ZAKARIA 2 - WUKE SUSI WATTI'U AL᷊AL᷊USASSA

Sondappa su ola'u tal᷊i auukka

¹ Sulal᷊ummu sondappa manansunna i ya'u naasilo sangkatou esakka apan uaagassa tal᷊i auukka.

² I ya'u niawal᷊o, “Inai watukkuapa?” “Inai manguukka Yerusalem,” sasimbakke, “i ya'u mappulu maasingkatta pira al᷊o'engnge wuṛṛu al᷊alakku soa udde.”

³ Wua'udde i ya'u naasilo mala'ekkatta apan buatte nabbisara si ya'u udde, inumamatta, wuṛṛu sangkatou mala'ekatta waine naisasombane.

⁴ Mala'ekatta paarorone nabbisara su mala'ekatta aruane, “Roote paal᷊ihakka ringannu umbasanna udde, wuṛṛu wal᷊oa'a si tou manungku Yerusalem sarun masaddattu taumata wuṛṛu winatangnga papadul᷊iananna na'oman sara tawe mariaddi olaanna darandungnga ipamaliwutta.

⁵ Mawu buatte naddiandi manungku i Tou sassane sarun maola'a darandungnga putungnga apan uapal᷊iwutta soa udde tadea'u mallu'adda wuṛṛu i Tou sarun matana'a poiaroddi sulal᷊ummu al᷊awo'u taṛṛino wuṛṛu awawantu-Ne.”

Manga taumata niwuangnga niwagoanna mapul᷊e

^6-7 Mawu nabbisara su uman-Ne, “I Ya'u buatte nanal᷊iawukki yamiu su al᷊awo'u pappi'uanne. Arawe orassa indi ei manga taumata niwuangnga, tal᷊angke wuassu Babel wuṛṛu pabbelengke su Yerusalem.

⁸ Isai apan mamangalo si yamiu, namangalo tatuno naungku.” Ne Mawu Apan Lembontaṛṛino nandalo'u mamasingkattu tanata indi su manga walahanna apan buatte nangaṛṛo uman-Ne,

⁹ “Mawu sassane sarun mando'appa si yamiu! Wuṛṛu i yamiu sarun pangaṛṛoannu manga allangngu dorone. Amungkangngu olangnge udde mariaddi, i yamiu sarun maasingkatta manungku Mawu Apan Lembontaṛṛino buatte nandolo'u.”

¹⁰ Mawu nabbisara, “Pangantarite ringannu lullala'a ei tumana'u Yerusalem! I ya'u sarun matana'a su pattangngannu!”

¹¹ Sutempo udde manambo walahanna sarun dumanta ringannu Mawu tadea'u maola'a uman-Ne. I Tou sarun matana'a suwallatti yamiu, wuṛṛu i yamiu sarun maasingkatta manungku Mawu buatte nandolo'u ringanni yamiu.

¹² Paassa lai Yehuda sarun maola'a pussa'a Mawu apan apianne su letang-Ne apan susi, wuṛṛu Yerusalem sarun maola'a soa apan lembon arangnguan-Ne.

¹³ Paal᷊annabbe i yamiu sarangkanambone su saruannu Mawu! Ana waugu i Tou buatte nanantangngu tampa wawanuan-Ne su surga.