1 Korintus 2 - Taaz Weru Witu u Nunuwu'en Tombulu

Si Yesus Kristus sinalip i milot ni kita im witu un ukuman wana a singkéla'ta

¹ Katuari-katuari. I ni aku nimangémé wia ni kamu a mahwoka' un zéi'kampé' kata'uan niou tumoro si Opo Empung, ni aku én zéi'kan mahnuwu' wia ni kamu karia a nuwu' tariis pahtalingan kaapa karia ung katulapan né tou.

² Pahpaan karegas ni aku i memali-malipé' karia niou, ni aku é mahkua umana wia ni kamu un tumoro si Yesus Kristus, si sinalip i miloté ni kita im witu un ukuman wana a singkéla'ta. Ni aku én timotozola in zéi'mo kumua am walina wia ni kamu.

³ Ni aku i memali-malipé' karia niou, pahpendanengkula un touku én zéi'kan enté' wo ni aku én totoz maindé' makaz i mahgerger.

⁴ A méipahwoka'ku én zéi'kan tanu a méipahwoka' né tou tulap i mahenou ni kamu, taan an ipahwoka'ku éng karia ung ketez méiwéhémé ni Roh Lenas.

⁵ Karia in téntu, um pa'émanen niou én zéi'kan mahéré' uman witu ung katulapan ni tou, taan mahéré' uman witu ung kawasa ni Opo Empung.

Ang Katulapan ni Opo Empung

⁶ Zozo' in téntu, im wia sé tou totozo lutu' i ma'éman, ni aku éng kimuamoma ung katulapan. Ung katulapan itii é méyé zéi'kan wia ung kaayahan kaapa wia sé mahkawasa wia ung kaayahan kenu sé mazéi'en.

⁷ Taan an ipahwoka' nai itii éng katulapan ni Opo Empung a méikawunipé' wo zéi'kampé' kata'uan. Ang katulapan ni Opo Empung itii é niimek-Namo puunala ung kaayahan kenu im winangun. Niitu ém winangun ni Opo Empung wo kita sigi'en wo loozen.

⁸ Zéi'kan siapa im wia sé mahkawasa wia ung kaayahan kenu sé mata'u ung katulapan ni Opo Empung itii. Pahpaan sa kata'uan néramo ung katulapan itii, si Yesus Mahpiara si pahloozen wo pahsigi'en én zéi'kan sinalip néra.

⁹ Tanu u méipantik witu um Pinantik Lenas, in téntii, “Un zéi'kampé' pinahile-ilekla, pinahtali-talingala wo kagenanganla né tou, é niimeko ni Opo Empung wia sé tou rumaraaté ni Sia.”

¹⁰ Niitumo, si Roh ni Opo Empung mémapata'u wia ni kita, péléng ang ginenang-Na itii. Si Roh ni Opo Empung, si mahtata'u péléng am péléng, makaz a méikawunipé' um wia si Opo Empung.

¹¹ Pahpaan séi si tou mata'u um pegena-genangenna, sa zéi'kan si roh si wia ni siakan? Téntu kangkasii si Opo Empung, si mata'u am pegena-genangen-Na é si Roh-Na uman.

¹² Si roh wia ni kita é si roh méiwéhémé ni Opo Empung, si zéi'kan wia ung kaayahan kenu a méyé. Niitumo, ni kita én toro mata'u a méitambér ni Opo Empung wia ni kita.

¹³ Ni kai i mahtuzu' wia ni kamu sé wéwéhano si Roh Lenas an tumoro si Opo Empung én zéi'kan mahkiit ung katulapan né tou, taan mahkiit uman ung katulapan ni Roh ni Opo Empung.

¹⁴ Taan si tou zéi'kan siapa Roh ni Opo Empung é soo tumalinga an ipahtuzu' ni Roh ni Opo Empung, pahpaan niitu ém pahkuana ing kalemouan. An ipahkua ni Roh ni Opo Empung én zéi'kan kata'uanna, niitu é makata'uannamokan sa si Roh ni Opo Empung sumawang ni sia i mata'u niitu.

¹⁵ Si tou wéwéhan si Roh ni Opo Empung én toro mata'u wisa un ulit wo wisa un zéi'kan ulit, taan zéi'kan siapa tou toro tumotoz i ni sia én ulit kaapa zéi'kan.

¹⁶ Pahpaan u méipantik witu um Pinantik Lenas én téntii, “Séi si makawawa i mata'u um pegena-genangen ni Opo Empung? Séi si toro sumésa wia ni Sia?” Taan ni kita i ma'émano, um pakahgena-genangta én tanumo um pakahgena-genang ni Kristus.