YOSUA 8 - WUKE SUSI WATTI'U AL᷊AL᷊USASSA

Soa Ai niaaṛṛo wuṛṛu nirṛṛimunsa'a

¹ Mawu nabbisara si Yosua, “Ammul᷊a'e tantaranu wuṛṛu roote ringanni mangitou watukku Ai. Arie suminggawanga wuṛṛu arie mata'utta! I Ya'u sarun mangonggolu auntunganna si yamiu su ratun Ai. Tumanangnge, soane wuṛṛu wanuane sarun Ta'u anuanna.

² Ai wuṛṛu ratune ṛinone olaanna ere lai i'o na'ola'a Yerikho wuṛṛu ratune rorone. Arawe paassa indi manga saranapane wuṛṛu manga winatange wotongnge anuanni yamiu maola'a pussa'anu. Pandiahite inai mamangalo soa udde ringannu paṛṛindu'anna wuassu liudde.”

³ Ne i Yosua nandiahite inai watukku Ai suaddio'a ringannu anambon tantarane. I tou namile 30.000 su atoune tantara apan apianne, ana see nandolokki mangitou su tempo ṛabbi,

⁴ wuṛṛu nangonggolu parenta indi si mangitou, “Pa'imbunite su samba'an soa poiaroddi, arawe arie tumaniten marau; wuṛṛu paasaddiate mamangalo.

⁵ I ya'u wuṛṛu tantara'u sarun mangundanin soa udde. Napawe manga taumatan Ai sumabbanga lumawanna si yami, yami sarun mabbal᷊i'a wuṛṛu tumal᷊angnga ere dorone.

⁶ I mangitou sarun mangenggena si yami ma'oman sara marau wuassu soa udde, wuṛṛu massunna manungku yami tinumal᷊angnga lai ere dorone.

⁷ Su tempo udde ṛinone i yamiu sumabbanga wuassu tampa pa'imbuniannu, wuṛṛu mangaṛṛo soa udde. Mawu Ruatanu sarun manantilla si yamiu.

⁸ Napawe niaaṛṛote, tutungke soa udde, ere buatte niparenta Mawu. Eteudde manaranu.”

⁹ Wua'udde i Yosua nandolokki mangitou, wuṛṛu i mangitou inaite na'imbuni su samba'an baṛṛatu soa Ai, suwallatu Ai wuṛṛu Betel, ana see naṛṛadote isudde. Arawe i Yosua nanaṛṛabbi su paddasanannu taumatan Israel.

¹⁰ Marua'allo atonna i Yosua napu'o wuṛṛu namarenta tantarane iapaammula. Wua'udde i tou wuṛṛu manga piaṛṛa'u Israel nangapiddu tantara udde watukku Ai.

¹¹ Tantara udde suadio'a ringanni Yosua niumamatta watukku ngara ahewal᷊anne su soa Ai, ana see naddasante su samba'an sawannaka apan isudde pia sambau wawal᷊anne su wallati mangitou wuṛṛu soa udde.

¹² Sarangkanambone maranin 5000 su atoune buatte nirolokka niapaimbuni su samba'an baṛṛatu soa udde, su wallatu Ai wuṛṛu Betel.

¹³ Nariaddi atokku tantaran pangalo udde niatokka arendi: Tampan piaṛṛange paarorone su samba'an sawannakka wuassu soa udde wuṛṛu tantarane waine su samba'an baṛṛata, arawe i Yosua inai watukku wal᷊ane su ṛabbi udde.

¹⁴ Aroddi Ratu Ai naasilo tantaran Yosua, mal᷊iha-l᷊ihakka i tou namarenta. I tou wuṛṛu anambon manga taumatane sinumabbanga nattudan wawal᷊annu Yordan inai mamangalo taumatan Israel su tampa apan paarorone. I tou wagga manungku tate mal᷊annu lai i tou sarun pangaloanna wuassu liudde.

¹⁵ I Yosua wuṛṛu tantarane na'ola'a paṛṛimau napa i mangitou sinumoṛṛota; i mangitou tinumal᷊angnga nattudan wadda'a mamara.

¹⁶ Anambon taumata esakka su soan Ai niapa'enggena si Yosua wuṛṛu tantarane udde. Arawe mangka'enggene i mangitou si Yosua, aatambanna lai araune i mangitou wuassu soa mangitou.

¹⁷ Anambon taumata su Ai nampassabanga nangenggena taumatan Israel, na'oman sara soa udde niwala wawu'anna aroddi, tawe mandariagane.

¹⁸ Wua'udde Mawu nabbisara si Yosua, “Wattea'e tambakku wuṛṛu timmona'e watukku Ai; soa udde Ta'u itantilla orassa indi si yamiu.” I Yosua tinumuṛṛute parenta Mawu udde.

¹⁹ Aroddi i Yosua namatten limane, tantara apan uaimbuni udde mal᷊iha-l᷊ihakka sinumabbanga wuṛṛu namangalo soa udde, ana se'e niaaṛṛote. I mangitou lapiddu nanoṛṛoba soa udde.

^20-22 Manga taumatan Ai nanaile watukku liudde, wuṛṛu naasilo timbulla sussal᷊oi na'oman sara langitta. I Yosua wuṛṛu tantarane lai naasilo timbulla wuṛṛu naatutukke manungku tantarane waine buatte naapangaṛṛo soa udde. Nariaddi nabal᷊i'e i Yosua wuṛṛu tantarane inai mamangalo wuṛṛu mamate taumatan Ai. Manga taumatan Israel apan su soa Ai udde lai nirumanta namangalo, na'oman sara taumatan Ai nial᷊iwunanna wuṛṛu tate maatal᷊angnga. Tawe saran sangkatou wuassi mangitou apan naatal᷊angnga, sarangkanambone nasue nipaten taumatan Israel,

²³ nallambe ratun Ai. I tou nisametta wua'udde niapidda niapassaruanna si Yosua.

²⁴ Napawe tantaran Israel, buatte namate tantaran seetta apan mangngenggena si mangitou su wadda'a mamara, i mangitou nabelengke watukku Ai, wuṛṛu namate anambon taumata poiaroddi.

^25-26 I Yosua sidutu uawatten tambakke watukku Ai, wuṛṛu tawe i sossokka ma'oman sara manga taumata su Ai sarangkanambone masuen nipate. Allo udde lai tumana'u Ai nate 12.000 su atoune anambone esakka wuṛṛu wawine.

²⁷ Winatanga wuṛṛu manga saranapa apan niaaṛṛo su soa udde, nianu manga taumatan Israel maola'a pussa'a mangitou, ere buatte niwal᷊o Mawu si Yosua.

²⁸ I Yosua nanutungnga Ai, wuṛṛu niwala tuidde ara'e lannangnge wal᷊en nahoakka sara orassa indi.

²⁹ Ratun soa udde niele su alu, wuṛṛu niwala isudde na'oman sara wawallo. Su tempo matannallo mattupe, i Yosua nandolokku taumata niapaal᷊appa winal᷊unanna udde wuṛṛu niramme su saruannu pasattangannu soa. Ana se'e tampa udde niomboannu watu manambo atonna. Manga watu udde ta'e poiaroddi na'oman sara orassa indi.

Manga Tita Mawu niwasa su Wowon Ebal

³⁰ Wua'udde i Yosua napararisikku sambau meddan sasamba su Mawu su Wowon Ebal, Mawu Ruatan Israel.

³¹ Meddan sasamba udde niolange uasul᷊ungu manga tatantiro sulal᷊ummu Wuke Musa, allangu Mawu udde, su manga taumatan Israel: “Sambau meddan sasamba wuassu manga watu apan taambe saran paassa nimmanara manga pakakassa wuassu atta'a.” Su wowon meddan sasamba udde taumatan Israel nangonggola su Mawu: sasamba itattambuna wuṛṛu lai sasamban paddarame mangitou.

³² Poiaroddi, ringannu aellehannu manga taumatan Israel, i Yosua namoṛṛeta su manga watu meddan sasamba udde manga Tita Mawu apan nial᷊inna wuassu lal᷊ummu Wuke Musa.

³³ Manga taumatan Israel, wuṛṛu manga piaṛṛange, manga tembonannu tantara, manga mallaṛṛuunga, wuṛṛu lai manga taumata raho apan uatana'a ringanni mangitou, uarisikka uatangnga Wantallu Pa'aire Mawu uasaruanna manga imam Lewi apan uapasanna Wantallu Pa'aire udde. Sambageanganna wuassu manga taumata udde uasaruanna watukku Wowon Gerizim, wuṛṛu sambageanganna lai uasaruanna watukku Wowon Ebal. I Musa, allangu Mawu udde buatte namarenta tadea'u i mangitou ma'ola'a olange udde napawe nia'omante tempone i mangitou manengkama al᷊amatta apan pina'ire Mawu.

³⁴ Wua'udde i Yosua nabbasa ma'ikka-ikkata anambon tita ere uawoṛṛeta sulal᷊ummu Wuken Tita, nasutta manga al᷊amatta wuṛṛu manga wawontoga.

³⁵ Al᷊awo'u parenta Musa niwasan i Yosua su anambon taumatan Israel apan uasemodda isudde; nasutta wawine, al᷊aṛṛana'a wuṛṛu manga taumata raho apan uatana'a ringanni mangitou.