1 Korintus 14 - Taaz Weru Witu u Nunuwu'en Tombulu

Mahtututu'la i makailek an tatambér ni Roh Lenas

¹ Mahtututu'la i rumaraaté sé tou walina wo mahtututu'la i makailek an tatambér ni Roh Lenas. Un totoz ipahpuu-puuna im pahtututu'en niou én tatambér makawawa i mahkua wia sé tou a méikuamé ni Opo Empung wia ni kamu.

² Wo si tou tinambéran u makawawa i mahnuwu' a nunuwu'en un akaz uman si Roh Lenas si mata'u, ni sia én zéi'kan mahnuwu' wia sé tou taan mahnuwu' wia si Opo Empung. Zéi'kan siapa tou si mata'u u nunuwu'en itii, pahpaan ni sia éng kinawasa ni Roh Lenas akaz ni sia mahnuwu' an zéi'kampé' kata'uan né tou.

³ Taan sa si tou tinambéran u makawawa i mahkua wia sé tou a méikuamé ni Opo Empung wia ni sia, an ipahkuana wia sé tou é mahenté' um pa'émanen, mahsésa wo mahenté' un até néra.

⁴ Wo si tou tinambéran u makawawa i mahnuwu' karia a nunuwu'en un akaz uman si Roh Lenas si mata'u, ni sia é mahenté' uman un touna. Taan si tou tinambéran u makawawa i mahkua wia sé tou a méikuamé ni Opo Empung wia ni sia, ni sia é mahenté' um pa'émanen né jamaat.

⁵ Kapaazku, ni kamu péléng in jamaat én tambérané u makawawa i mahnuwu' karia a nunuwu'en un akaz uman si Roh Lenas si mata'u. Taan un totozpé' kasii kapaazku, ni kamu én tinambéran u makawawa i mahkua wia sé tou u méikuamé ni Opo Empung wia ni kamu. Pahpaan si tou makawawa i mahkua wia sé tou a méikuamé ni Opo Empung wia ni sia, ni siapé' si wéwéhan torona im wia sé jamaat taan si tou mahnuwu' karia a nunuwu'en un akaz uman si Roh Lenas si mata'u. Taan sa si tou mahnuwu' karia a nunuwu'en un akaz uman si Roh Lenas si mata'u wo mahkua ung kalakoan a nunuwu'en itii, ni sia én toro mahenté' um pa'émanen né jamaat.

⁶ Niitumo katuari-katuari, sa aku méyé wia ni kamu wo aku mahnuwu' wia ni kamu karia a nunuwu'en un akaz uman si Roh Lenas si mata'u, tantumo zéi'kan kalakoan niou um pahnuwu'engku itii. Taan tawimo aku mahnuwu' wia ni kamu karia a nunuwu'en un toro kata'uan niou, i mahkua tumoro a méiwunipé' ni Opo Empung, kaapa ang kata'uan, kaapa mahkua wia ni kamu a méikuamé ni Opo Empung wia ni aku, kaapa an tutuzu'.

⁷ Tanumo um peloit wo ung kecapi, zéi'kan menou-nou, taan toro ipahzani. Kura wo kata'uan né tou ung kakantaren pahzanin sa um peloit wo ung kecapi ém wayaan uman kaléongan?

⁸ Kaapa um pontuang ipahtawah sé suraro i makumoro', sa itu wayaan uman i sengon, kura sé suraro itii i mata'u i ni séra ém pahtawahen i makumoro'?

⁹ Téntu kangkasii ni kamu, sa kamu mahnuwu' karia a nunuwu'en un akaz uman si Roh Lenas si mata'u, sé tou pahnuwu'an niou én zéi'kan mata'u an ipahkua niou. Sa téntu zéi'kan siapa torona an ipahkua niou itii, niitu é masuat uman wo ni kamu mahnuwu' witu u reges.

¹⁰ Wia ung kaayahan kenu én totoz lakez a nunuwu'en né tou wo zéi'kan siapa a nunuwu'en an ipahkuamé an zéi'kan siapa ung kalakoana.

¹¹ Taan sa wéwéhan tou mahnuwu' wia ni aku karia u nunuwu'enna, wo un ipahkuana én zéi'kan kata'uangku, si tou itii éng kuangku in tou limepuh umané wo si tou itii éng kumua ni aku i limepuh umané.

¹² Téntu kangkasii ni kamu, mahtututu'la i makailek an tatambér ni Roh Lenas. Lumouspé'mé niitu, pahtututu'enla wo u méitambér ni Roh Lenas wia ni kamu itii én toro mahenté' um pa'émanen né jamaat.

¹³ Niitumo, séi si mahnuwu' karia u nunuwu'en un akaz uman si Roh Lenas si mata'u, mengaléila wo sia tambérané u makawawa i mahkua ung kalakoan an ipahkuana.

¹⁴ Pahpaan sa ni aku mengaléi karia u nunuwu'en un akaz uman si Roh Lenas si mata'u, si rohku uman si mengaléi zéi'kan karia ung genangku.

¹⁵ Niitumo, apa um wangunengku? Um wangunengku é si rohku i mengaléi karia u nunuwu'en un akaz uman si Roh Lenas si mata'u, ni aku kasii mengaléi karia u nunuwu'en ung kata'uangku. Ung kapaazku si rohku ing kumantar mahlooz karia u nunuwu'en un akaz uman si Roh Lenas si mata'u, ni aku kasii éng kumantar mahlooz karia u nunuwu'en ung kata'uangku.

¹⁶ Pahpaan, sa si rohmu kumua u makasé wia si Opo Empung karia u nunuwu'en un akaz uman si Roh Lenas si mata'u, un zéi'kan kata'uan ni tou mahtalinga niitu, kura si tou itii toro kumua ‘amin’?

¹⁷ Pahpaan zozo' in totoz wangun ni kamu ing kimua u makasé wia si Opo Empung, taan un zéi'kan kata'uan né tou walina, niitu én zéi'kan nimenté' un até né tou timalinga u méikuamumé itii.

¹⁸ Ni aku éng kimua u makasé wia si Opo Empung, pahpaan niakupé' si makalakez mahnuwu' karia u nunuwu'en un akaz uman si Roh Lenas si mata'u niitu taan ni kamu.

¹⁹ Taan sa ni aku mahtuzu' sé jamaat i ni séra mahragés, ung kapaazkupé' é mahkua a lima nuwu' ang kata'uan in tumuzu' sé tou walina kangkasii, taan ni aku ing kumua mariwu-riwu nuwu' witu u nunuwu'en un akaz uman si Roh Lenas si mata'u.

²⁰ Katuari-katuari, tia' um pakahgena-genang niou én tanu um pakahgena-genang né koki'. Im wana a léwo'an masarola um pakahgena-genang né koki' sé zéi'kampé' mata'u a léwo'an. Taan um pakahgena-genang niou é masarola um pakahgena-genang né tu'amo!

²¹ Im witu un ukum Torat é méipantik u Nuwu' ni Opo Empung, “Mengiité sé tou mahnuwu' karia u nunuwu'en walina, ni Aku é numuwu' wia sé tou-Ku kenu, Taan zozo' in téntu, ni séra én totoz soo in tumalinga ni Aku.”

²² Niitumo, sa si tou tinambéran u makawawa i mahnuwu' karia u nunuwu'en un akaz uman si Roh Lenas si mata'u, niitu un tumuzu'mé ung kawasa ni Opo Empung wia sé tou zéi'kan ma'éman wia ni Sia, zéi'kan wia sé tou ma'émano. Taan sa si tou tinambéran u makawawa i mahkua wia sé tou a méikuamé ni Opo Empung wia ni sia, niitu un tumuzu'mé ung kawasa ni Opo Empung wia sé tou ma'émano, zéi'kan wia sé tou zéi'kan ma'éman.

²³ Niitumo, sa péléng sé jamaat nimaréwok a si esa wo si esa mahnuwu' karia u nunuwu'en un akaz uman si Roh Lenas si mata'u, a muntepé si tou zéi'kan méikauntep wia sé jamaat wo si tou zéi'kampé' ma'éman wia si Mahpiara, tantu ni kamu éng kuan néra im pahléla'en.

²⁴ Taan sa kamu mahkua wia sé tou a méikuamé ni Opo Empung wia ni kamu, a méyé si tou zéi'kan ma'éman kaapa si tou zéi'kan méikauntep wia sé jamaat, a si tou itii tumalinga péléng an ipahkua niou, an ipahkua niou itii é mangun ni sia mata'u i ni sia é mahwangun a singkéla' wo an ipahkua niou itii é mangun ni sia mata'u i ni sia é léwo'zéi' in ukumen.

²⁵ Wo péléng a méikawuni witu un aténa é makata'uanna. Niitumo sia kumuruzla a mongkot wo mahsigi' si Opo Empung ang kumua, “Totoz ulit, si Opo Empung ém witu un unez niou.”

Mahkiitla an tinotoz i mahragés

²⁶ Katuari-katuari, kura in tarékan? Sa kamu nimaréwok i mahragés, um wangun si esa wo si esa é méndola katoroan tanu ang kenu: wéwéhan sé mahkantar ang kakantaren mahlooz si Opo Empung, wéwéhan sé mahtuzu', wéwéhan sé mahkua ung kalakoan tumoro u méiwunipé' ni Opo Empung, wéwéhan sé mahnuwu' karia u nunuwu'en un akaz uman si Roh Lenas si mata'u wo sé walina é mahkua ung kalakoan u nunuwu'en itii. Taan péléng niana é léwo'zéi' mahenté' um pa'émanen né tou.

²⁷ Sa wéwéhan im wia ni kamu si mahnuwu' karia u nunuwu'en un akaz uman si Roh Lenas si mata'u, tawimo sé zua tou kaapa zéi'kan lumakezé sé telu tou i numuwu'. Ni séra én tia' mahwali i mahnuwu', ni séra é mahta'sa i mahnuwu' wia sé tou wo léwo'zéi' im wéwéhan si tou makawawa mahkua wia sé tou ung kalakoan un ipahkua néra itii.

²⁸ Taan sa im wia ni kamu én zéi'kan siapa si tinambéran ni Roh Lenas u makawawa i mahkua wia sé jamaat ung kalakoan u nunuwu'en itii, si tou tinambéran u makawawa i mahnuwu' karia u nunuwu'en un akaz uman si Roh Lenas si mata'u niitu, tawimo sia menesla im witu um pahréwo-réwokan né jamaat wo mahnuwu' uman witu un aténa in esa wo wia si Opo Empung.

²⁹ Téntu kasii sé tou mahwoka' a méikuamé ni Opo Empung. Tawimo im wia ni séra, sé zua kaapa telu tou sé mahkua wia sé tou a méikuamé ni Opo Empung wia ni séra wo pahtata'un né walina an ipahkua itii, ulit kaapa zéi'kan.

³⁰ Sa karegas i mahnuwu' am wéwéhan im witu si tou makawawa ing kumua tumoro a méiwunipé' ni Opo Empung, si tou karegas i mahnuwu' éng kumana'pé'la wo si tou makawawa ing kumua tumoro a méiwunipé' ni Opo Empung itii é numuwu'ma.

³¹ Pahpaan ni kamu péléng é makawawa i mahkua wia sé tou a méikuamé ni Opo Empung wia ni kamu. Taan sa kamu mahkua niana, ni kamu é mahta'sa i mahkua wia sé tou, wo kamu péléng én toro mahtata'u wo kasii um pa'émanen niou éng kaenté'na.

³² Sé tou tinambéran u mahkua a méikuamé ni Opo Empung, ni séra é makawawa ing kumua a méikuamé ni Opo Empung wia ni séra wo kasii toro i ma'ento' un oras ing kumua a méikuamé ni Opo Empung.

³³ Pahpaan si Opo Empung é soo un zéi'kan siapa kaimekan, ung kapaaz-Na é matu'tul.

³⁴ Tanu péléng am pahwangunen né jamaat sé linenas ni Opo Empung, sé wéwéné im wana am pahréwo-réwokan né jamaat i mahragés é rimumez makapenes wo mahtalinga wia si mahnuwu' witu um pahréwo-réwokan itii. Ni séra zéi'kan toro numuwu'. Téntu u méipantik witu un ukum Torat.

³⁵ Sa wéwéhan um pahtata'un ni wéwéné, mangémokan ligauenna wia si mahayona sa witimo walé. Pahpaan zéi'kan wangun sa si wéwéné mahnuwu' witu um pahréwo-réwokan né jamaat.

³⁶ U Nuwu' ni Opo Empung ém wia ni kamu wé a méyé? Kaapa iwéhé uman wia ni kamu wé?

³⁷ Sa wéwéhan tou mahkua i ni sia é nabi, kaapa tinambéran ni Roh Lenas, ni sia é léwo'zéi' mata'u sa péléng am pinantikku kenu ém perénta ni Mahpiara.

³⁸ Taan sa niitu zéi'kan pandungenna, tia'mo pandungen niou sia.

³⁹ Niitumo, katuari-katuariku, mahtututu'la wo kamu makailek un tatambér mahkua a méikuamé ni Opo Empung. Tia' pahséro'en niou sé tou tinambéran u makawawa i mahnuwu' karia u nunuwu'en un akaz uman si Roh Lenas si mata'u.

⁴⁰ Taan sa kamu mahragés, péléng am péléng ém pahimekela lé'os wo pahtu'tulela.