1 Timutius 2 - Taaz Weru Witu u Nunuwu'en Tombulu

U sésésa kura i mengaléi wia si Opo Empung

¹ Um puuna isésakuma én téntii: Ipapaayola um pengaléiennu wia si Opo Empung, mahaléila wia si Opo Empung tumoro am pemandungennu, ipengaléila sé tou walina wo kumuala u makasé wia si Opo Empung pahpaan um winangun-Na wia péléng sé tou.

² Ipengaléi kasiila sé kolano wo péléng sé mahkawasa wana am wanua, wo kita toro menou-nou karia in ena' wo zéi'kan siapa u mahraung i mahtali-talinga wo mahsigi' si Opo Empung.

³ Niitumo um wangun wo kapaaz ni Opo Empung, si milot ni kita im witu un ukuman wana a singkéla'ta.

⁴ Kapaaz-Na péléng sé tou én ipilot im witu un ukuman itii wo mata'u an tutuzu' ulit.

⁵ Pahpaan si Opo Empung én esa uman. Wo esa uman si nimangun sé tou mawurian sumaup karia ni Opo Empung, ni Siamo si Kristus Yesus si tou uman.

⁶ Ni Sia niméhémo un tou-Na in tumubus péléng sé tou. Niitu un tumuzu'mé un endo tinotoz ni Opo Empung.

⁷ Pahpaano niitu, ni aku tinotoz ni Opo Empung i maéndo aatu-Na i mahwoka' u Nuwu' Lé'os wo mahtuzu' wia sé tou zéi'kan Yahudi tumoro um pa'émanen wia si Yesus wo ung kaulitan. Peléng a méikuaku kenu én ulit! Ni aku én zéi'kan mahtowo.

Kura sé tuama wo wéwéné i mahragés wia si Opo Empung

⁸ Niitumo kapaazku sé tuama wisa uman ni séra i mengaléi, u lengen é méiayat karia un até weresi, zéi'kan maupi' wo zéi'kan siapa pahéndo-éndoan.

⁹ Téntu kangkasii sé wéwéné. Kapaazku ni séra éng kimarai am wangun ing karaien, zéi'kan kaizangnokané wo zéi'kan tahlouso. Um wuuk néra én zéi'kan niayam, zéi'kan nimaké a mas kaapa mutiara, kaapa kimarai ang karai mahal.

¹⁰ Taan tawimo sé wéwéné itii mahwawangunla un tou néra karia i mahwangun am wangun. Téntu um wangun im pahwangunen né wéwéné sé uli-ulit mahragés wia si Opo Empung.

¹¹ Sé wéwéné é léwo'zéi' i makapenes wo mahtali-talinga i mahkaileké an tutuzu'.

¹² Zéi'kan énéangku si wéwéné i mahtuzu' wo kasii zéi'kan énéangku i mahperénta si tuama. Sa karegas nimaréwok i mahtalinga an tutuzu', si wéwéné é léwo'zéi' i makapenes.

¹³ Pahpaan si Adam si kataré winangun ni Opo Empung, an taré si Hawa.

¹⁴ Wo kasii, zéi'kan si Adam si tinowoan ni tonaas né sétang, taan si Hawa si tinowoanna a mangun a sinéro' ni Opo Empung.

¹⁵ Taan zozo' in téntu, si wéwéné én ipilot im witu un ukuman wana a singkéla' pahpaan in timoumé si koki', asal uman sia zéi'kan mazéi' i ma'éman wia si Kristus, rumaraaté si kasuat tou, ung katou-touanna é linenas ni Opo Empung wo ung katou-touan un zéi'kan tahlouso.