ZAKARIA 5 - WUKE SUSI WATTI'U AL᷊AL᷊USASSA

Sondappa su ola'u wuke lal᷊ul᷊unanna apan tinumalla'a

¹ I ya'u nanutukka apia, wuṛṛu paassa indi i ya'u naasilo sambau wuke lal᷊ul᷊unanna tinumalla'a watukku winalanganna.

² Mala'ekatta naiwal᷊o apa apan niasiloangku. Sasimba'u, “Sambau wuke lal᷊ul᷊unanna tinumalla'a watukku winalanganna. Al᷊o'engnge si'o metere wuṛṛu al᷊alakke appatta setenga metere.”

³ Wua'udde i tou nabbisara si ya'u, “Su wuke lal᷊ul᷊unanna udde uawoṛṛetta wawontoga su ahewallu wanua indi. Su ul᷊appane paarorone uawoṛṛetta manungku suapan taṛṛa ta'o sarun iapasabbangnga wuassu wanua indi. Wuṛṛu su sangkulappa waine uawoṛṛetta manungku suapan taumata apan massalu awusu lai sarun iapasabbangnga.

⁴ Mawu Apan Lembontaṛṛino nabbisara manungku wawontoga udde sarun iamang-Nge suwal᷊en taumata taṛṛa ta'o wuṛṛu wal᷊en taumata massalu awusu. Manga wal᷊e udde sidutu sarun aṛṛinoannu wawontoga udde maddatingngu mabbal᷊i manga winal᷊alanna.”

Sondappa su ola'u wawine sulal᷊ummu sal᷊angka

⁵ Mala'ekatta sinumabbangnga apia wuṛṛu nabbisara, “Pa'ellege! Piaddu lai apan nirumanta!”

⁶ “Apa udde?” aiwal᷊o'u. Sasimbakke, “Sambau salangka. Uddewe waneṛṛan paddarosa wuassu ahewallu wanua indi.”

⁷ Sal᷊angka udde pia laluubbe wuassu tima. Tantal᷊anna ta'u tattutuṛṛanna, laluubbe udde nawengketta wuṛṛu inauranna sulal᷊ummu sal᷊angka udde ua'ianna sangkatou wawine.

⁸ Mala'ekatta udde nabbisara, “Wawine indi eteudde waneṛṛan al᷊al᷊eo.” Ana see wawine udde nitaddilla apia sulal᷊ummu sal᷊angka wuṛṛu niluuwannu sal᷊angka udde.

⁹ I ya'u naningngara wuṛṛu naasilo darua wawine tuttalla'a watukku ringangku. Itarua pia papaidde apan matohassa ere papaiddu waṛṛoa. Sal᷊angka tanginna nianun tarua see niapiddi tarua timulla'a.

¹⁰ I ya'u naiwal᷊o su mala'ekatta udde, “Watukkuapa itarua nangapiddu sal᷊angka udde?”

¹¹ Sasimbakke, “Watukku Babel, poiaroddi itarua sarun mapararisikku kuilli tarua. Napawe kuilla udde nasuete, sal᷊angka udde sarun iaddo isudde tadea'u sassubbanna.”