1 Petrus 2 - Taaz Weru Witu u Nunuwu'en Tombulu

Si Yesus si nimaéndo to'tolan né tou ma'éman

¹ Pahpaano niitu, ni kamu éng kumana'mola i memua-muali a léwo'an. Tia'mo mahtowo, tia'mo mahwangu-wangun i lumé'ospé'mé sé tou walina, tia'mo mahtéutéu wo kasii tia'mo mahtawuruk sé tou.

² Tanumokan si taré itoumé si sekezé é mekisusu, ni kamu kangkasii é léwo'zéi' im paaz un uli-ulit Nuwu' ni Opo Empung um witi kasendukan a méyé. Pahpaan karia in téntu ni kamu é mahtou wo ipiloté im witu un ukuman wana a singkéla'.

³ Niitu é mamuali sa ni kamu uli-ulit nimé'annomé u lé'os ni Opo Empung.

⁴ Niitumo, méyémo wia si Yesus si Mahpiara. Ni Sia én tanu um watu menou-nou. Um watu itii é méitia' né tou, taan pinéléng wo pahsigi'en im witu u sinaru ni Opo Empung.

⁵ Ni kamu é masuat wo um watu menou-nou u niéndo ni Opo Empung im wangunen Walé-Na Lenas. Karia in téntu ni kamu é nimaéndo walian linenas ni Opo Empung i mahali ung katou-touan in iragés wia si Opo Empung. Si Opo Empung ém paaz méndo a raragés niou pahpaan am winanguno ni Yesus Kristus wia ni kita.

⁶ Witu um Pinantik Lenas, é méipantik in téntii, “Ilekena, mémoito'tol-Kumé witi Sion um watu pinéléng-Kumo wo totoz mahal. Wo séi si ma'éman wia ni Sia, zéi'kan ipapaiza-izang.”

⁷ Im wia ni kamu in tou ma'éman, um watu itii én totoz mahal. Taan im wia sé tou zéi'kan ma'éman, téntii u méipantik witu um Pinantik Lenas, “Um watu méitia' né memamangun am walé é nimaéndomola watu to'tolan totoz ipahpuu-puuna, wo kasii nimaéndo watu pahkasunduian wo watu pahkasangkilan.”

⁸ Ni séra ém pahkasangkil wia ni Sia pahpaan zéi'kan mahtalinga u Nuwu' ni Opo Empung. Téntu un tinotozo ni Opo Empung i mamuali wia ni séra.

⁹ Taan ni kamumo sé pinéléng ni Opo Empung, walian i mahpaayang wia si Opo Empung si Kolano, tahsasana wanua linenas, nimaéndo tou méisanapa' wia ni Sia, wo ni kamu mahwoka' am pahwangunen ni Opo Empung an totoz wangko'. Si Opo Empung si timawahmomé ni kamu mondolé im witu ung karimbengbengan a muntep witu un ayah-Na un totoz makakompo'en.

¹⁰ Im puuna ni kamu én zéi'kan tou ni Opo Empung, taan in tarékan ni kamu é nimaéndomola tou-Na. Wo im puuna kasii si Opo Empung én zéi'kampé' nimapailek u raraatéan-Na, taan in tarékan ni kamu é nimakaileko u raraatéan-Na.

Un ulit im witu u sinaru ni Opo Empung

¹¹ Katuari-katuari ikararaatéku, ni kamu én tou sé siméngkot wana am wanua né tou walina wo sé limepuh umané wia ung kaayahan. Niitumo, isésakuma wia ni kamu i zumou'la im wana a lelo léwo' un awak, u makahkoro' wo a lelo un até niou wana am wangun.

¹² Wangu-wangunen ung katou-touan niou im witu u saru-sarun né tou zéi'kan mata'u si Opo Empung, wo zozo' ni kamu ém pahkuan né tou itii in tou léwo', taan witu un endo si Opo Empung i méyé, ni séra é malumooz wo sumigi' ni Sia, pahpaan ni séra é mahilek am pahwangunen niou an totoz wangun.

¹³ Pahpaan si Mahpiara, ni kamu é léwo'zéi' i mahtalingala wo mahkiitla sé pemerénta sé winéhan kawasa, rengana wia si kolano si totoz mahkawasa,

¹⁴ wo kasii wia sé touna sé winéhan kawasa i mukum sé tou léwo' wo sumigi' sé tou mahwangun a lé'os.

¹⁵ Un totoz kapaaz ni Opo Empung ni kamu é mahwangun a lé'os. Pahpaan karia in téntu ni kamu é nimangun a sumah né tou lemou ing kumana'la im wayaan uman ang kanuwu'an tumoro ni kamu.

¹⁶ Ni kamu én zéi'mo ata a singkéla' taan ni kamu é mémoipiloté im wana a singkéla'. Taan tia' wo pahpaano niitu, ni kamu ém wayaan uman um wangunen i mahwuwuni a singkéla' niou. Niitumo ung katou-touan niou é maéndola ata ni Opo Empung.

¹⁷ Pahsigi'ela péléng sé tou, iraraatéla sé katuari esa pa'émanen. Ipapailekla i ni kamu é maindé' wia si Opo Empung wo pahsigi'ela si kolano.

Mahkéréla wana am pahwangunen ni Yesus

¹⁸ É kamu sé ata! Mahtali-talingala wia si tuang niou karia i mahsigi' ni sia. Zéi'kan uman wia sé lé'os wo sé eluz uman, taan kangkasii wia sé totoz léwo'.

¹⁹ Si Opo Empung én tumambér ung kamang-Na wia si tou si pahpaan mata'u ung kapaaz ni Opo Empung, ezen i masaan an zézéha zozo' niitu én zéi'kan sumala'na.

²⁰ Pahpaan, apa u lolooz kailekan niou sa ni kamu zézéha niukum i nimangunla a singkéla'? Taan sa ni kamu nimangunla u lé'os a ni kamu mazézéha, ni kamu én tinambéran ung kamang ni Opo Empung.

²¹ Ni kamu én tinawah-Namé i mahwangun a lé'os zozo' in zézéha. Pahpaan si Kristus kangkasii é nimazézéhamé pahpaan ni kamu wo timula'umoma ung kékéréan ing kiitan niou.

²² Witu um pinantik lenas é méipantik in téntii: Ni Sia én zéi'kan nimahwangu-wangunla a singkéla' wo zéi'kan nimahnuwu-nuwu'la an towo.

²³ I ni Sia ipahsalou né tou, ni Sia én zéi'kan mahwingkot karia a sasalou. I ni Sia nimendan an zézéha, ni Sia én zéi'kan timaaz i maér, lumousé niitu un tou-Na é méiwéhé-Nala wia si Opo Empung, si zéi'kan mahsanaweka i mahtotoz ulit kaapa zéi'kan am pahwangunen né tou.

²⁴ Ni Sia nimasaan a singkéla'ta karia un tou-Na in esa, i ni Sia nimaté witu u salip. Karia in téntu, ni kita sé nimatémo wana a singkéla'ta én toro ikapiloté im witu ung kawasa a singkéla'ta i menou-nou mahkiit ung kapaaz ni Opo Empung. Wo pahpaan am péla'-Na ni kita é nimalé'os.

²⁵ Pahpaan im puuna ni kamu é masuat wo sé domba méikalulu, taan in tarékan ni kamu é nimawurimomé sumaup wia si Opo Empung, si memimiara sé domba wo mahpiara si roh niou.