ZAKARIA 7 - WUKE SUSI WATTI'U AL᷊AL᷊USASSA

Mawu mapaasal᷊an puasa tawe tutune

¹ Su allo aiappanne wul᷊anna Kislew, eteudde wul᷊anna assione, sulal᷊ummu tonna aiappanne i Ratu Darius uaparenta, Mawu nangonggollu tanata apia si ya'u.

² Tumana'u Betel buatte nandolokki Serezer wuṛṛu i Regem-Melekh see manga mallal᷊aṛṛenggene inai watukku Wal᷊en Apan Leembontaṛṛino tadea'u maddorongnga al᷊aman-Ne.

³ I mangitou lai nirolokka niapaiwal᷊o su manga imam wuṛṛu manga nabi, arendi, “Ta'e lai ṛinone i yamiu lumuain ahahohakku Wal᷊en Mawu ringannu mappuasa suapan bul᷊anna al᷊imane ere buatte niola'i yami manga pira tonna al᷊aannune?”

⁴ Eteindi tanatan Mawu apan nirumanta ringangku.

⁵ Wisara-Ne, “Wal᷊oa'e su anambon tumana'u wanua indi wuṛṛu su manga imam, manungku puassa wuṛṛu lal᷊uai apan niola'i mangitou su wul᷊anna al᷊imane wuṛṛu appitune al᷊annune pitun pol᷊o su tonnane indi wal᷊inewe aaddatta si Ya'u.

⁶ Wuṛṛu lai sutempo i mangitou u'anna ma'inumma, i mangitou maddea'a haussannu watanganni mangitou sassane.”

⁷ Eteudde apan niwal᷊on Mawu wuassu manga nabi sutempo nal᷊iu sutempo Yerusalem ta'e atatanaanna wuṛṛu tumanangnge su lal᷊umanna'a. Sutempo udde taumata wal᷊ine tumba'u uatana'a su manga ampungnga maranin soa arawe lai su wageangngu timukka wuṛṛu su wawal᷊annu manga wuidda su samba'an baṛṛetta.

Pananalare pangillul᷊eanne niwuangnga

⁸ Mawu Apan Lembontaṛṛino nangonggollu tanata indi si ya'u,

⁹ “Manga pira tonna nal᷊iu i Ya'u nangonggollu manga parenta indi su uma-Ku, ‘I yamiu ṛinone mabbiakka su atatul᷊idda, paa'akkanna wuṛṛu masaṛṛionto'a su sansul᷊ungngu.

¹⁰ Imbaṛṛangnga mangallangnga manga wawine wal᷊u, al᷊aṛṛana'a asisin timpal᷊ussa, manga taumata raho apan namanua su pattangnganni yamiu, ara'e isai-sai apan sulal᷊ummu awussa. Wuṛṛu imbaṛṛangnga lai manggolagu al᷊al᷊eo su saruannu sansul᷊ungu.’

¹¹ Arawe uma-U puane maattikka wuṛṛu mangke maddiri maddaringikka; i mangitou mannapingnga tal᷊inga mangitou ana see tawe maaringikka.

¹² I mangitou mangngattikku naungngi mangitou na'oman sara ere aattikku watu. I Ya'u tumaniten nasa'u ana waugu i mangitou tawe tumuṛṛutta manga al᷊aṛṛa'a apan buatte Ta'u nionggolla si mangitou wuassu manga nabi apan paarorone.

¹³ I Ya'u tawe sumimbakka aal᷊iomanni mangitou, ana waugu i mangitou lai tawe maddaringikka sutempo i Ya'u mabbisara.

¹⁴ Naal᷊ihidda tandi'a, i Ya'u nanahangginna si mangitou na'oman sara i mangitou niwata'a mamanua su manga wanua waine. Leta'a apan masuwukka indi nabbal᷊ite mal᷊annabba tawe tumatanangnge wuṛṛu lol᷊okka.”