1 Korintus 8 - Taaz Weru Witu u Nunuwu'en Tombulu

Tumoro a méiragés wia sé opo-opo

¹ Tarékan ni aku kumuama tumoro a lé'ona méiragés wia sé opo-opo. Ung kata'uanta, “Ni kita péléng ém wéwéhano ang kata'uan.” Ang kata'uan tanu niitu nimangun si tou nimaloozan, taan u rumaraaté é mahenté' un até ni tou.

² Sa wéwéhan tou mahgenangla ni sia ém wéwéhano un totoz kata'uan, un ulitna ni sia én zéi'kampé' tahlous mata'u.

³ Taan si tou rumaraaté si Opo Empung, ni sia éng kata'uan ni Opo Empung.

⁴ In tarékan ni aku é mingkot am peligauen né katuari in téntii, “Toro wé ing kuman a lé'ona mémoiragés wia sé opo-opo?” Tanu ung kata'uantamo, “Zéi'kan siapa sé opo-opo wia ung kaayahan, wo si Opo Empung én esa uman, zéi'kan siapa walina.”

⁵ Zozo' im witi kasendukan wo wia ung kaayahan é lakez sé pahkuan “opo-opo” wo sé pahkuan “mahpiara”, sé pahongkotan né tou,

⁶ taan im wia ni kita: si Opo Empung én esa uman, ni Siamo si Ama'ta. Ni Sia si nimangun péléng am péléng wo pahpaan ni Sia kita menou-nou. Si Mahpiara én esa uman, ni Sia é si Yesus Kristus. Pahpaano ni Sia am wangunen péléng am péléng, pahpaano ni Sia ni kita én toro menou-nou.

⁷ Maan in téntu, zéi'kan péléng sé tou ma'éman é mata'u sa sé opo-opo itii én zéi'kan siapa torona. Wéwéhan sé tou im puuna é mahongkot wia sé opo-opo taan in tarékan ma'émano wia si Yesus. Taan makaz in tarékan ni séra mahgenangpé' sa a lé'ona mémoiragés wia sé opo-opo, niitu éng kakanen né opo-opo. Sa séra kumanla niitu, witu ung genang néra, ni séra é nimangunola a singkéla', pahpaan ni séra é ma'émanpé' wia sé opo-opo wo um pa'émanen néra wia si Yesus én zéi'kampé' enté'.

⁸ Ang kakanen én zéi'kan mahwangun ni kita ing kalelezna wia si Opo Empung. Ni kita ing kiman ang kakanen mémoiragés wia sé opo-opo, zéi'kan siapa u méikaawesé wia ni kita. Tentu kangkasii ni kita in zéi'kan kiman ang kakanen mémoiragés wia sé opo-opo, zéi'kan siapa u nimaina'mé wia ni kita.

⁹ Zozo' kamu toro kuman péleng ang kakanen, taan mile-ilek én taa kamu maéndo raraung wia sé katuari zéi'kampé' enté' um pa'émanen néra.

¹⁰ Niitu én téntii: ni kamu é mata'umo im péléng ang kakanen én toro kanen. Taan sa wéwéhan tou si zéi'kampé' enté' um pa'émanenna mileka ni kamu i mahkan witi walé pahragésan wia sé opo-opo, si tou itii én ikakiit im paaz kuman ang kakanen méiragéso wia sé opo-opo.

¹¹ Karia in téntu si tou zéi'kampé' enté' um pa'émanenna én ikaléwo' pahpaan ang kata'uan niou. Un ulitna ni sia éng katuari niou esa pa'émanen wo si Kristus kangkasii nimaté wia ni sia.

¹² Sa ko mangunla a singkéla' tanu niitu wia sé katuari ma'émano wo mangun ung genang weresi néra i rumara, ni ko é nimangunola u singkéla' wia si Kristus.

¹³ Niitumo, sa ung kakanen u maéndo raraung wia sé katuariku esa pa'émanen, ni aku é soomo kuman u lé'ona itii makaz ing kauré-uré, wo ni aku én zéi'kan maéndo raraung wia sé katuari esa pa'émanen.