ZAKARIA 12 - WUKE SUSI WATTI'U AL᷊AL᷊USASSA

Yerusalem sarun iapaasal᷊amatta

¹ Eteindi tanatan Mawu su ola'u Israel. Mawu apan namataddu langitta, nandiaddi runia nangonggollu wiakka su taumata nabbisara,

² “Yerusalem naal᷊ihidda piala apan lal᷊oṛṛoannu anggore; manga wanua al᷊indonganne sarun ma'inumma wuṛṛu sumassendekka ere taumata wu'anna. Wuṛṛu napawe Yerusalem pangaloanna, manga soa wanua Yehuda apan lambene, sarun pangaloanna lai.

³ Arawe amungkangngu allo udde nia'omante, i Ya'u sarun ma'ola'a Yerusalem ere watu apan mawakkatta; al᷊awo'u walahanna apan maannamma mamengketta sarun maasomba silaka. Anambon balahanna su runia sarun maamulla mamangalo Yerusalem.

⁴ Su allo udde anambon awal᷊o Ta'u olaanna nial᷊iwune wuṛṛu manga sumasa'ene Ta'u olaanna wewa, tumana'u Yehuda Ta'u lu'aranna, arawe anambon awal᷊on seenne Ta'u iapaawuta.

⁵ Wua'udde manga amonannu Yehuda sarun mabbisara sulal᷊ummu naungnga, “Ete Mawu Apan Lembontaṛṛino apan nangonggollu atatohassa su uman-Ne apan uatana'a su Yerusalem.”

⁶ Su allo udde manga amonannu Yehuda sarun Ta'u olaanna ere putungnga sulal᷊ummu anambon anutungnga ara'e sasol᷊oanna lukkenggamma su al᷊ungngu wal᷊a'an ganduma; i mangitou sarun mamate manga walahanna su al᷊indonganne. Arawe tumana'u Yerusalem sarun sidutu uatana'a sulal᷊ummu soa ringannu matammudda.

⁷ I Ya'u, Mawu, apan paarorone mangonggollu auntunganna su tantaran Yehuda, tadea'u aaddata apan nisengkammu papapulunni Daud see tumana'u Yerusalem tawe manampaliu aaddatta apan nisengkammu tumana'u Yehuda waine.

⁸ Su allo udde i Ya'u sarun mallu'adda tumana'u Yerusalem; wuṛṛu iapa al᷊omeanne lai suwallatti mangitou sarun maola'a ere atohassi Daud. I mangitou sarun ehetannu papapulunni Daud ere lai mala'eka-U, ewe'e lai ere i Ya'u sassane.

⁹ Su allo udde i Ya'u sarun mamate suapan balahana apan maannamma mamangalo Yerusalem.

¹⁰ Wua'udde papapulunni Daud see tumana'u Yerusalem sarun Ta'u onggol᷊annu naungnga masingkatta umakkanna wuṛṛu mappulu umal᷊iomanna. I mangitou sarun ma'ellega si tou apan buatte niusu'i mangitou wuṛṛu lumallu ere taumata lulluain anangnge man sambau. I mangitou sarun lumallu ringannu sussangitta, naal᷊ihidda ere taumata apan niawul᷊iannu ana'a pahul᷊u.

¹¹ Su allo udde sarun pia lal᷊uai apan wahewallu su Yerusalem, naal᷊ihidda nilumuain Hadad-Rimon su Walahannu Megido.

^12-14 Wua'udde suapan amonanna su wanua udde sarun lumuai passangkatou; amonanna papapulunni Daud, amonanna papapulunni Natan, amonanna papapulunni Lewi, amonanna papapulunni Simei, wuṛṛu anambon amonanna waine. Suapan amonanna sarun lumuai sassane-sassane, wuṛṛu ingana'a esakka wuassu apan amonanna sarun lumuai ual᷊aṛṛae ringanni ngana'a wawine.”