ZEFANYA 1 - WUKE SUSI WATTI'U AL᷊AL᷊USASSA

¹ Zefanya uddewe ana'i Kusyi. Tal᷊attaddu pallaṛṛitene wua bowa ire'e eteudde Kusyi, Gedalya, Amazia wuṛṛu Ratu Hizkia. Eteindi tanatan Mawu si Zefanya sutempo Ratu Yosia ana'i Amon uaparenta su Yehuda.

Allon pallaṛṛuungngu Mawu

² Mawu nabbisara, “I Ya'u sarun manggohakku al᷊awo'u saranapa su runia:

³ anambon taumata wuṛṛu winatangnga, nasutta manu'u winalanganna wuṛṛu inassa. Taumata lal᷊eo sarun Ta'u pateanna. Anambon umattu taumata sarun insuenanna, tawe saran sangkatou apan Ta'u iwala wiakka. I Ya'u, Mawu, buatte nabbisara.

⁴ I Ya'u sarun makkuumannu tumana'u Yerusalem wuṛṛu ahewallu Yehuda. Manga lamben pasasubbanna si Baal sarun Ta'u iapawul᷊i wuassu manga tampa udde. Manga iman apan mangngimbe si Baal sarun timbul᷊iananna atonna-tonna.

⁵ I Ya'u sarun manahangginna ma'oman sara mawaresi isai-isai apan niumawitta su atuppa tadea'u massubba matannallo, wul᷊anna wuṛṛu manga anumpitanna. Sarun Ta'u iapaawul᷊i i mangitou lai apan massubba si Ya'u wuṛṛu massalu matuṛṛutta si Ya'u, arawe lai massalu ringannu arannu Monganna Milkom.

⁶ I Ya'u sarun mamate si mangitou apan tawe nirumanta ringang-Ku ara'e maddorongnga aehe-U wuṛṛu apan buatte nanantang-Ku wuṛṛu maddirite lai tumantalongnga si Ya'u.”

⁷ Allon Mawu maranite, su allo udde Ruata sarun mamanara; ana waugu udde, paatammudde watangannu su sarua-Ne. Mawu uariahite mamate uman-Ne ere sasamba aonggolla wuṛṛu i Tou buatte namanggo manga seettu Yehuda.

⁸ “Su allon pamamate udde,” wisaran Mawu, “I Ya'u sarun makkuumannu manga tembonanne, manga umbasanna ana'u ratu, wuṛṛu anambon taumata apan mappaamattu lal᷊aghun taumata raho.

⁹ I Ya'u sarun makkuumannu anambon taumata apan mattaṛṛamawu ere taumata apan tawe maailal᷊a si Ya'u, wuṛṛu apan nanna'o see mammate tadea'u malloṛṛo wal᷊en mawune ringannu manga saranapa apan niaṛṛo.”

¹⁰ “Su allo udde,” aroddi wisaran Mawu, “sarun aringiṛṛanna lal᷊allu su Ngaran Inassa. Tingikku lal᷊uai sarun aringiṛṛanna wuassu ampungnga wakku, wuṛṛu tingikku ahahohakka wahewalla sarun rumallu'a wuassu manga wuidda.

¹¹ Lalluaite wuṛṛu sassangitte sutempo i yamiu maaringikka udde ei tumana'u soa su wageangnge wowa, ana waugu anambon mabbawal᷊u'a wuṛṛu manga taumata apan mappaawallassu roitta buatte nate nipate!

¹² Sutempo udde i Ya'u sarun manganu sasol᷊oanna, wuṛṛu mamarikissa Yerusalem. Sarun Ta'u iṛṛuumanna tumanangnge apan uapapadua udde see apan mammungan batanganne sassane, wuṛṛu apan maṛṛingidda manungku i Ya'u, Mawu tawe mammanara arendi ara'e aroddi.

¹³ Darotongngi mangitou sarun aṛṛoanna wuṛṛu manga wal᷊en mangitou sarun ṛimunsaanna. I mangitou sarun mapararisikku wal᷊en, arawe tawe matana'a. I mangitou sarun mabbaillu anggore arawe tawe ma'inumma ua'en anggore.”

¹⁴ Allon pallaṛṛuungngu Mawu maranite, ore, marani-ranite, manungku sarun dumanta ringannu mal᷊ihakka. Allo udde napenen atataddu'a, na'oman sara manga tantara apan atohasanne lai sarun sumal᷊iomanna ana waugu niasueannu ṛingidda!

¹⁵ Allo udde allon asasa'u, asasahadda wuṛṛu asasusa, allon ahahokka wuṛṛu araṛṛimunsa'a, allon ararandumma wuṛṛu mal᷊abbukka, allo apan marandumma wuṛṛu pia ṛawu'a.

¹⁶ Su al᷊o'engngu allo udde aringiṛṛanne tingikku trompetta wuṛṛu hahoressan pangalo wuassu manga atumannaṛṛanne apan mammangalo manga soa pia tanda'a watune wuṛṛu manga candi matanggakka.

¹⁷ Mawu nabbisara, “I Ya'u sarun mandantan manambo asasilaka su umattu taumata, na'oman sara i mangitou sarun uasasaṛṛipo ere taumata wuta. I mangitou sarun ma'ola'a rosa si Ya'u, wuṛṛu orassa indi daṛṛan mangitou. Sarun mabboso ere ua'e, wuṛṛu manga winal᷊unanni mangitou sarun mawukku'a su leta'a.”

¹⁸ Su allo apan maata'utta udde Mawu sarun mapal᷊iatta'u asasa'u-Ne, ne anambon wul᷊awanna wuṛṛu sal᷊a'an mangitou tawe maasal᷊amatta si mangitou. Ahewallu runia sarun maṛṛimunsa'a abbi soṛṛowannu putungngu asasa'u-Ne. Ringannu tawe niaṛṛangngo i Tou sarun manawutta anambon niawa su runia indi.