YUNUS 3 - WUKE SUSI WATTI'U AL᷊AL᷊USASSA

I Yunus tinumuṛṛutta Mawu

¹ Su aruane Mawu nabbisara si Yunus.

² Wisara-Ne, “Roote watukku Niniwe, soa wahewalla udde, wuṛṛu wal᷊oa'e su tumanangnge, tanata apan Ta'u nionggolla si'o.”

³ Ne Yunus tinumuṛṛutta Mawu wuṛṛu inaite watukku Niniwe, sambau soa apan tumaniten bahewalla, na'oman sara pandumanna tallu allo ipamal᷊iwutta soa udde.

⁴ Yunus sinumutta su soa udde wuṛṛu napawe buatte niumamatta su al᷊o'engngu allo, i tou mannattakke mannase, wisarane, “Appatu pul᷊o su allone lai, Niniwe sarun maṛṛimunsa'a!”

⁵ Tumana'u Niniwe mangngimanna tanatan Duata udde. Anambon tumanangnge nakkawessa tadea'u mappuasa, wuṛṛu anambon taumata, mawae timmadde ara'e lai dario'a, malluṛṛen nasa karongnga ipamasingkatta manungku i mangitou sinumassillu manga rosan mangitou.

⁶ Sutempo ratun Niniwe naaringikka watti'a udde, i tou nasasaṛṛawutta sinumossokka wuassu adderan araratuanne. I tou nalluatta juban araratuanne wuṛṛu nalluṛṛe nasa karongnga, see niuma'ianna su wowon awu.

⁷ I tou lai niumal᷊iatan tanata indi, “Parenta indi niapasabbangnga su Niniwe wuassu inaapuannu ratu wuṛṛu manga tembonanne; Anambon taumata, sapi, domba wuṛṛu winatangnga papadul᷊iananna waine imbaṛṛangnga umanna wuṛṛu ma'inumma.

⁸ Taumata wuṛṛu winatangnga ṛinone mappaattu nasa karongnga. Maola'a tatialan sasassillu anambon taumata ṛinone umal᷊iomanna ringannu atonna-tonna su Ruata. I mangitou ṛinone mangapia pallal᷊agune apan dal᷊eo wuṛṛu inolaanne apan nepenen dosa.

⁹ Asinungka Ruata sarun mamal᷊u ṛingiran-Ne wuṛṛu tate masa'u apia na'oman sara i ite tawe mate!”

¹⁰ Ruata na'ellega inolaanni mangitou; i Tou naasilo manungku i mangitou buatte nanantangngu inolaanni mangitou apan dal᷊eo. Ne i Tou namal᷊u ṛiin-Ne, wuṛṛu tate nariaddi hakkuumanni mangitou.