra ém wangun, taré séra totozela i maéndo diaken.

¹¹ Téntu kangkasii sé mahayo néra é léwo'zéi' in tou lé'os sé pahsigi-sigi'en, zéi'kan mahtawuruk sé tou walina, mata'u mahime-imek un tou néra wo toro pa'émanen wana péléng am péléng.

¹² Sé diaken kangkasii é léwo'zéi' makamahayo uman si esa, mata'u mahime-imek sé oki'na wo sé sana awuna karia im wangun.

¹³ Sé diaken wangun pakahpaayang ém pahsigi'en wo kawuayana i mahnuwu' tumoro um pa'émanen néra wia si Kristus Yesus.

An tino'tolan um pa'émanenta

¹⁴ Ni aku mahéré'la in zéi'mo uré é mahilekano kariamu. Zozo' in téntu, ni aku é méhépé'ma um pinantikku kenu wia ni ko,

¹⁵ wo zozo' ni aku ikauréma, kata'uannumo kura sé tou léwo'zéi' menou-nou i sana awu ni Opo Empung. Sé sana awu ni Opo Empung ém péléng sé jamaat sé anu ni Opo Empung si menou-nou. Sé jamaat kenumo sé nimaéndo to'tolan an tutuzu' ulit ni Opo Empung tanu an tombol wo an to'tolan u nimenté' um walé.

¹⁶ Totoz ulit an tutuzu' ulit ni Opo Empung é mémoipapailek-Na witu um pa'émanenta karia ung kawangko'an-Na: “Ni Sia é nimapailek un tou-Na tanu in tou uman, kinua in ulit ni Roh ni Opo Empung wo nimapailek un tou-Na wia sé malaekat. Tumoro ni Sia é méiwoka' wia péléng sé tahsasana wanua. Ni Sia ém pa'émanen im wia ung kaayahan wo winénéta mangé witi kasendukan karia u sigi' wo looz.”