1 Korintus 7 - Taaz Weru Witu u Nunuwu'en Tombulu

A sésésa wia sé tou kimawéngo wo sé zéi'kampé' kimawéng

¹ In tarékan tumoro a méipantik nioué wia ni aku, i si tuama ém wangun in zéi'kan kimawéng. Kiit ung genangku niitu ém wangun,

² taan wo zéi'kan mangun u samek, tawimo si tuama ém wéwéhan mahayo, téntu kangkasii si wéwéné ém wéwéhan mahayo.

³ Si tuama én totoz mahwangunla wia si mahayona un toro uman pahwangunen né sana séndé'. Téntu kangkasii si wéwéné im wia si mahayona.

⁴ Si wéwéné kinawéngo, un awakna én zéi'mo anuna in esa taan anumo ni mahayona, téntu kangkasii si tuama kimawéngo un awakna én zéi'mo anuna taan anumo ni mahayona.

⁵ Wia sé sana séndé', mahwangunla an toro uman pahwangunen né sana séndé'. Toro in zéi'kan mahwangun niana sa ni kamu zua nimaesaanola, taan tia'mo tahlous uré, wo kamu wéwéhan oras i mengaléi. Kumawusa niitu, ni kamu é mahwali-walila sumaup, wo si tonaas né sétang zéi'kan menou ni kamu, pahpaan ni kamu zéi'kan makaezen u lelo un awak niou.

⁶ U méikuakuma én zéi'kan perénta, taan sésésa wia ni kamu.

⁷ Kapaazku péléng sé tou é masarla ni aku in zéi'kan kimawéng, taan zéi'kan péléng sé tou én tinambéran in zéi'kan kumawéng. Pahpaan wia si esa wo si esa ém wéwéhan u méitambér ni Opo Empung. Wia si esa tinambéran ang kenu, wia sé walina én tinambéran ang kenuma.

⁸ Taan in tarékan, ikuakuma wia sé zéi'kampé' kimawéng wo wia sé wéwéné mahesa-esamokan, tawimo ni kamu zéi'kan kimawéng tanu ni aku.

⁹ Taan sa séra zéi'kan makaezen u lelo un awak néra, tawimo séra ing kumawéngla. Pahpaan tawimo séra ing kimawéng én taa séra zézéhan u lelo néra itii.

¹⁰ Wia sé tou kimawéngo, wéwéhan um perénta, zéi'kan peréntaku taan perénta ni Mahpiara, “Tia' si wéwéné makamahayo tuma'sa si mahayona.”

¹¹ Sa si wéwéné makamahayo tuma'sala si mahayona, ni sia é léwo'zéi' i menou-nou zéi'kan kumawéng sumaup. Kaapa ni sia taré é mawuriala sumaup karia ni mahayona. Téntu kangkasii si tuama makamahayo, zéi'kan toro tuma'sa si mahayona.

¹² In tarékan én ikuakuma wia sé walina, zéi'kan si Mahpiara si kimua: sa wéwéhan si tuama ma'éman wia si Kristus makamahayo si wéwéné zéi'kampé' ma'éman, taan si mahayona itii ém paaz mahwali-wali kariana, si tuama itii én zéi'kan toro tuma'sa si mahayona itii.

¹³ Wo sa wéwéhan si wéwéné ma'éman wia si Kristus makamahayo si zéi'kampé' ma'éman, taan si mahayona itii ém paaz mahwali-wali kariana, si wéwéné itii én tia'mo tuma'sa si mahayona itii.

¹⁴ Pahpaan si tuama zéi'kampé' ma'éman én toro malenas ing kimawéngla karia ni mahayona si ma'émano, tentu kangkasii si wéwéné zéi'kampé' ma'éman toro malenas ing kimawéngla karia ni mahayona si ma'émano. Sa zéi'kan téntu, sé koki' néra én zéi'kan malenas, taan in tarékan sé koki' itii é nimalenaso.

¹⁵ Taan sa si tuama kaapa si wéwéné zéi'kampé' ma'éman é mahtututu' in tuma'sa, iwayamola séra in tuma'sa. Un tanu niitu, si katuari wéwéné kaapa si katuari tuama ma'émano én zéi'kan sinéro', pahpaan ni kamu én tinawah ni Opo Empung menou-nou karia i mahlé'o-lé'osan.

¹⁶ Pahpaan zéi'kampé' kata'uannu, é ni ko wéwéné ma'émano, sa si mahayomu si zéi'kampé' ma'éman ém woo toro akerennu makaz sia ipilot im witu un ukuman wana a singkéla'na. Téntu kangkasii ni ko, in tuama ma'émano, zéi'kampé' kata'uannu sa si mahayomu si zéi'kampé' ma'éman ém woo toro akerennu makaz sia ipilot im witu un ukuman wana a singkéla'na.

Menou-noula tanu in taré tawahela ni Opo Empung

¹⁷ Tumondong niitu, si esa wo si esa é mimekla ung katou-touanna mengiit un tinotozo ni Mahpiara i ni sia taré tawahela ni Opo Empung a ma'éman. Niitu én tinotozku wia péléng sé jamaat.

¹⁸ Téntii un tinotoz itii: sa si tou sinunato an tawahela ni Opo Empung ing kumiit ni Sia, tia' si tou itii mahtututu' i mahwuwuni am walulangna i sinunat. Téntu kangkasii sa si tou zéi'kan sinunat an tawahela ni Opo Empung ing kumiit ni Sia, si tou itii én tia'mo mekisunat.

¹⁹ Pahpaan sinunat kaapa zéi'kan sinunat én zéi'kan siapa torona. Um wéwéhan torona é mahkiit a méiperénta ni Opo Empung.

²⁰ Niitumo, ung katou-touan ni esa wo ni esa én tanupé' ung katou-touanna in taré tawahela ni Opo Empung a ma'éman wia ni Sia.

²¹ Tia'mo ikasusamu sa ko ata an tawahela ni Opo Empung ing kumiit ni Sia. Taan sa ko winéhan un oras in zéi'mo ata né tou walina, éndola un oras itii.

²² Pahpaan, si ata si tinawahmo ni Mahpiara, ni sia é mémoipiloté ni Mahpiara. Taan si zéi'mo ata an tawahela ni Kristus, ni sia én atamo ni Kristus.

²³ Ni kamu én tineleso wo pinakawaéro ni Opo Empung. Niitumo, ni kamu én tia'mo maéndo ata né tou.

²⁴ Katuari-katuari, kuramo ung katou-touan ni esa wo ni esa in taré tawahela ni Opo Empung, téntumo ung katou-touan niou i memali-mali karia ni Opo Empung.

²⁵ In tarékan u méipantikku én tumoro sé tou zéi'kampé' kimawéng. Tumoro niitu, ni aku én zéi'kan nimakailek um perénta ni Mahpiara. Taan zozo' in téntu, ni aku si tou toro pa'émanen niou pahpaan u raraatéan ni Opo Empung é méhéma u sésésa wia ni séra.

²⁶ Ung genangku én téntii: pahpaan ung kasusaan é mahmualimo, tawimo ung katou-touan niou én téntumo, tanu ung katou-touan niou in tarékan.

²⁷ Sa ko tuama kimawéngo, tia' penutu'ennu in tuma'sa si wéwéné mahayomu. Sa ko tuama zéi'kampé' kimawéng, tia'mo mahtututu' ing kumawéng.

²⁸ Taan sa ko kumawéngla, ni ko én zéi'kan nimangun a singkéla'. Téntu kangkasii, si raraha sa kumawéngla, ni sia én zéi'kan nimangun a singkéla'. Taan sé tou kimawéngla itii, witu ung katou-touan kenu, ni séra é mamendan ang kasusaan. Ung kapaazku ni kamu én zéi'kan mamendan ang kasusaan itii.

²⁹ Katuari-katuari! Ung kalakoan u méikuakuma itii én téntii: un endo kaakazan ung kaayahan én zéi'mo uré. Niitumo puunala niitu mamuali, si tuama wéwéhano mahayo wangunenola in tanu ni sia zéi'kampé' siapa mahayo.

³⁰ Wo sé tou mahamé' tia'mo megena-genang ang kinawalian néra i mahamé'. Sé tou mahké'ké' tia'mo megena-genang a nimangun ni séra i mahké'ké'. Sé tou wéwéhan an tineles tia'mo megena-genang sa an tineles itii én anu néra.

³¹ Wo sé tou mahpaké uman am pemandungen wia ung kaayahan, tia'mo megena-genang i mahpaké niana, pahpaan ung kaayahan wo péléng am wia ung kaayahan é mazéi'.

³² Ung kapaazku, ni kamu én zéi'kan siapa an ikaarét. Si tuama zéi'kan siapa mahayo, um pegena-genangenna um pahpaayangen wia si Mahpiara, pahpaan u lelona é mangun si Mahpiara i mahpaa-paaz.

³³ Taan si tuama wéwéhan mahayo, megena-genang uman am pemandungen wia ung kaayahan, pahpaan u lelona é mangun si mahayona i mahpaa-paaz.

³⁴ Pahpaano niitu am pegena-genangenna é nimawéténg. Si wéwéné zéi'kan siapa mahayo wo si raraha, ni séra én totoz uman megena-genang i mahpaayang wia si Mahpiara, makaz un awak wo si roh néra é méiwéhé uman wia si Mahpiara. Taan si wéwéné wéwéhan mahayo, um pegena-genangenna ém pemandungen wia ung kaayahan, pahpaan u lelona é mangun si mahayona i mahpaa-paaz.

³⁵ Niana péléng é méikuakuma i sumawang ni kamu. Zéi'kan mahapé-apé' ang kapaaz niou, taan ung kapaazku zéi'kan siapa a mahraung ni kamu i mahwangun an ulit, wo i mahpaayang wia si Mahpiara én zéi'kan siapa u mahraung.

³⁶ Sa si tuama gumenangla i ni sia é nimangunola un zéi'kan wangun wia si kalé'osna wo si kalé'osna éng katu'anamo, tawimo séra kumawéngla, niitu én zéi'kan singkéla'.

³⁷ Taan sa wéwéhan si tuama makaezen u lelona, a sia makagena-genangla an tumotozla in zéi'kan kumawéng karia ni kalé'osna wo zéi'kan siapa si menutu' ni sia in zéi'kan kumawéng, ni sia é nimangunola um wangun.

³⁸ Niitumo, si tuama kumawéng si kalé'osna é nimangun u lé'os, taan u lumé'ospé'mé niitu, si tuama én zéi'kan kumawéng si kalé'osna.

U sésésa wia sé wéwéné mahesa-esamokan

³⁹ Si wéwéné kimawéngo én anu ni mahayona sa si mahayona menou-noupé'. Sa si mahayona nimatémoma, si wéwéné itii én zéi'mo anu ni mahayona. Sa si wéwéné zéi'mo siapa mahayo itii paaz kumawéng, ni sia én toro kumaweng karia ni kapaazna, asal uman si tuama itii é ma'éman.

⁴⁰ Taan sa ikiit ung ginenangku, u mahpaa-paaz ni wéwéné mahesa-esamokan itii é lumouspé'mé sa sia zéi'kan kumawéng sumaup. Ni aku simésa téntu pahpaan ni aku éng kinawasa ni Roh ni Opo Empung.