YUNUS 2 - WUKE SUSI WATTI'U AL᷊AL᷊USASSA

Aal᷊iomanni Yunus

¹ Wuassu lal᷊ummu tiannu inassa udde, Yunus niumal᷊iomanna su Mawu Ruatane. Wisarane,

² “Oh Mawu, sulal᷊ummu asasusa'u i ya'u sumalande Si'o wuṛṛu I'o sinumimbakka si ya'u. Wuassu runian taumata nate i ya'u naddorongnga aontolla, sasal᷊ande'u niraringiṛṛan-Nu wuṛṛu niellehan-Nu.

³ Watukku tampa apan mal᷊al᷊umma i ya'u niwareta-Nu, naddatingngu ṛanassu tahal᷊oangnga. Poiaroddi saggan tahal᷊oangnga uapaliwutta si ya'u, lua'a wuṛṛu tandi'a mangke mallombo'u.

⁴ Sulal᷊ummu naungku i ya'u nabbisara; Mawu buatte nallimbuakka si ya'u wuassu saruan-Ne. I ya'u tate maasilo apia wal᷊en atatanaan-Ne apan susi.

⁵ Ua'e tahal᷊oangnga nawitta sara wiwi'u laudda mal᷊alangnga uapal᷊iwutta ahewallu waddangku, ahurangannu tahal᷊oangnga namul᷊issa pua'u.

^6-7 I ya'u tinumumpa naddatingngu wantan panenteanna, watukku runia apan ngarane uaṛṛuudda sara panguddusannu tempo. Niawa'u mangke nallome sulal᷊ummu waddangku, ana see i ya'u naanaungnga wuṛṛu sinumal᷊ande Si'o. Ne aal᷊iomangku na'omate ringan-Nu sulal᷊ummu Wal᷊en-Ne apan na'uakkassa. Ana see I'o nabbatunna si ya'u wuassu lal᷊ummu tahal᷊oangnga, oh Mawu Ruata'u!

⁸ Manga masasubba paal᷊uanna apan tawe gunane, nanantangngu Mawu wuṛṛu tate tumuṛṛutta.

⁹ Arawe i ya'u sarun mangantarin manga daralo Si'o wuṛṛu i ya'u mangonggollu sasamba Si'o. Anambon paaire'u sarun ta'u olanna. Ete I'o Mawu apan mannal᷊amatta.”

¹⁰ Wua'udde, wuassu parentan Mawu, inassa udde nalluan Yunus su ammaranne.