1 Petrus 5 - Taaz Weru Witu u Nunuwu'en Tombulu

A sésésa wia sé penatua

¹ Ni aku ém penatua tanu ni kamu wo ni aku éng kumuama a niilekku wo an tinalingaku tumoro an zézéha pinahpendané ni Kristus im puuna. Ni aku kangkasii é lamakailek wéténg im witu ung kawangko'an-Na i si Kristus mémapailek ung kawangko'an-Na. Niitumo ni aku é sumésama wia ni kamu:

² Piarala sé domba ni Opo Empung sé wia ni kamu. Tia' karia in totoz pahlusun, taan karia u mahpaa-paaz tanu ung kapaaz ni Opo Empung. Tia' menéro-néro uman ang kauntungan, taan iwéhéla un tou niou in uli-ulit mahsawang.

³ Tia' wo ni kamu mahpeperénta uman wia sé tou ma'éman sé méitarawésama ni Opo Empung wia ni kamu, taan ni kamu é maéndola kékéréan wangun wia ni séra.

⁴ Wo i si Kristus si memimiara sé domba si totoz wangko' itii i mawurimé sumaup, ni kamu in tonaas né jamaat é makailek ung kukulu un totoz wangun un zéi'kan mahléwo-léwo'la.

⁵ Téntu kangkasii ni kamu im weru tou é léwo'zéi' i mahtali-talingala wia sé tu'a. Wo ni kamu péléng, irorosla un tou niou si esa wo si esa, pahpaan im witu um Pinantik Lenas é méipantik in téntii, “Si Opo Empung é makahkoro' wo sé tou wera', taan sé tou roros até én tambéran-Na ung kamang.”

⁶ Niitumo, irorosla un tou niou im witu ung kawasa-Na un totoz enté', wo im witu un oras tinotoz-Na ni kamu én irakék-Na.

⁷ Iayola wia ni Sia péléng an ikaarét niou, pahpaan ni Sia én totoz mahwéhé genang wia ni kamu.

⁸ Ni kamu é léwo'zéi' i mile-ilek wo tuméga-tégam! Pahpaan si tonaas né sétang si kakoro' niou itii é melili-liklik menéro tou ing kalan, masuat wo si singa melili-liklik i menéro tou in tongko'en.

⁹ Sarula si tonaas né sétang itii karia um pa'émanen enté'. Pahpaan kata'uan niou sa sé katuari niou esa pa'émanen wia péléng ung kaayahan kangkasii é nimendanomé an zézéha tanu am pinahpendan nioué.

¹⁰ Si Opo Empung si mahtambéré ung kamang, si timawahmo ni kamu sé ma'éman si Kristus witu ung kawangko'an-Na makaz ing kauré-uré é mangun ung katou-touan niou ing kawangunna, menté' am pa'émanen niou, menté' an até niou, wo mangun um pa'émanen niou wia si Kristus zéi'kan mawalina, kumawusla kamu i mendana an zézéha zéi'kan mauréma.

¹¹ Ni Sia si mahkawasa makaz ing kauré-uré. Amin.

Sigi' kamurian

¹² Karia im pinahsawangala ni Silas, ni aku nimantika um pinantik potot uman kenu. Totoz kata'uangku i si Silas kenu éng katuariku esa pa'émanen wo ni sia én toro pahtali-talingan. Um pinantik kenu ém pinantikku wo iwéhékuma i sumésama wo totoz mapagenanga wia ni kamu sa niia én uli-ulit kamang méitambér um wia si Opo Empung a méyé. Totoz in enté'ela um pa'émanen niou im wana ang kamang méitambér ni Opo Empung itii.

¹³ Maan sé jamaat wia am Babel sé pinéléng ni Opo Empung é mapaayoma u sisigi'an wia ni kamu. Téntu kangkasii si Markus si nimaéndomola tanu an oki'ku é méhéma u sisigi'an wia ni kamu.

¹⁴ Mahsigi-sigi'ala wo mahayoala lengen i mapailek ni kamu én esa pa'émanen. Ung kaluasan witu un até é menaté-natér ni kamu péléng pahpaan ni kamu é nimaesamo karia ni Kristus. Amin.