ZAKARIA 6 - WUKE SUSI WATTI'U AL᷊AL᷊USASSA

Sondappa su ola'u appatta keretan pangalo

¹ I ya'u naasomba sondappa apan baine. Paassa indi i ya'u naasilo appattu wua keretan pangalo sinumabbangnga wuassu wallattu darua wowone witu'a.

² Manga kereta udde wawol᷊engannu passampare awal᷊o, apan paarorone awal᷊o maṛṛamu, wuṛṛu aruane awal᷊o ma'itumma,

³ iapa atallune awal᷊o mawira wuṛṛu iapa aippanne woṛṛenganna.

⁴ I ya'u naiwal᷊o su mala'ekatta udde, “Tuangnga, apa atappasanne manga keretan pangalo indi?”

⁵ I tou sinumimbakka, “I mangitou inai umamatta watukku appatta lal᷊anna napawe buatte sinumaruanna Mawu ul᷊ilim pati'uppa.

⁶ Keretan pangalo apan wawol᷊engannu awal᷊o ma'itumma inai watukku Babel su sawannakka. Awal᷊o mawira watukku waṛṛatta wuṛṛu awal᷊o boṛṛenganna mattudda watukku araratuanna su timukka.”

⁷ Napawe awal᷊o boṛṛenganna udde sinumabbangnga, i mangitou aellehanna tate masabbare inai mamarikissa runia. Mala'ekatta udde nabbisara, “Roote pamarikissa runia!” Wua'udde i mangitou inaite.

⁸ Wua'udde mala'ekatta udde nabbisara si ya'u, “Awal᷊o apan inai watukku Babel udde buatte napa'ompo'u asasa'u Mawu.”

Parenta tadea'u Yosua luṛṛeannu Mahkota

⁹ Mawu nangonggollu tanata indi si ya'u.

¹⁰ Wisara-Ne, “Anute sasamba apan nionggolli Heldai, i Tobia wuṛṛu i Yedaya, eteudde manga taumata apan wakkute nawelengnga wuassu pamamuanganna su Babel. Apire'e inawarendi sasamba mangitou udde su wal᷊en Yosia ana'i Zefanya.

¹¹ Wuassu wul᷊awanna wuṛṛu sal᷊a'a aonggolli mangitou udde, pa'ola'e sambau mahkota wuṛṛu luṛṛea'e su pua Imam Bahewa Yosua ana'i Yozadak.

¹² Wal᷊oa'a si tou manungku i Ya'u Mawu Apan Lembontaṛṛino nabbisara, ‘Taumata apan isassaggo Sambau Solla, sarun maauntungnga su tampa i tou i tou uatana'a wuṛṛu i tou sarun mapararisikku apia Wal᷊en Mawu.

¹³ Ete i tou apan mapararisikku Wal᷊e-U wuṛṛu manengkamma aaddatta ere sangkatou ratu, wuṛṛu i tou sarun mamarenta tumanangnge. sangkatou imam sarun mallal᷊ima si tou wuṛṛu i mangitou sarun mammanara suadio'a ringannu uaaukka.’

¹⁴ Mahkota udde sahipunanna su Wal᷊e-U tadea'u ipannaungnga si Heldai, si Tobia, wuṛṛu si Yosia.

¹⁵ Manga taumata sarun dumanta wuassu tampa apan marau wuṛṛu mantul᷊ungnga mapararisikku Wal᷊e-U. Napawe wal᷊en udde nasuete, i mangitou sarun maasingkatta manungku i Ya'u Mawu Apan Lembontaṛṛino nandolokku ringanni mangitou. Sarangkanambone udde sarun mariaddi amungkangngu i mangitou atonna-tonna tuttuṛṛutta manga parenta-U, Mawu Ruata Mangitou.”