1 Tesalonika 4 - Taaz Weru Witu u Nunuwu'en Tombulu

Ung katou-touan kapaaz ni Opo Empung

¹ Ing kamurian katuari-katuari, ni kai é niméhémola ung kékéréan wangun wia ni kamu tumoro kura ung katou-touan niou u mahwangun un até ni Opo Empung mahpaa-paaz. Ni kamu é nimenou-noumola tanu niitu. In tarékan karia ung kawasa ni Yesus Mahpiara, ni kai totoz mahaléi wo menutu' wia ni kamu, wo kamu kalousna mahtututu' i mahwangun si Opo Empung mahpaa-paaz.

² Pahpaan kata'uan niouo kasii, a méipahtuzu' nai wia ni kamu itii éng karia ung kawasa ni Yesus Mahpiara.

³ Ang kenumo ang kapaaz ni Opo Empung: Ni kamu é menou-nou karia ung kalenasan, zou'mé im wana ang kasamekan.

⁴ Ni kamu in tuama é méndola si wéwéné esa i maéndo mahayomu in esa, wangunela ung katou-touan niou weresi im witu u sinaru ni Opo Empung wo wangunela ung katou-touan niou im pahsigi-sigi'en né tou.

⁵ Ni kamu én tia' mahkiit uman u lelo léwo' un awak niou, tanu um pahwangunen né tou zéi'kan mata'u si Opo Empung.

⁶ Tumoro niitu, tia' si tou mahlé'os an zéi'kan wangun wia si katuarina esa pa'émanen kaapa mahtowo wia ni sia. Pahpaan totoz méipapagenang naimola wia ni kamu i sé tou mahwangun an téntu én ukumen ni Opo Empung.

⁷ Si Opo Empung én timawah ni kita i menou-nou karia ung kalenasan, zéi'kan i mahwangun ang kasamekan.

⁸ Niitumo, séi sé soo an tutuzu' kenu, ni sia én zéi'kan soo an tutuzu' ni tou, taan ni sia é soo si Opo Empung si niméhémomé si Roh Lenas wia ni kamu.

⁹ Tumoro kura i mahraa-raatéan karia né katuari esa pa'émanen én zéi'mo totoz ipantikkuma wia ni kamu, pahpaan ni kamu én tinuzu'mo ni Opo Empung kura i mahraa-raatéan.

¹⁰ Wo niitu é méipapailek niouo wia sé katuari esa pa'émanen wia péléng an tana' Makedonia. Taan katuari-katuari, ni kai é sumésama wia ni kamu, wo ni kamu uli-ulit kalousna i mahraa-raatéan.

¹¹ Ni kamu é léwo'zéi' mahtututu'la i mahraa-raatéan karia né tou walina. Tia' mahsembo-sembor wana an urusan né tou walina. Ni kamu kasii é léwo'zéi' maayangla i menéro ang kakanen wo am pemandungen niou in esa, tanu u méipengua-ngua naimo wia ni kamu.

¹² Karia in téntu, sé tou walina sé zéi'kan ma'éman si Yesus é mahsigi' ni kamu wo ni kamu kangkasii én zéi'kan niméré' wia ni séra.

Si Yesus é méyé sumaup

¹³ Katuari-katuari, kapaaz nai ing kata'uan nioula tumoro kura sé tou nimatémo, wo un até niou zéi'kan rumara tanu sé tou walina sé zéi'kan siapa pahéré'an.

¹⁴ Ni kita é ma'éman i si Yesus é nimatémo wo méitoumomé sumaup ni Opo Empung im wia sé nimaté. Niitumo pa'émanenta kangkasii i sé tou ma'éman wia si Yesus wo nimatémo én itou sumaup ni Opo Empung im wia sé nimaté wo mahwali-wali karia-Na.

¹⁵ Tumoro niitu, téntii un tutuzu' ni Mahpiara un ituzu' nai wia ni kamu: I si Yesus Mahpiara méyé sumaup, ni kita sé menou-noupé' in tarékan én zéi'kan mapuuna i mangé witi kasendukan puunala sé tou nimatémo.

¹⁶ I méyé um perénta witi kasendukan, si tonaas né malaekat én totoz rimez i numuwu'ma wo um pontuang ni Opo Empung én zumanimé, a si Yesus Mahpiara tumumpamé im witi kasendukan wo sé tou ma'éman wia ni Sia sé nimatémo ém puuna in itou sumaup.

¹⁷ Kumawusa niitu, ni kita sé menou-noupé' in toro niitu ém wénéten karia néra witu u ninahak i sumungkul si Yesus Mahpiara witi langit. Téntumo kita péléng é mamemali-mali karia-Na makaz ing kauré-uré.

¹⁸ Pahpaano niitu, ni kamu si esa wo sé walina é léwo'zéi' i maheenté'an un até karia an tutuzu' kenu.