1 Korintus 5 - Taaz Weru Witu u Nunuwu'en Tombulu

A singkéla' am wia sé jamaat

¹ Wéwéhan sé tou mahkua, im wia ni kamu in jamaat ém wéwéhan si mahsamek karia ni mahayo ni ama'na si zéi'kan totoz ina'na. An téntu én zéi'kan mahmuali zozo'pé' im wia sé tou sé zéi'kampé' mata'u si Opo Empung.

² Zozo' im wia ni kamu ém wéwéhan si tou mahwangun u léwo'an téntu taan ni kamu mapailek uman taré ung kaloozan niou. Un até niou é léwo'zéi' i rumara pahpaan si tou mahsamek itii, wo ni sia én ipekiondolé im wia ni kamu.

³ Pahpaan zozo' ni aku zou'mé im wia ni kamu taan ni kamu ém pegena-genangengku, tanumokan ni aku é memali-mali karia niou. Niitumo, ni aku éng genangenola tanu a memali-mali karia niou. Um wangunengku, karia ung ngaran ni Yesus Mahpiara, si tou itii én ukumengku.

⁴ Sa kamu nimaréwok, genangenola ung genangku é memali-mali karia niou karia ung kawasa ni Yesus Mahpiarata,

⁵ ni kamu én totoz méhéla si tou itii wia si tonaas né sétang, wo un awakna é maléwo'. Karia in téntu si rohna én ipiloté im witu un ukuman wana a singkéla', im witu un oras si Yesus Mahpiara i mawurimé sumaup.

⁶ Ni kamu én zéi'kan wangun im wera'. Kata'uan niouo ung kukuan kenu, “U ragi toyo' é mangun um wangunen roti i sumegahmé.”

⁷ Pahpaan u ragi én tanu a singkéla' niou. Niitumo, itia'mola u ragi uré itii makaz ni kamu én tanu um wangunen roti zéi'kan rinagian un taré pakasemborena. Kata'uangku ni kamu én ulit téntu. Pahpaan im witu un endo mahpésta né tou Yahudi, ni séra é mahkeriz domba in iragés. In tarékan si Kristus si nimaéndo domba Paskah éng kinerizola an iragés.

⁸ Niitumo, mémo kita lumé'os um pésta karia u roti zéi'kan rinagian, un tumuzu'mé am pahwangunenta én uli-ulit mahondolé im witu un até wo mahkiit uman an tutuzu' ulit. Tia'mo mahpésta karia u roti winéhan u ragi uré, ung kalakoana én tia'mo memua-muali a singkéla'.

⁹ Witu um pinantikku i makasa, ni aku éng kimuamo wia ni kamu in tia' mahkari-karia sé tou samek.

¹⁰ Ung kalakoan an ipahkuaku én zéi'kan matu ni kamu in zumou'mé im wia péléng sé tou samek, kaapa sé tou angkum, kaapa sé tou tantowo, kaapa sé tou mahsigi' sé opo-opo. Pahpaan sa téntu, ni kamu é léwo'zéi' in tumula'uma ung kaayahan kenu.

¹¹ Ung kalakoan a méikuaku itii én tia' mahkari-karia sé tou mahkua ing katuari esa pa'émanen, taan ni sia é mahsamek, kaapa ni sia én angkum, kaapa mahsigi' sé opo-opo, kaapa mahtawuruk sé tou walina, kaapa matetewelen, kaapa tantowo. Maan i mahkan mahwali-wali karia néra én tia'.

¹² Pahpaan zéi'kan paayangengku i mahtotoz ulit kaapa zéi'kan am pahwangunen né zéi'kan jamaat ni Opo Empung. Taan im wia ni kamu sé jamaat ni Opo Empung, zéi'kankuaa ni kamu sé mahtotoz am pahwangunen né jamaat niou?

¹³ Si Opo Empung uman si tumotoz am pahwangunen né zéi'kan jamaat-Na. Pahpaan witu um Pinantik Lenas é méipantik in téntii, “Iwohoma im wia ni kamu sé tou léwo'.”