1 Korintus 4 - Taaz Weru Witu u Nunuwu'en Tombulu

Ni kai én ata ni Kristus

¹ Kapaazku ni kamu mahgenangla i ni kai én ata ni Kristus, sé winéhan um paayangen i mahtuzu' ang ginenang ni Opo Empung an zéi'kampé' kata'uan né tou wia ung kaayahan.

² Niitumo, un totoz pahaléien wia sé mahpaa-paayang-Na én uli-ulit mahpaayang am paayangen néra.

³ Taan sa ni aku pahtotozen niou ulit kaapa zéi'kan, kaapa ipahwali witi pahtotozan ulit kaapa zéi'kan am pahwangunen né tou, niana én zéi'kan pahwéhangku genang. Lumouspé'tarémé niitu, ni aku én zéi'kan tumotoz ulit kaapa zéi'kan un touku in esa.

⁴ Pahpaan ung kata'uangku, ni aku én zéi'kan siapa a sinala'. Taan zozo' in téntu, ni aku én zéi'kan kumuama i ni aku én zéi'kan siapa a sinala'. Si toro tumotoz ni aku im wéwéhan a sinala' kaapa zéi'kan é si Yesus Mahpiara uman.

⁵ Niitumo, ni kamu én tia'mo mahtotoz si tou simala' kaapa zéi'kan, niitu én zéi'kampé' orasna. Un orasna é si Mahpiara i mawurimé sumaup. In toro niitu, péléng an ipahwuni-wuni wana ang karimbengbengan én ipapailek-Na. Ituzu'-Na péléng ang ginenang ni tou. Tumondong niitu si esa wo si esa é loozen ni Opo Empung mengiité am pinahwanguna.

⁶ Katuari-katuari, ni aku é nimantik un tumoro ni aku wo si Apolos i maéndo kékéréan niou. Ni kai zua nimaéndo kékéréan niou in tumuzu' ni kamu wo kamu toro mata'u ung kukuan kenu, “Mahkiitla am méipantik witu um Pinantik Lenas”, wo tia' im wia ni kamu wéwéhan sé meloo-looz un touna karia i mahpuu-puuna si tou esa im wia sé tou walina.

⁷ Séi si nimangun i ni kopé' si ipahpuu-puuna taan sé tou walina? Zéi'kankuaa péléng an anumu é méitambér umané ni Opo Empung wia ni ko? Kaa ko mahloo-looz an anumu, tanumokan niana péléng éng kinailekannu in esa?

⁸ Ni kamu mahgenangla péléng am pemandungen niou ém wutulo, ni kamu mahgenangla ém wa'ilano, ni kamu mahgenangla éng kolanomo. Mengalé-ngaléi, sa kamu uli-ulit nimaéndomo kolano, maan ni kai é maéndo kolano karia niou.

⁹ Pahpaan pahgenangengkula, un totoz wawa', niitu u méiwéhé ni Opo Empung wia ni kai in aatu-Na. Ni kai é nimaéndomo tanu sé tou tinotozo im wunu'en wo maéndo iileken makaké'ké'en né tou wia ung kaayahan wo né malaekat.

¹⁰ Ni kai ém pahkuan né tou i lemou pahpaan ni kai é ma'éman wia si Kristus, taan ni kamu é mahgenangla in tou totoz tulap pahpaan i ma'éman wia si Kristus. Ni kai én zéi'kan enté', taan ni kamu én enté'. Ni kai én ipahwawa-wawa', taan ni kamu ém pahsigi'en né tou.

¹¹ Makaz in endo kenu ni kai é maharem, maré'o, zéi'kan siapa karai sawelen, pahzézéhan wo wayaan uman un ento'an,

¹² wo ni kai é mahpaayang am papaayangen wutez karia a lengen nai i mahwuwutul am pemandungen nai i mendo-endo. Zozo' ni kai ipahsalou né tou, ni kai é mahaléi wia si Opo Empung ing kumamangé ni séra; zozo' ni kai ém pahzézéhan né tou taan ni kai én ezen i mengali niitu.

¹³ Sa wéwéhan tou mahtawuruk ni kai, ni kai é mahnuwu' wangun wia ni séra. Makaz in tarékan ni kai én tanu an ileken nérala i rimberek wuul im wia ung kaayahan, masuat wo a makazi'zisen im wia péléng sé tou.

¹⁴ Ni aku i nimantik ang kenu an iwéhéma wia ni kamu, zéi'kan i mapaiza-izang ni kamu, taan i suméro' ni kamu, pahpaan ni kamu én tanumokan sé oki'ku, sé ikararaatéku.

¹⁵ Pahpaan ni aku si nimaéndo ama' niou, zozo' sé nimahtuzu' ni kamu tumoro si Kristus ém woo mariwu-riwu tou. Ni aku si nimaéndo ama' im witu ung katou-touan niou i mahkiit si Kristus Yesus, pahpaan ni aku si nimahalimé wia ni kamu u Nuwu' Lé'os tumoro si Kristus.

¹⁶ Niitumo pahaléiengku wia ni kamu, mahkéréla wana am pahwangunengku.

¹⁷ Pahpaano niitu si Timotius méiatukuma i mangé wia ni kamu. Ni sia én tou ma'éman wia si Opo Empung, ni sia én tanumokan oki'ku totoz ikararaatéku wo ni sia ém pa'émanengku. Ni sia si mapagenang wia ni kamu kura ung katou-touangku i nimaesa karia ni Kristus Yesus, tanu a méipahtuzu'ku wia sé jamaat wisa uman um pahwéha-wéhan néra.

¹⁸ Taan sé woopira im wia ni kamu é nimawera'mo, kuan néra ni aku én zéi'mo mémilek ni kamu.

¹⁹ Taan sa énéané ni Opo Empung, zéi'mo uré ni aku é mamileké ni kamu. Karia in téntu toro kata'uangkula ang kaenté'an né tou wera' itii, zéi'kan uman an ipahkua néra.

²⁰ Pahpaan sa kita uli-ulit nimaéndomo tou witi Kakolanoan ni Opo Empung, im wana am pahwangunenta ni kita mapailek wia sé tou ung kawasa ni Opo Empung, zéi'kan wana am pakahnuwu'ta.

²¹ Niitumo méléngla wisa ung kapaaz niou im wangunengku! Apa kapaaz niou sa aku méyé é mukum ni kamu, kaapa ni aku mapailek u raraatéangku wo ni kamu ém pahlé'o-lé'osengku uman?