YOSUA 5 - WUKE SUSI WATTI'U AL᷊AL᷊USASSA

¹ Anambon ratun Amori su samba'an baṛṛatu Sal᷊ukku Yordan, wuṛṛu anambon ratun Kanaan su winggin Tahal᷊oangngu Tangngane naaringikka manungku Sal᷊ukku Yordan niapaamara Mawu al᷊annune ṛuangannu Israel tuttumbe sal᷊ukka udde. Ne i mangitou nata'utta wuṛṛu nangilladda waugu taumatan Israel.

Pasasunatta su Gilgal

² Su tempo udde Mawu nabbisara si Yosua, “Pa'ola'e lari'a wuassu watu, ana see pa'ola'e lal᷊aghu pananunatta su manga taumatan Israel.”

³ Ne i Yosua tinumuṛṛutte parenta Mawu, wuṛṛu nanunatte manga taumatan Israel su tampa apan isassago Wuidda Panunatanna.

^4-6 Su tempo manga taumatan Israel sinumabbanga wuassu Mesir, anambon taumata esakka buatte nisunatta. Arawe su tempo i mangitou mammal᷊intadda su wadda'u anne appatu pul᷊o su tonnane al᷊annune, al᷊aṛṛana'i mangitou esakkatawe saran sangkatou apan buatte nisunatta. Wuṛṛu su panguddusannu tempo appatu pul᷊o su tonnane udde, manga esakka apan su tempo sinumabbanga wuassu Mesir apan nia'omante uukke sumutta tantara, sarangkanambone natete, ana waugu tawe tinumuṛṛuta parenta Mawu. Ne Mawu nassalu manungku i mangitou tawe iwala ma'ellega wanua apan manambo wiakke wuṛṛu masuwukka udde apan buatte nipa'ire-Ne su iupungngu al᷊amona mangitou.

⁷ Ana waugu udde anambon ana'i mangitou esakka taambe nisunatta. Ete al᷊aṛṛana'a wakku indi apan sunatanni Yosua.

⁸ Napawe i mangitou sarangkanambone buatte nisunata, i mangitou natana'a su paddasananna na'oman sara lessa mangitou napia.

⁹ Mawu nabbisara si Yosua, “Allo indi asasusan kamiu ere allanga su Mesir buatte niapawul᷊i-U.” Ana waugu udde tampa udde nisago Gilgala na'oman sara orassa indi.

¹⁰ Tantal᷊anna maddasanna su Gilgal su leta'a ratakke maranin Yerikho, ṛuangannu Israel nallaghun Paskah su allo wawallo eteudde allo appul᷊one appata wul᷊anna udde.

¹¹ Tiṛṛabine, su paarorone i mangitou umanna annu wanua Kanaan, eteudde: roti tawe ragine wuṛṛu ganduma nitapa.

¹² Su allo udde lai manna tate manawo wuassu langitta, wuṛṛu taumatan Israel naddote umanna manna. Nanattaka orassa udde i mangitou u'ante hessin leta'u Kanaan.

I Yosua wuṛṛu sangkatou esakka apan pia ahidde hal᷊ele

¹³ Su sambau tempo i Yosua su tampa maranin Yerikho. Inaṛṛombanganne i tou naasilo sangkatou esakka uarisikka su saruanne ringannu hal᷊ele sasawutanna. I Yosua nangundanin taumata udde, wuṛṛu naiwal᷊o, “I'o indi hawe ara'e seetta?”

¹⁴ “Wal᷊ine hawe wuṛṛu lai wal᷊ine seetta;” sasimbakku taumata udde. “I Ya'u nirumanta isindi naola'a sangkatou tembonannu tantara Mawu.” Naaringikka udde i Yosua lapiddu niumal᷊intudda nasubba taumata udde. I Yosua nabbisara, “I ya'u indi allangi Tuangnga. Apa apan botongnge ta'u olaanna si Tuangnga?”

¹⁵ Tembonannu tantaran Mawu udde sinumimbakka, “Luatta sapatunu; leta'a tampa dararisiṛṛannu udde leta'a na'ukkasa.” Ne i Yosua nalluatte sapatune.