1 Timutius 1 - Taaz Weru Witu u Nunuwu'en Tombulu

U sigi'

¹ Um pinantik kenu ém wia ni aku Paulus a mangé, si aatu ni Kristus Yesus mengiit u méiperénta ni Opo Empung, si nimilot ni kita im witu un ukuman wana a singkéla', wo si Kristus Yesus si nimaéndo pahéré'anta.

² Um pinantik kenu én iwéhé wia si Timotius, si tanumokan in oki'ku pahpaan ni kai esa pa'émanen. Mengalé-ngaléi uman ung kamang tatambér, u raraatéan wo ung kaluasan witu un até, um wia si Opo Empung Ama'ta wo si Kristus Yesus Mahpiarata é menaté-natér ni ko.

Mile-ilek im wia sé mahtuzu' an tutuzu' zéi'kan ulit

³ I ni aku mahangémo witi Makedonia, ni ko én totoz pinahaléikula i mento'mola witi Efesus, wo ko toro suméro' sé mahtuzu' an tutuzu' zéi'kan ulit wo séra kumana' i mahtuzu' an tutuzu' itii.

⁴ Ikua kasiila wia ni séra in tia'mo mahsirita a sirita zéi'kan ulit wo a sirita tumoro sé nimaopo an zéi'kan siapa akazna. A sirita itii é mahwangun uman am pahéndo-éndoan wo mahsaru uman ung ginenang ni Opo Empung i milot sé tou im witu un ukuman wana a singkéla', ung kinata'uanta mengiité um pa'émanenta wia si Kristus.

⁵ Ung kalakoan u sésésa itii, wo sé tou uli-ulit rumaraaté karia un até weresi, karia ung genang lé'os, wo uli-ulit ma'éman wia si Kristus.

⁶ Taan wéwéhan sé tou sé zéi'mo mahwangun niana péléng wo méilulu um pahéndo-éndoan un zéi'kan siapa torona.

⁷ Kapaaz néra maéndo tou tulap un Torat, taan ni sérakan én zéi'kan makatulap an ipahsirita néra wo an ipahkua néra am pahgenangen nérala in totoz ulit.

⁸ Kata'uanta un ukum Torat ém wangun, sa ipahkiit un ulitna tanu ung kapaaz ni Opo Empung.

⁹ Pahpaan kata'uanta un ukum Torat itii én zéi'kan méiwéhé wia sé tou mahwangun an ulit, taan iwéhé wia sé tou mahsaru si Opo Empung wo sé soo mahtali-talinga ni Sia, sé soo mahkiit um paaz-Na wo sé mahsingkéla', sé zéi'kan siapa pa'émanen wo sé megena-genang uman am wia ung kaayahan, mahwunu' si ama' wo si ina' wo sé mahwunu' sé kasuat tou,

¹⁰ sé tou samek wo sé tuama mahwangun karia né katuama nérakan an toro uman pahwangunen né tuama wo wéwéné, sé mahremu' sé tou in iwangkér maéndo ata, sé tantowo, sé mahtiwa' an zéi'kan ulit wo péléng an zéi'kan mahkiit an tutuzu' ulit

¹¹ mengiit u Nuwu' Lé'os ni Opo Empung si wangko' wo pahloozen, tanu u méitarawésamo wia ni aku im paayangengku.

Si Paulus kimua u makasé

¹² Ni aku kumua u makasé wia si Kristus Yesus Mahpiarata, pahpaan ni Sia si nimenté' ni aku i maayang wia ni Sia wo ni aku ém pahgenangen-Nala wangun i maayang um paayangen itii, wo ni Sia niméhé um paayangen wia ni aku i maayang wia ni Sia.

¹³ Im puuna ni aku é mahséro' u ngaran ni Kristus Yesus wo mahzézéha wo totoz loozan i mahsalou sé tou ma'éman wia ni Sia. Taan ni aku é méiraraatémé ni Yesus, pahpaan in toro niitu ni aku én zéi'kampé' ma'éman wia ni Sia, niitumo péléng am pahwangunengku itii én zéi'kan kata'uangku.

¹⁴ Taan lumouspé'mé niitu, ung kamang méitambéré ni Mahpiarata wia ni aku én totozo lakez, makaz ni aku ma'éman wia ni Sia wo rumaraaté sé kasuat tou pahpaan nimaesamo karia ni Kristus Yesus.

¹⁵ A nuwu' kenu én ulit wo uli-ulit toro pa'émanen: “Si Kristus Yesus i niméyé wia ung kaayahan kenu é mémilot sé tou im witu un ukuman wana a singkéla'.” Wo im wia sé tou nimangun a singkéla', ni akumo si totoz lakez a singkéla'.

¹⁶ Taan pahpaano niitu an aku iraraatémé ni Opo Empung, wo si Yesus Kristus toro mapaileké péléng ung kaezenan-Na wia ni aku, si tou totoz lakez singkéla' kenu. Karia in téntu ni aku é nimaéndo kékéréan né tou sé ma'éman wia si Yesus wo sé makailek ung katou-touan makaz ing kauré-uré.

¹⁷ U looz wo u sigi' wangko' makaz ing kauré-uré wia si Opo Empung laléi, si Kolano makaz ing kauré-uré, si zéi'kan pahileken wo si esa uman! Amin.

Um paayangen ni Timotius

¹⁸ Oki'ku Timotius! Um paayangen kenu é méiwéhéku wia ni ko mengiité u méikua ni Opo Empung wia sé jamaat. Wo u méikuamé ni Opo Empung itii é mangun ni ko maenté' i maayang am paayangen wangun karia um pa'émanen wia si Yesus wo ung genang weresi.

¹⁹ Wéwéhan sé woopira tou é soomo mahkiit ung genang weresi néra. Pahpaano niitu ni séra én zéi'mo ma'éman.

²⁰ Im wia ni séra é si Himeneus wo si Aleksander. Ni séra zua é mémoiwéhékula wia si tonaas né sétang wo séra maseso'la i mahséro' wia si Opo Empung.