1 Korintus 9 - Taaz Weru Witu u Nunuwu'en Tombulu

U léwo'zéi' pahpaayangen wo ipahwéhé wia sé aatu ni Yesus

¹ Katuari-katuari, ni aku én toro mahwangun péléng ang kapaazku. Ni aku én uli-ulit aatu ni Yesus Kristus. Ni aku é nimileko si Yesus, si Mahpiarata. Ni kamu ém wua'na am pinaayangku wia si Opo Empung.

² Zozo' sé tou walina mahkua ni aku én zéi'kan aatu ni Yesus, taan ni kamu é mahkua i ni aku é aatu ni Yesus. Ni kamu i ma'émano wia si Opo Empung un tumuzu'mé um pinaayangku in aatu ni Yesus.

³ Sa wéwéhan tou mahtawuruk ni aku, ni aku kumua ang kenu ing kumelung un touku. Un ikuakuma én téntii:

⁴ zéi'kan toro wé kai kuman wo melep im wana am pinaayang nai?

⁵ Zéi'kan toro wé kai lumampang mahwali sé mahayo nai sé ma'émano, tanu sé aatu ni Yesus walina, sé katuari ni Yesus si Mahpiara wo si Kefas?

⁶ Kaapa, ni aku wo si Barnabas uman wé sé totoz maayang am paayangen walina i mahwuwutul am pemandungen nai i mendo-endo?

⁷ Zéi'kan siapa si suraro i makumoro' wo maér in esa am pemandungenna. Zéi'kan siapa si timanem un anggor wo zéi'kan kuman um wua'na. Zéi'kan siapa si memimiara sé domba wo zéi'kan melep u susu né domba pahpiarana.

⁸ A méikuakuma ing kataré én zéi'kan uman genang ni tou, taan niitu é masuat wo a méipantik witu ung kitap Torat.

⁹ Witu ung kitap Torat, si Musa é nimantik in téntii, “Tia'mo pahsokomen u sumah ni sapi si karegas mahpisi ang gandum.” Si sapi uman wé si winéhan genang ni Opo Empung?

¹⁰ Kaapa apa u méipantik itii én tumoro ni kita? U méipantik itii én uli-ulit tumoro ni kita. Ung kalakoan u méipantik itii én téntii: si tou mahpajéko un uma wo téntu kangkasii si mahgéigéi ang gandum wana an itingna é mahéré'la i makailek um wéténgna.

¹¹ Ni kai i mahtuzu' u Nuwu' Lé'os tumoro si Kristus wia ni kamu én tanu si mememendu i mahkeroz witi uma. Sa téntu am pahwangunen nai, zéi'kankuaa ni kai én toro mahéré'la i makaileké am pandungen nai i mendo-endo an iwéhé nioué?

¹² Sa sé tou walina sé mahtuzu' u Nuwu' Lé'os tumoro si Kristus wia ni kamu én toro mahéré'la im pahwéhan niou am pemandungen néra, zéi'kankuaa u léwo'zéi' kailekan nai é lumouspé'mé taan ni séra? Taan, u léwo'zéi' kailekan nai itii én zéi'kampé' pinaké nai. Péléng am péléng ém pahpengalin nai, wo ni kai zéi'kan maéndo pengalin i mahwoka' u Nuwu' Lé'os tumoro si Kristus.

¹³ Kata'uan niou sé tou mahpaayang witi Walé ni Opo Empung, am pemandungen néra ém pahkailekan néramé witi Walé ni Opo Empung. Wo sé tou mahpaayang witi peraragésan, ni séra kangkasii é mahkaileké um wéténg néra im wana a lé'ona méiragés witu.

¹⁴ Téntu kangkasii an tinotoz ni Opo Empung, sé tou mahwoka' u Nuwu' Lé'os tumoro si Kristus, am pemandungen néra é léwo'zéi' im pahkailekan néramé i mahwoka' u Nuwu' Lé'os itii.

¹⁵ Taan zéi'kan kawisa ni aku nimahaléi u léwo'zéi' ing kailekangku itii. Ni aku i nimantik ang kenu én zéi'kan i mekisawang. Tawimo aku matéla taan u nimaéndo kaloozangku mazéi'ma.

¹⁶ Pahpaan, sa ni aku mahwoka' u Nuwu' Lé'os tumoro si Kristus, ni aku én zéi'kan wangun i lumooz un touku. Ni aku é léwo'zéi' maayang niitu, pahpaan si Opo Empung si nimatu ni aku i mahwoka' u Nuwu' Lé'os itii wia sé tou. Totoz ikaléwo' aku, sa aku zéi'kan mahwoka' u Nuwu' Lé'os itii.

¹⁷ Sa aku mahwoka' u Nuwu' Lé'os tumoro si Kristus pahpaan um paazku uman, ni aku é léwo'zéi' i makailek um wawaér. Taan ni aku i nimangun niitu zéi'kan pahpaan um paazku in esa. Si Opo Empung si niméléng ni aku an aku iatu-Na i mahwoka' u Nuwu' Lé'os itii.

¹⁸ Sa téntu, apa un iwaér wia ni aku? Un iwaér wia ni aku é: ni aku mahpaa-paaz i mahwoka' u Nuwu' Lé'os tumoro si Kristus in zéi'kan pahwaéran wo ni aku zéi'kan nimahaléi u léwo'zéi' kailekangku in aatu mahwoka' u Nuwu' Lé'os itii.

¹⁹ Zozo' ni aku én zéi'kan ata péléng né tou, taan winangunku un touku nimaéndo ata péléng né tou. Niitu ém winangunku wo kalakezna sé tou toro sawangangku i ma'éman wia si Kristus.

²⁰ Sa aku kimaria sé tou Yahudi, winangunku ung katou-touangku tanu sé tou Yahudi wo aku toro sumawang ni séra i ma'éman wia si Kristus. Sa aku kimaria sé tou menou-nou mahkiitpé' un ukum Torat, ung katou-touangku én tanu a mahkiitpé' un ukum Torat. Zozo' ni aku én zéi'mo menou-nou mahkiit un ukum Torat, ni aku nimangun un téntu wo kalakezna sé tou toro sawangangku i ma'éman wia si Kristus.

²¹ Sa aku kimaria sé tou zéi'kan Yahudi sé menou-nou zéi'kan mahkiit un ukum Torat, ung katou-touangku én tanu ung katou-touan néra in zéi'kan mahkiit un ukum Torat. Niitu winangunku wo ni aku toro sumawang ni séra i ma'éman wia si Kristus. Un ulitna ni aku én zéi'kan tou si zéi'kan mahkiit a méiperénta ni Opo Empung, pahpaan ni aku é mahkiit a méiperénta ni Kristus.

²² Sa aku kimaria sé tou zéi'kampé' tahlous enté' um pa'émanen, ni aku é mahasa-asar ni séra, wo ni aku toro sumawang ni séra i ma'éman wia si Kristus. Winangunku ung katou-touangku én tanu ni séra péléng, wo wéwéhan sé wia ni séra sé toro ipiloté im witu ukuman wana a singkéla'.

²³ Niana péléng ém winangunku wo kalakezna sé tou toro tumalinga u Nuwu' Lé'os tumoro si Kristus, wo ni aku kangkasii én toro makailek kamang witu u Nuwu' Lé'os itii.

²⁴ Kata'uan niouo sa sé tou witu um pahlolowaan ing kumara', esa uman si makailek ung kukulu, zozo' im péléng kimiit i mahlolowaan. Niitumo, mahtututu'la i mahlolowaan wo mamakailek ung kukulu.

²⁵ Sé tou kumiit i mahlolowaan é léwo'zéi' makaezen a lelo néra im wana am péléng, wo séra toro makailek ung kukulu wia ung kaayahan u maléwo' uman. Taan ni kita mahlolowaan i makailek kukulu un zéi'kan maléwo'.

²⁶ Niitumo, ni aku zéi'kan mahkara' in zéi'kan siapa um papatoroan. Wo ni aku zéi'kan si mahsondo' wayaan uman ung kasondo'an.

²⁷ Taan ni aku mahtututu' i mahnanaram un touku wo toro kumiit ang ginenangku, wo sa aku nimakawoka'mola u Nuwu' Lé'os tumoro si Kristus wia sé tou, tia' wo ni aku si zéi'kan wangun i makailek ung kukulu.