YOSUA 9 - WUKE SUSI WATTI'U AL᷊AL᷊USASSA

Manga taumatan Gibeon namahia si Yosua

¹ Watti'a su ola'u manga auntungannu Israel tinumelengke su anambon ratu su samba'an baṛṛata Sal᷊ukku Yordan – su panenteanna, su wawal᷊annu wowone, wuṛṛu su leta'a su al᷊o'engngu apannu Tahal᷊oanga Tangane ma'oman sara araune su Wowon Libanon su samba'an sawannaka; eteudde manga ratun Het, Amori, Kanaan, Feris, Hewi wuṛṛu Yebus.

² Manga ratu udde na'ire wuṛṛu na'ammula inai mamangalo si Yosua wuṛṛu ṛuangannu Israel.

³ Arawe manga taumatan Gibeon wuassu walahanni Hewi naaringike inolaanni Yosua su Yerikho wuṛṛu Ai.

⁴ Ana see i mangitou na'ire mamahia si Yosua ringannu nalluranna su keledai mangitou: manga karonga tabbe, wuṛṛu manga pato'an anggore apan nal᷊al᷊eote wuṛṛu niola'a wuassu pisi. Wuṛṛu maola'a wal᷊unna, i mangitou tumba'u nanaddia.

⁵ Roti apan namarate wuṛṛu niwungante. I mangitou ual᷊uṛṛen laubba apan nahahesa'a see sapatu apan tabbete wuṛṛu pia darappele.

⁶ Ringannu olange aroddi i mangitou inaite naisasomban i Yosua su paddasananna su Gilgal ana see nabbisara si tou wuṛṛu su manga taumatan Israel, “Yami nirumanta wuassu wanua marau mappulu ma'ola'a pa'aire ringannu manga Tuangnga.”

⁷ Arawe manga taumatan Israel sinumimbakka, “Ipa'ura yami ma'ola'a pa'aire ringanni yamiu? Asinungka atatanaanni yamiu tumba'u marani isindi!”

⁸ I mangitou nabbisara, “Yami mal᷊uassa mammanara al᷊awo'u manara apan irolokki Tuangnga.” “I yamiu isai? wuṛṛu wuassu wanua suapa?” aiwal᷊on Yosua si mangitou.

⁹ I mangitou sinumimbakka, “Yami nirumanta wuassu wanua apan marau atonna, Tuanga, ana waugu yami naaringikka su ola'u Mawu Ruata apan sasubbannu manga Tuanga. Yami naaringikka anambon inolaanne su Mesir,

¹⁰ wuṛṛu su ola'u apa apan niolange su saruannu ruan katou ratun Amori su samba'an da'in Yordan eteudde i Sihon ratun Hesybon wuṛṛu i Og ratun Basan apan uatana'a su Asytarot.

¹¹ Manga piaṛṛange wuṛṛu anambon tumana'u wanuan kami nanaddia wal᷊unni yami inawarea maisasomba manga Tuanga, wuṛṛu mamasingkatta manungku yami masuṛṛubawa su manga Tuanga. Ana waugu udde, yami sumal᷊ande asasaṛṛionto'u naungngu manga Tuanga tadea'u ma'ola'a pa'aire ringanni yami.

¹² Manga Tuanga, pa'ellego roti wal᷊unni yami indi. Su tempo yami inawarendi, roti indi ta'e mal᷊oso. Arawe orassa indi, pa'ellege! Namarate wuṛṛu niwungante.

¹³ Wuṛṛu manga pato'an anggore indi ta'e wakku su tempo yami nalloṛṛo; arawe orassa indi, pa'ellege! Nahahesa'e. Laubbi yami wuṛṛu sapatun kami nahahoakka ana waugu amatanna apan marau indi.”

¹⁴ Ne manga taumatan Israel nanengkama addio'a wiakku taumatan Gibeon udde, wuṛṛu tawe naiwal᷊o Mawu su ola'u hatto udde.

¹⁵ I Yosua na'ola'e paddariandi pagahahawe ringannu manga taumatan Gibeon udde, wuṛṛu na'ire manungku tawe mamate si mangitou. Manga piaṛṛa'u Israel lai nassalu manipussa pa'aire udde.

^16-17 Arawe natualage, su allo atallune wua na'ola'a pa'aire udde, taumatan Israel na'omate su soa Gibeon, Kefira, Beerot wuṛṛu Kiryat-Yearim su leta'u manga taumata udde. Ne wakkute niasingkatanna manungku atatanaanni mangitou tawe marau wuassu Gilgal.

¹⁸ Arawe taumatan Israel tawe maapamate si mangitou, ana waugu manga piaṛṛa'u Israel buatte nassalu si mangitou sulal᷊ummu arannu Mawu Ruatan Israel. Anambon taumatan Israel sussamboṛṛen olangnge udde su manga piaṛṛa'i mangitou.

¹⁹ Arawe manga piaṛṛange udde sinumimbakka, “Olaannawe ereapa naola'e! Yami buatte naddiandi si mangitou ringannu nassalu sulal᷊ummu arannu Mawu Ruatan Israel. Orassa indi i ite tawe wotonge mandal᷊eo si mangitou.

²⁰ I ite tawe wotonge mamate si mangitou ana waugu i ite buatte na'ire; wuṛṛu amungkangu i ite nabbasangkalu pa'aire udde Ruata sarun maṛṛuumanni ite.

²¹ Nariaddi wala'e aroddi, i mangitou mabbiakka, arawe i mangitou olaanni ite mallaṛṛappo alu wuṛṛu mamamasanna ua'en kite sarangkanambone.” Ete aroddi darolokku manga piaṛṛange udde.

²² Ana see manga taumatan Gibeon udde niwagoanna sinumaruanna si Yosua. I Yosua nabbisara, “Anio i yamiu namahia si yami wuṛṛu nabatti'a manungku wanuanu marau atonna, wutte'e tumba'u isindi?

²³ Ana waugu inolaanni yamiu aroddi, Ruata maṛṛuumanni yamiu. Walahannu sidutu maola'a allanga, mallaṛṛappo alu wuṛṛu mamamasanna ua'e su Wal᷊en Duata'u.”

²⁴ I mangitou sinumimbakka, “Yami nangawusu aroddi ana waugu yami naaringikka manungku Mawu Ruata apan sassubbanni Tuanga udde buatte nandolokki Musa, allang-Nge udde, nangonggola si Tuangnga ahewallu wanua indi wuṛṛu iapapate anambon tumanange su tempo i Tuanga manganu leta'a udde. I yami mangke matta'utta amungkangu i yami lai pateanna, ana waugu udde i yami na'ola'a sarangkanambone udde.

²⁵ Orassa indi yami sulal᷊ummu taṛṛinon Tuangnga. Ola'e i yami tumuṛṛutu aellegi Tuangnga udde mapia.”

²⁶ Ne indi niola'i Yosua: I tou nallu'adda manga taumata udde wuṛṛu tawe namalan taumatan Israel mamate si mangitou.

²⁷ Arawe i mangitou niola'a allanga eteudde mallaṛṛappo alu wuṛṛu mamasanna ua'en taumatan Israel wuṛṛu mezbah Mawu. Na'oman sara orassa indi i mangitou ta'e mammanara manara udde su tampa apan nipile Mawu maola'a tampa patataṛṛamawuanna su Mawu.